ଚଳିତ ମାସ ଜୁନରେ ତିନୋଟି ଦେଶ ଗସ୍ତ କରିବେ ପ୍ରଧାନମନ୍ତ୍ରୀ । G-୭ ଶିଖର ସମ୍ମିଳନୀରେ ଯୋଗଦେବେ ପ୍ରଧାନମନ୍ତ୍ରୀ ମୋଦୀ । ୧୫-୧୬ ଜୁନ୍ ରେ ସାଇପ୍ରସ୍ , ୧୬-୧୭ ଜୁନ୍ ରେ କାନାଡା ଗସ୍ତ କରିବେ। କାନାଡା ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ନିମନ୍ତ୍ରଣରେ ମୋଦୀ ସେଠାରେ G-୭ ଶିଖର ସମ୍ମିଳନୀରେ ଯୋଗଦେବେ। କାନାଡା ପରେ, ପ୍ରଧାନମନ୍ତ୍ରୀ ଜୁନ୍ ୧୮ ରେ କ୍ରୋଏସିଆ ଗସ୍ତ କରିବେ। ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦି କାନାଡାର କାନାନାସ୍କିସ୍ ଗସ୍ତ କରିବେ। ଏଥର ପ୍ରଧାନମନ୍ତ୍ରୀ ମୋଦି ଲଗାତାର ଷଷ୍ଠ ଥର ପାଇଁ G-୭ ସମ୍ମିଳନୀରେ ଯୋଗ ଦେଉଛନ୍ତି। ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ଶକ୍ତି ସୁରକ୍ଷା, ପ୍ରଯୁକ୍ତିବିଦ୍ୟା ଏବଂ ନବସୃଜନ ସମେତ ଗୁରୁତ୍ୱପୂର୍ଣ୍ଣ ବିଶ୍ୱ ପ୍ରସଙ୍ଗ, ବିଶେଷକରି AI-ଶକ୍ତି ସମ୍ପର୍କ ଏବଂ କ୍ୱାଣ୍ଟମ୍-ସମ୍ବନ୍ଧୀୟ ପ୍ରସଙ୍ଗଗୁଡ଼ିକ ଉପରେ G-୭ ଦେଶଗୁଡ଼ିକର ନେତା, ଅନ୍ୟ ନିମନ୍ତ୍ରିତ ଦେଶ ଏବଂ ଅନ୍ତର୍ଜାତୀୟ ସଂଗଠନର ମୁଖ୍ୟଙ୍କ ସହିତ ଆଲୋଚନା କରିବେ। ପ୍ରଧାନମନ୍ତ୍ରୀ ଶିଖର ସମ୍ମିଳନୀ ଅବସରରେ ଅନେକ ଦ୍ୱିପାକ୍ଷିକ ବୈଠକ ମଧ୍ୟ କରିବେ।
ପୂର୍ବରୁ, କାନାଡା ପ୍ରଧାନମନ୍ତ୍ରୀଙ୍କ ଠାରୁ ଫୋନ୍ ପାଇବା ପରେ, ମୋଦି ତାଙ୍କ X ହ୍ୟାଣ୍ଡେଲରେ ଏ ବିଷୟରେ ସୂଚନା ଦେଇଥିଲେ। ପ୍ରଧାନମନ୍ତ୍ରୀ ଲେଖିଥିଲେ, “କାନାଡା ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ଠାରୁ ଫୋନ୍ ପାଇ ଖୁସି।” ତାଙ୍କ ସାମ୍ପ୍ରତିକ ନିର୍ବାଚନ ବିଜୟ ପାଇଁ ତାଙ୍କୁ ଅଭିନନ୍ଦନ ଜଣାଇବା ସହିତ ଏହି ମାସ ଶେଷରେ କାନାନାସ୍କିସ୍ରେ ହେବାକୁ ଥିବା G-୭ ଶିଖର ସମ୍ମିଳନୀରେ ନିମନ୍ତ୍ରଣ ପାଇଁ ଧନ୍ୟବାଦ ଜଣାଇଥିଲେ।
ଭାରତ ଏବଂ କାନାଡା ମଧ୍ୟରେ ସମ୍ପର୍କ ଖରାପ ହେବା ପରେ ଏହା ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ କାନାଡା ଗସ୍ତ ହେବ। କାନାଡା କହିଥିଲା ଯେ ସେପ୍ଟେମ୍ବର ୨୦୨୩ ରେ କାନାଡା ମାଟିରେ ଖଲିସ୍ତାନୀ ବିଚ୍ଛିନ୍ନତାବାଦୀ ହରଦୀପ ସିଂହ ନିଜ୍ଜରଙ୍କ ହତ୍ୟାରେ ଭାରତୀୟ ଏଜେଣ୍ଟମାନେ “ସମ୍ଭବ” ସାମିଲ ଅଛନ୍ତି। ପୂର୍ବତନ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କ ଅଭିଯୋଗ ପରେ ସମ୍ପର୍କ ତିକ୍ତ ହୋଇଥିଲା। ଭାରତ କାନାଡାର ଏହି ସମସ୍ତ ଅଭିଯୋଗକୁ ପ୍ରତ୍ୟାଖ୍ୟାନ କରିଛି।
ପ୍ରଧାନମନ୍ତ୍ରୀ ମୋଦି କ୍ରୋଏସିଆର ପ୍ରଧାନମନ୍ତ୍ରୀ ଆଣ୍ଡ୍ରେଜ୍ ପ୍ଲେଙ୍କୋଭିକ୍ଙ୍କ ସହ ଦ୍ୱିପାକ୍ଷିକ ଆଲୋଚନା କରିବେ ଏବଂ କ୍ରୋଏସିଆର ରାଷ୍ଟ୍ରପତି ଜୋରାନ୍ ମିଲାନୋଭିକ୍ଙ୍କୁ ଭେଟିବେ। କ୍ରୋଏସିଆ ଗସ୍ତ ମଧ୍ୟ ୟୁରୋପୀୟ ସଂଘର ଅଂଶୀଦାରମାନଙ୍କ ସହିତ ସମ୍ପର୍କକୁ ଆହୁରି ମଜବୁତ କରିବା ଦିଗରେ ଏକ ପଦକ୍ଷେପ।