ଲୋକେ ପ୍ଲାକାର୍ଡ ଓ ସ୍ଲୋଗାନ ଦେବା ଲାଗି ସଂସଦକୁ ପଠାଇ ନାହାଁନ୍ତି: ଓମ୍ ବିର୍ଲା

ବିରୋଧୀଙ୍କ ଜିଏସଟି ଓ ଦରବୃଦ୍ଧି ପ୍ରତିବାଦ

ନୂଆଦିଲ୍ଲୀ: ଦେଶରେ ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି ପ୍ରତିବାଦରେ ବିରୋଧୀ ଦଳ ଗୁଡିକ ସଂସଦ ଭବନର ଗାନ୍ଧୀ ପ୍ରତିମୂର୍ତ୍ତି ଓ ଗୃହ ମଧ୍ୟରେ ହଙ୍ଗାମା ସୃଷ୍ଟି କରୁଛନ୍ତି। ସୂଚନା ଅନୁସାରେ ଦେଶରେ ଦିନକୁ ଦିନ ପେଟ୍ରୋଲ, ଡିଜେଲ, ଖାଇବା ତେଲ, ରନ୍ଧନ ଗ୍ୟାସ ଭଳି ଅତ୍ୟାବଶ୍ୟକ ସାମଗ୍ରୀର ଦର ହୁ ହୁ ହୋଇ ବଢିଚାଲିଛି। ଏହାଛଡା ପ୍ୟାକେଟ ମୁଢି ଓ ଚୂଡା ଉପରେ ସରକାର ଜିଏସଟି ଲଗାଇବା ଫଳରେ ଦେଶରେ ଅସନ୍ତୋଷ ସୃଷ୍ଟି ହୋଇଛି। ଯାହାକୁ ନେଇ ବିରୋଧୀମାନେ ମଧ୍ୟ ଗୃହରେ ହଙ୍ଗାମା ସୃଷ୍ଟି କରୁଛନ୍ତି। ଏହାକୁ ନେଇ ଲୋକସଭାର ବାଚସ୍ପତି ଓମ ବିର୍ଲା କ୍ଷୋଭ ପ୍ରକାଶ କରିଛନ୍ତି। ଲୋକମାନେ ଆମକୁ ସଂସଦରେ ଆଲୋଚନା କରିବା ପଠାଇଛନ୍ତି। ଆମକୁ ପ୍ଲାକାର୍ଡ ଓ ସ୍ଲୋଗାନ ଦେବା ପାଇଁ ସଂସଦକୁ ପଠାଇ ନାହାଁନ୍ତି ବୋଲି ବାଚସ୍ପତି ଶ୍ରୀ ବିର୍ଲା କହିଛନ୍ତି। ଗୃହରେ ସାଂସଦଙ୍କ ହଙ୍ଗାମା ଯୋଗୁ ଗୃହର ଗାରିମା ନଷ୍ଟ ହେଉଥିବା ବାଚସ୍ପତି କହିଥିଲେ।

ସମସ୍ତ ପ୍ରସଙ୍ଗରେ ଗୃହରେ ଆଲୋଚନା ପାଇଁ ମୁଁ ସଦାବେଳେ ପ୍ରସ୍ତୁତ। ଗୃହର ଶୂନ୍ୟକାଳରେ ଶାନ୍ତିପୂର୍ଣ୍ଣ ଭାବେ ଏ ସମସ୍ତ ପ୍ରସଙ୍ଗରେ ଆଲୋଚନା କରାଯାଇ ପାରିବ ବାଚସ୍ପତି ଗୃହର ସଦସ୍ୟମାନଙ୍କୁ କହିଥିଲେ। ବୁଧବାର ଚଳିତ ମୌସୁମୀ ଅଧିବେଶନର ଚତୁର୍ଥ ଦିନ ରହିଥିଲା। ଜିଏସଟି ଓ ମହଙ୍ଗା ମାଡକୁ ନେଇ ବିରୋଧୀ ଦଳର ଉଭୟ ସଦନର ସଦସ୍ୟମାନେ ସରକାରଙ୍କୁ ଟାର୍ଗେଟ କରିଥିଲେ। ଗାନ୍ଧୀ ପ୍ରତିମୂର୍ତ୍ତି ତଳେ ବିରୋଧୀ ଦଳର ସଦସ୍ୟମାନେ ଗ୍ୟାସ ସିଲିଣ୍ଡର, କ୍ଷୀର ପ୍ୟାକେଟ, ଦହି ପ୍ୟାକେଟ, ପନିର ପ୍ୟାକେଟ ସମେତ ଅନେକ ଅତ୍ୟାବଶ୍ୟକ ସାମଗ୍ରୀ ରଖି ପ୍ରତିବାଦ କରିଥିଲେ। ଦରବୃଦ୍ଧି ଲାଗି ସଂସଦର ଭିତରେ ବାହାରେ ଆମେ ପ୍ରତିବାଦ ଜାରି ରଖିବୁ ବୋଲି ସଂସଦୀୟ ବ୍ୟାପାର ମନ୍ତ୍ରୀ ମଲ୍ଲୀକାର୍ଜୁନ ଖାଡଗେ କହିଛନ୍ତି। ଜିଏସଟି ଓ ଦର ବୃଦ୍ଧି ପ୍ରସଙ୍ଗରେ ବିରୋଧୀ ସଦସ୍ୟମାନେ ଗୃହରେ ହଙ୍ଗାମା କରୁଥିବାରୁ ଗୃହ କାର୍ଯ୍ୟ ସୁରୁଖୁରୁରେ ଚାଲିପାରନାହିଁ ବୋଲି ଜଣାପଡିଛି।