ନୂଆଦିଲ୍ଲୀ: ଟିଭି ଇଣ୍ଡଷ୍ଟ୍ରିରୁ ଏକ ଦୁଃଖଦ ଖବର ଆସିଛି। ଅଭିନେତ୍ରୀ ପ୍ରିୟା ମରାଠେଙ୍କର ୩୮ ବର୍ଷ ବୟସରେ ଦେହାନ୍ତ ହୋଇଛି। ପ୍ରିୟାଙ୍କ ଆକସ୍ମିକ ଦେହାନ୍ତ ସମସ୍ତଙ୍କୁ ଚକିତ କରିଛି। ପ୍ରିୟା ଅନେକ ଟିଭି ଶୋ ଏବଂ ୱେବ୍ ଶୋରେ କାମ କରିଛନ୍ତି। ସେ ମରାଠୀ ଇଣ୍ଡଷ୍ଟ୍ରିରେ ଏକ ଜଣାଶୁଣା ନାମ। ପ୍ରିୟା ମୁମ୍ବାଇର ମୀରା ରୋଡରେ ଥିବା ତାଙ୍କ ଘରେ ମୃତ୍ୟୁବରଣ କରିଥିଲେ। କିଛି ବର୍ଷ ପୂର୍ବରୁ ସେ କ୍ୟାନ୍ସର ରୋଗରେ ପିଡୀତ ହୋଇଥିଲେ ମଧ୍ୟ ସେ ଧୀରେ ଧୀରେ ସୁସ୍ଥ ହେଉଥିଲେ। କିନ୍ତୁ ସେ ପୁଣିଥରେ ଏହି ରୋଗର ଶିକାର ହୋଇଥିଲେ ଓ ତାଙ୍କ ଶରୀରରେ କ୍ୟାନ୍ସର ବ୍ୟାପିବାରେ ଲାଗିଥିଲା। ଫଳରେ ଆଉ କୌଣସି ଚିକିତ୍ସା ତାଙ୍କ ଉପରେ ପ୍ରଭାବ ପକାଇ ପାରିନଥିଲା। ଶେଷରେ ସେ କ୍ୟାନ୍ସର ଆଗରେ ହାରିଯାଇ ଶନିବାର ଦିନ ଶେଷ ନିଶ୍ୱାସ ତ୍ୟାଗ କରିଥିଲେ।
ପ୍ରିୟା ମରାଠେ ଅନେକ ଟିଭି ଶୋ ଏବଂ ୱେବ୍ ଶୋ’ରେ କାମ କରିଛନ୍ତି । ପ୍ରିୟା ମରାଠେ ଜଣେ ଷ୍ଟାଣ୍ଡ-ଅପ୍ କମେଡିଆନ୍ ଥିଲେ ଏବଂ ଜଣେ ଅଭିନେତ୍ରୀ ମଧ୍ୟ ଥିଲେ। ‘କସମ୍ ସେ’ ଧାରାବାହିକ ମାଧ୍ୟମରେ ହିନ୍ଦୀ ଇଣ୍ଡଷ୍ଟ୍ରିରେ ପ୍ରବେଶ କରିଥିବା ପ୍ରିୟା ‘କମେଡି ସର୍କସ୍’ର ପ୍ରଥମ ସିଜିନରେ ମଧ୍ୟ ନଜର ଆସିଥିଲେ। ତଥାପି, ଏହି ଧାରାବାହିକ ଗୁଡ଼ିକରେ ତାଙ୍କୁ ବିଶେଷ ପରିଚୟ ମିଳିନଥିଲା। ଜିଟିଭିର ଲୋକପ୍ରିୟ ଶୋ’ ‘ପବିତ୍ର ରିସ୍ତା’ରେ ସେ ବର୍ଷା ଦେଶପାଣ୍ଡେ ଭୂମିକାରେ ନଜର ଆସିଥିଲେ । ‘ପବିତ୍ର ରିସ୍ତା’ ଟିଭି ଶୋ’ରୁ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ ପ୍ରିୟା ମରାଠେ । ଏହାଛଡ଼ା ସେ କସମ ସେ, କମେଡି ସର୍କସ କେ ସୁପରଷ୍ଟାର୍ସ, ଉତରନ, ବଡ଼େ ଅଚ୍ଛେ ଲଗତେ ହୈ, ଭାରତ କା ବୀର ପୁତ୍ର-ମହାରାଣା ପ୍ରତାପ, ସାବଧାନ ଇଣ୍ଡିଆ, ଭାଗେରେ ମନ, ସାଥ ନିଭାନା ସାଥିଆ ଭଳି ଅନେକ ଶୋ’ କରିଛନ୍ତି ।
କହିବାକୁ ଗଲେ ପ୍ରିୟାଙ୍କ ଜନ୍ମ ୨୩ ଏପ୍ରିଲ ୧୯୮୭ରେ ମୁମ୍ବାଇରେ ହୋଇଥିଲା। ସେ ତାଙ୍କର ସ୍କୁଲ ଏବଂ କଲେଜ ଶିକ୍ଷା ମୁମ୍ବାଇରୁ ହିଁ କରିଥିଲେ। ପାଠପଢ଼ା ଶେଷ କରିବା ପରେ ତାଙ୍କ ସ୍ୱପ୍ନ ପୂରଣ କରିବା ପାଇଁ ଅଭିନୟ ଜଗତରେ ଏଣ୍ଟ୍ରି କରିଥିଲେ। ପ୍ରିୟା ମରାଠୀ ଧାରାବାହିକ ‘ୟା ସୁଖାନୋୟା’ ‘ପରେ ‘ଚାର ଦିବସ ସାସୁଚେ’ ସହିତ ତାଙ୍କର ଟିଭି ଯାତ୍ରା ଆରମ୍ଭ କରିଥିଲେ। ସେ ୨୦୧୨ ମସିହାରେ ଶାନ୍ତନୁ ମୋଘେଙ୍କୁ ବିବାହ କରିଥିଲେ। ଆପଣଙ୍କୁ ଜଣାଇ ଦେଉଛୁ ଯେ ଶାନ୍ତନୁ ହେଉଛନ୍ତି ପ୍ରସିଦ୍ଧ ଅଭିନେତା ଶ୍ରୀକାନ୍ତ ମୋଘେଙ୍କ ପୁଅ।