ନୂଆଦିଲ୍ଲୀ-: ଏପ୍ରିଲ ୨୨ରେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ତଦନ୍ତ ଦାୟିତ୍ଵ କେନ୍ଦ୍ର ସରକାର ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ)କୁ ହସ୍ତାନ୍ତର କରିଥିବା ବେଳେ ତଦନ୍ତ ପ୍ରକ୍ରିୟା ଏବେ ତ୍ବରାନ୍ବିତ ହୋଇଛି ଏବଂ ପୀଡ଼ିତଙ୍କ ବୟାନ ରେକର୍ଡ ଜାରି ରହିଛି। ଆତଙ୍କବାଦୀ ସଂଗଠନ ଲସ୍କର ଏ ତୋଏବା ଏହାର ଆଗୁଆ ସଂଗଠନ ‘ଦ ରେଜିଷ୍ଟାନ୍ସ ଫ୍ରଣ୍ଟ’ (ଟିଆରଏଫ୍) ଜରିଆରେ ଏହି ଆକ୍ରମଣ କରିଥିବା ସ୍ପଷ୍ଟ ହୋଇଛି। ତଦନ୍ତର ଅଗ୍ରଗତି ଉପରେ ଗୃହ ମନ୍ତ୍ରାଳୟର ଅହରହ ନଜର ରହିଛି । ଏନ୍ଆଇଏ ଏବେ ଜାମ୍ମୁ କାଶ୍ମୀର ପୋଲିସ ଠାରୁ ମାମଲାର ସମ୍ପୂର୍ଣ୍ଣ ତଦନ୍ତ ଭରା ନିଜ ହାତକୁ ନେଇ ପାକିସ୍ତାନ କରିଥିବା ଷଡ଼ଯନ୍ତ୍ରର ପର୍ଦ୍ଦାଫାସ କରିବା ପାଇଁ ବ୍ୟାପକ ଖୋଳତାଡ଼ ଚଳାଇଛି । ଏଫ୍ଆଇଆର ପୁନଃ ପଞ୍ଜୀକୃତ କରି ତଦନ୍ତ ଆରମ୍ଭ ହୋଇଥିବା ବେଳେ ତଦନ୍ତ ପରିସର ବ୍ୟାପକ ହୋଇଛି ।
ସୂଚନାଯୋଗ୍ୟ, ଏହି ମାମଲାରେ ଏନ୍ଆଇଏ ପ୍ରଥମ ଦିନରୁ ହିଁ ଜମ୍ମୁ କାଶ୍ମୀର ପୁଲସ ସନ୍ଥ ମିଳିତ ଭାବେ ତଦନ୍ତ ପ୍ରକ୍ରିୟାରେ ସାମିଲ ହୋଇଥିଲା। ଏନ୍ଆଇଏ ଟିମ୍ ଆତଙ୍କବାଦୀ ସଂଗଠନ ସହ ଜଡିତ ଗିରଫ ଆତଙ୍କବାଦୀ ଏବଂ ଓରରଗ୍ରାଉଣ୍ଡ କର୍ମୀଙ୍କୁ ପଚରାଉଚରା କରୁଛି । ସେପଟେ ସିଆର୍ପିଏଫ୍ ଓ ଜମ୍ମୁ-କାଶ୍ମୀର ପୋଲିସର ମିଳିତ ଫୋର୍ସ ବୈସାରଣ ଉପତ୍ୟକାରେ ୨୬ ଜଣ ନିରୀହ ନାଗରିକଙ୍କୁ ହତ୍ୟା କରିଥିବା ଆକ୍ରମଣକାରୀଙ୍କୁ ଠାବ କରିବାକୁ ତଲାସୀ ଅଭିଯାନ ଚଲାଇଛି । ଫୋରେନସିକ୍ ବିଶ୍ଳେଷଣ ଏବଂ ପ୍ରତ୍ୟକ୍ଷଦର୍ଶୀଙ୍କ ବୟାନରୁ ଜଣାପଡିଛି ଯେ ଏହି ଆକ୍ରମଣରେ ୫ରୁ ଅଧିକ ଆତଙ୍କବାଦୀ ସମ୍ପୃକ୍ତ ଥିଲେ, ଯେଉଁମାନେ ଅତ୍ୟଧୁନିକ ଅସ୍ତ୍ରଶସ୍ତ୍ରରେ ସହିତ ଥିଲେ ଏବଂ କିଛି ଆତଙ୍କବାଦୀ ସେନା ଭଳି ପୋଷାକ ପିନ୍ଧିଥିଲେ । ଗୁଇନ୍ଦା ସୂଚନା ଅନୁଯାୟୀ ଏହି ଅପରେସନରେ ପାକିସ୍ତାନର ଆତଙ୍କବାଦୀମାନେ ସକ୍ରିୟ ଭାବେ ସାମିଲ ଥିଲେ । ଏବଂ ମୁମ୍ବାଇ ୨୬/୧୧ ଘଟଣା ଭଳି ପହଲଗାମ ଆକ୍ରମଣ କରିବା ପାଇଁ ଯୋଜନା ହୋଇଥିବା ଅନୁମାନ କରାଯାଉଛି ।