ନବରଙ୍ଗପୁର:- ନିଶାଶକ୍ତ ଯୁବକର ଉନ୍ମକ୍ତକାଣ୍ଡ, ବିଳମ୍ବିତ ରାତିରେ ସାମ୍ବାଦିକଙ୍କୁ କଲା ମରଣାନ୍ତକ ଆକ୍ରମଣ । ନିଶାଶକ୍ତ ଯୁବକର ଛୁରା ମାଡ଼ରେ ସାମ୍ବାଦିକ ହେଲେ ଗୁରୁତର । ପ୍ରାଥମିକ ଚିକିତ୍ସା ପରେ ଗୁରୁତର ଅବସ୍ଥାରେ ସାମ୍ବାଦିକଙ୍କୁ ବିଶାଖାପାଟଣା ଡାକ୍ତରଖାନାକୁ କରାଗଲା ସ୍ଥାନାନ୍ତର । ଛୁରା ମାଡ଼ର କାରଣ ଅସ୍ପଷ୍ଟ ରହିଥିବାବେଳେ ଆକ୍ରମଣକାରୀ ଯୁବକକୁ ସ୍ଥାନୀୟ ଲୋକେ କାବୁ କରି ନିସ୍ତୁକ ମାଡ଼ ମାରିବା ସହିତ ଡାକ୍ତରଖାନାରେ ଭର୍ତି କରିଥିଲେ । ଏଭଳି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ପାପଡାହାଣ୍ଡି ଗ୍ରାମରେ ।
ଗତକାଲି ବିଳମ୍ବିତ ରାତିରେ ନବରଙ୍ଗପୁର ଜିଲ୍ଲାର ସୁମିତ କୁମାର ଘଣ୍ଟ ନାମକ ଜଣେ ସାମ୍ବାଦିକ ନିଜ ଘର ପାପଡାହାଣ୍ଡିକୁ ମୋଟର ସାଇକଲ ଯୋଗେ ଫେରୁଥିବା ବେଳେ ଅଚାନକ ପାପଡାହାଣ୍ଡି ଛକ ନିକଟରେ ହରେକୃଷ୍ଣ ବେହେରା ନାମକ ଯୁବକ ନିଶାସକ୍ତ ଅବସ୍ଥାରେ ସାମ୍ବାଦିକଙ୍କୁ ଖଣ୍ଡାରେ ମରଣାନ୍ତକ ଆକ୍ରମଣ କରିଥିଲା । ତେବେ କୌଶଳ କ୍ରମେ ସୁମିତ ଆକ୍ରମଣକାରୀର ଖଣ୍ଡା ଧରିଥିବା ହାତକୁ କାବୁ କରିଥିବା ବେଳେ ନିଶାଶକ୍ତ ଯୁବକ ଅନ୍ୟ ହାତରେ ଧରିଥିବା ମାରଣାସ୍ତ୍ରରେ ସୁମିତଙ୍କ ଶରୀରର ବିଭିନ୍ନ ସ୍ଥାନକୁ ଆକ୍ରମଣ କରିଥିଲା । ଆକ୍ରମଣର ଯନ୍ତ୍ରଣାରେ ଛଟପଟ ହୋଇ ସାମ୍ବାଦିକ ସୁମିତ ଚିତ୍କାର କରି ଦୌଡ଼ି ଥିବା ବେଳେ ଆଖ ପାଖ ଲୋକ ଉଠି ଆସି ସାମ୍ବାଦିକ କୁ ଉଦ୍ଧାର କରି ପାପଡାହାଣ୍ଡି ଡାକ୍ତରଖାନାରେ ଭର୍ତି କରିଥିଲେ । ତେବେ, ତାଙ୍କ ଅବସ୍ଥା ଗୁରୁତର ହେବାରୁ ଡାକ୍ତର ତାଙ୍କୁ ବିଶାଖାପାଟଣା ଡାକ୍ତରଖାନାକୁ ସ୍ଥାନାନ୍ତର କରିଥିଲେ ।
