ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ବଢ଼ୁଥିବା ଅଶାନ୍ତି ମଧ୍ୟରେ ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଓ ତାଙ୍କ ଇରାନୀ ପ୍ରତିପକ୍ଷଙ୍କ ମଧ୍ୟରେ ଗତ କିଛି ଦିନ ମଧ୍ୟରେ ତିନୋଟି ପର୍ଯ୍ୟାୟର ଆଲୋଚନା ହୋଇଥିବା କଥା MEA ଗୁରୁବାର ସୂଚନା ଦେଇଛି। MEA ଅନୁସାରେ, ଏହି ଆଲୋଚନାରେ ମଧ୍ୟପ୍ରାଚ୍ୟର ପରିସ୍ଥିତି, ଭାରତ ଅଭିମୁଖୀ ଜାହାଜ ଚଳାଚଳର ସୁରକ୍ଷା ଏବଂ ଭାରତର ଶକ୍ତି ସୁରକ୍ଷା ସମ୍ପର୍କିତ ପ୍ରସଙ୍ଗ ଉପରେ ଆଲୋଚନା ହୋଇଥିଲା।
ସୂଚନା ଅନୁଯାୟୀ, ଇରାନରେ ପ୍ରାୟ ୯ ହଜାର ଭାରତୀୟ ନାଗରିକ ଅଛନ୍ତି। ସେମାନଙ୍କ ମଧ୍ୟରେ ଛାତ୍ର, ନାବିକ, ବ୍ୟବସାୟୀ, ବୃତ୍ତିଗତ ବ୍ୟକ୍ତି ଓ କିଛି ତୀର୍ଥଯାତ୍ରୀ ଅନ୍ତର୍ଭୁକ୍ତ। ଏହାମଧ୍ୟରୁ ଅନେକ ଭାରତୀୟ, ବିଶେଷକରି ଛାତ୍ରମାନେ, ଦେଶ ଛାଡ଼ି ଘରକୁ ଫେରିଆସିଛନ୍ତି। ସରକାରୀ ସୂଚନା ଅନୁସାରେ, ତେହେରାନରେ ଥିବା ଅନେକ ଭାରତୀୟଙ୍କୁ ସୁରକ୍ଷିତ ସ୍ଥାନ ଓ ଅନ୍ୟ ସହରକୁ ସ୍ଥାନାନ୍ତର କରାଯାଇଛି। ଏହାସହ ଯେଉଁ ଭାରତୀୟ ନାଗରିକମାନେ Azerbaijan ଓ Armenia ମାର୍ଗରେ ଭାରତକୁ ଫେରିବାକୁ ଚାହୁଁଛନ୍ତି ସେମାନଙ୍କୁ ସରକାର ସହାୟତା କରୁଛି।
MEA ମୁଖପାତ୍ର ରଣଧୀର ଜୟଶୱାଲ୍ କହିଛନ୍ତି ଯେ ଭାରତୀୟମାନଙ୍କୁ ଭିସା ପ୍ରଦାନ, ସ୍ଥଳ ସୀମା ଅତିକ୍ରମ କରିବା ଏବଂ ସେଠାରୁ ବାଣିଜ୍ୟିକ ବିମାନ ଯୋଗେ ଘରକୁ ଫେରିବାରେ ସରକାର ସମସ୍ତ ସହାୟତା ଯୋଗାଇଦେଉଛି। ପାକିସ୍ତାନ ପକ୍ଷରୁ ଆସିଥିବା କିଛି ଅଭିଯୋଗ ସମ୍ପର୍କରେ ପ୍ରତିକ୍ରିୟା ଦେଇ MEA ମୁଖପାତ୍ର କହିଛନ୍ତି ଯେ, ଏପରି ଭିତ୍ତିହୀନ ଅଭିଯୋଗକୁ ଭାରତ ସ୍ପଷ୍ଟ ଭାବେ ପ୍ରତ୍ୟାଖ୍ୟାନ କରୁଛି। ତାଙ୍କ କହିବା ଅନୁସାରେ, ପାକିସ୍ତାନ ପାଇଁ ନିଜ ଭୁଲ ପାଇଁ ଭାରତକୁ ଦାୟୀ କରିବା ଏକ ପ୍ରକାର ଅଭ୍ୟାସ ହୋଇଯାଇଛି।