ଇଣ୍ଡିଆ ଆଲାଏନ୍ସ ଉପରାଷ୍ଟ୍ରପତି ପଦ ପାଇଁ ନାମ ଘୋଷଣା କରିଛି। ତେଲେଙ୍ଗାନାର ପୂର୍ବତନ ବିଚାରପତି ବି ସୁଦର୍ଶନ ରେଡ୍ଡୀଙ୍କୁ ପ୍ରାର୍ଥୀ କରାଯାଇଛି। ରେଡ୍ଡୀ ଏନଡିଏ ପ୍ରାର୍ଥୀ ସିପି ରାଧାକୃଷ୍ଣନଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିବେ। ରେଡ୍ଡୀଙ୍କ ନାମ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଘୋଷଣା କରିଛନ୍ତି। ଖାର୍ଗେଙ୍କ ଅନୁଯାୟୀ, ସମସ୍ତ ବିରୋଧୀ ଦଳଙ୍କ ସହ ଆଲୋଚନା ପରେ ସୁଦର୍ଶନ ରେଡ୍ଡୀଙ୍କ ନାମ ଉପରେ ନିଷ୍ପତ୍ତି ନିଆଯାଇଛି। ଆମ ଆଦମୀ ପାର୍ଟି ମଧ୍ୟ ରେଡ୍ଡୀଙ୍କ ନାମକୁ ସମର୍ଥନ କରିଛି।
ଉପରାଷ୍ଟ୍ରପତିଙ୍କ ନାମ ଉପରେ ସରକାର ସହମତି ସୃଷ୍ଟି କରିବାକୁ ଚେଷ୍ଟା କରିଥିଲେ, କିନ୍ତୁ କିଛି ହୋଇପାରିଲା ନାହିଁ। ଏନଡିଏ ଦୁଇ ଦିନ ପୂର୍ବରୁ ସିପି ରାଧାକୃଷ୍ଣନଙ୍କ ନାମ ଘୋଷଣା କରିଥିଲା। ଏହା ପରେ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ସମସ୍ତ ଦଳ ସହିତ କଥାବାର୍ତ୍ତା କରିବାର ଦାୟିତ୍ୱ ଦିଆଯାଇଥିଲା। ବି ସୁଦର୍ଶନ ରେଡ୍ଡୀଙ୍କ ପୂର୍ବରୁ, ଡିଏମକେର ତିରୁଚି ଶିବଙ୍କ ନାମ ମଧ୍ୟ ରାଜନୈତିକ ମହଲରେ ଆଲୋଚନା ହେଉଥିଲା, କିନ୍ତୁ ଇଣ୍ଡିଆ ଆଲାଏନ୍ସ ତେଲେଙ୍ଗାନାରୁ ଆସିଥିବା ସୁଦର୍ଶନଙ୍କୁ ଉପରାଷ୍ଟ୍ରପତି ପ୍ରାର୍ଥୀ କରିବାକୁ ନିଷ୍ପତ୍ତି ନେଇଛି।
ବି ସୁଦର୍ଶନ ରେଡ୍ଡୀ ୨୦୦୭ ରୁ ୨୦୧୧ ପର୍ଯ୍ୟନ୍ତ ସୁପ୍ରିମକୋର୍ଟର ବିଚାରପତି ଥିଲେ। ୧୯୪୬ ମସିହାରେ ଜନ୍ମଗ୍ରହଣ କରିଥିବା ସୁଦର୍ଶନ ରେଡ୍ଡୀ ଆନ୍ଧ୍ରରେ ତାଙ୍କର ପ୍ରାଥମିକ ଶିକ୍ଷା ଗ୍ରହଣ କରିଥିଲେ। ରେଡ୍ଡୀ ଓସମାନିଆ ବିଶ୍ୱବିଦ୍ୟାଳୟରୁ ଆଇନ ଡିଗ୍ରୀ ହାସଲ କରିଥିଲେ। ଏହା ପରେ, ସେ ପ୍ରସିଦ୍ଧ ଓକିଲ କେ ପ୍ରତାପ ରେଡ୍ଡୀଙ୍କ ଅଧୀନରେ କାମ କରିବା ଆରମ୍ଭ କରିଥିଲେ। ଅଗଷ୍ଟ ୧୯୮୮ ରେ, ରେଡ୍ଡୀ ହାଇକୋର୍ଟରେ ସରକାରୀ ଓକିଲ ଭାବରେ ନିଯୁକ୍ତ ହୋଇଥିଲେ।୧୯୯୩ ମସିହାରେ ରେଡ୍ଡିଙ୍କୁ ଆନ୍ଧ୍ରପ୍ରଦେଶର ଅତିରିକ୍ତ ବିଚାରପତି ଭାବରେ ନିଯୁକ୍ତ କରାଯାଇଥିଲା। ୨୦୦୫ ମସିହାରେ ରେଡ୍ଡିଙ୍କୁ ଗୌହାଟି ହାଇକୋର୍ଟର ମୁଖ୍ୟ ବିଚାରପତି କରାଯାଇଥିଲା। ୨୦୦୭ ମସିହାରେ ରେଡ୍ଡି ସୁପ୍ରିମକୋର୍ଟରେ ପହଞ୍ଚିଥିଲେ। ୨୦୧୩ ମସିହାରେ ରେଡ୍ଡିଙ୍କୁ ଗୋଆର ଲୋକାୟୁକ୍ତ ଭାବରେ ନିଯୁକ୍ତ କରାଯାଇଥିଲା।