ନୂଆଦିଲ୍ଲୀ: ଆତଙ୍କବାଦୀଙ୍କ ନେଟୱର୍କକୁ ବଡ଼ ଝଟକା । ଜମ୍ମୁ କାଶ୍ମୀରର ଗୁରେଜ୍ ସେକ୍ଟରରେ ସୁରକ୍ଷା ବାହିନୀକୁ ଏକ ବଡ଼ ସଫଳତା। ଏକନାଉଣ୍ଟରରେ ନିହତ ହୋଇଛି ବାଗୁ ଖାନ ଓରଫ ସମନ୍ଦର ଚାଚା, ଯିଏ ଆତଙ୍କବାଦୀଙ୍କ ମଧ୍ୟରେ ‘ହ୍ୟୁମେନ ଜିପିଏସ୍’ ଭାବେ ପରିଚିତ ଥିଲା। ତା’ସହିତ ଆଉ ଜଣେ ଆତଙ୍କବାଦୀ ଭାରତୀୟ ସୁରକ୍ଷା ବଳଙ୍କ ଗୁଳିରେ ନିହତ ହୋଇଛି। ସେମାନେ ନୌଶେରା ନାର ଅଞ୍ଚଳରେ ଭାରତୀୟ ସୀମା ମଧ୍ୟକୁ ଅନୁପ୍ରବେଶ କରିବାକୁ ଉଦ୍ୟମ କଲା ବେଳେ ସୁରକ୍ଷା କର୍ମୀଙ୍କ ଗୁଳିରେ ନିହତ ହୋଇଥିଲେ।
ବାଗୁ ଖାନ ଓରଫ ସମନ୍ଦର ଚାଚା ୧୯୯୫ ମସିହାରୁ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ରହୁଥିଲା। ସୁରକ୍ଷା ଏଜେନ୍ସି ଅନୁଯାୟୀ, ସେ ଗତ ତିନି ଦଶନ୍ଧି ମଧ୍ୟରେ ଗୁରେଜ୍ ସେକ୍ଟର ଏବଂ ଆଖପାଖ ଅଞ୍ଚଳରୁ ୧୦୦ରୁ ଅଧିକ ଅନୁପ୍ରବେଶ ପ୍ରୟାସରେ ସାମିଲ ଥିଲା। ପାହାଡ଼ ଏବଂ ଗୁପ୍ତ ପଥ ବିଷୟରେ ତାର ଗଭୀର ଜ୍ଞାନ ପାଇଁ ସେଠାରେ ଥିବା ଆତଙ୍କବାଦୀ ସଂଗଠନଗୁଡ଼ିକ ଶକ୍ତିଶାଳୀ କରିଥିଲା। ହିଜବୁଲ କମାଣ୍ଡର ଭାବେ ସମନ୍ଦର ଚାଚା କେବଳ ଗୋଟିଏ ଆତଙ୍କବାଦୀ ସଂଗଠନ ପର୍ଯ୍ୟନ୍ତ ସୀମିତ ନଥିଲା। ସେ ପ୍ରାୟ ପ୍ରତ୍ୟେକ ଆତଙ୍କବାଦୀ ସଂଗଠନକୁ ଅନୁପ୍ରବେଶ ଯୋଜନା ଏବଂ କାର୍ଯ୍ୟକାରୀ କରିବାରେ ସାହାଯ୍ୟ କରିଥିଲେ। ଏହି କାରଣରୁ ଆତଙ୍କବାଦୀମାନେ ତାଙ୍କୁ ‘ହ୍ୟୁମାନ GPS’ ବୋଲି ଡାକୁଥିଲେ। ତାକୁ ଧରିବା ପାଇଁ ଗତ ୪ ମାସ ଧରି ଜାଲ ବିଝାଇଥିଲା ସେନା।
ଗୁରୁବାର ଜମ୍ମୁ ଓ କାଶ୍ମୀରର ବାନ୍ଦିପୋରା ଜିଲ୍ଲାର ଗୁରେଜ ସେକ୍ଟରରେ ନିୟନ୍ତ୍ରଣ ରେଖା ପାର କରି ଅନୁପ୍ରବେଶ କରିବାକୁ ଚେଷ୍ଟା କରୁଥିବା ଦୁଇ ଆତଙ୍କବାଦୀଙ୍କୁ ଭାରତୀୟ ସେନା ଗୁଳି କରି ହତ୍ୟା କରିବାର ଦୁଇ ଦିନ ପରେ ଏହି ଏନକାଉଣ୍ଟର ହୋଇଥିଲା। ନୌଶେରା ନାର ନିକଟରେ ଏହି ଅପରେସନ ହୋଇଥିଲା। ଏନକାଉଣ୍ଟରରେ ସମନ୍ଦର ଚାଚା ଏବଂ ତାଙ୍କ ସହିତ ଥିବା ଅନ୍ୟ ଜଣେ ଆତଙ୍କବାଦୀ ନିହତ ହୋଇଛି ।