ଭିଜିଲାନ୍ସ ଜାଲରେ ଫସିଲେ କେନ୍ଦ୍ରାପଡା ଜିଲ୍ଲାର ଆଳି ବ୍ଲକ୍ ମହୁ ପ୍ରାଥମିକ କୃଷି ସମବାୟ ସମିତିର ସମ୍ପାଦକ ଧୀରେନ୍ଦ୍ର ମହାନ୍ତି
କେନ୍ଦ୍ରାପଡା:- ଭିଜିଲାନ୍ସ ଜାଲରେ ଫସିଲେ କେନ୍ଦ୍ରାପଡା ଜିଲ୍ଲାର ଆଳି ବ୍ଲକ୍ ମହୁ ପ୍ରାଥମିକ କୃଷି ସମବାୟ ସମିତିର ସମ୍ପାଦକ ଧୀରେନ୍ଦ୍ର ମହାନ୍ତି । ଆଜି ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡି ଗିରଫ ହୋଇଛନ୍ତି । ମହୁ ସମବାୟ ସମିତିରୁ ଖରିଫ୍ ଋଣ କରାଇଦେବା ପାଇଁ ଜଣେ ଚାଷୀଙ୍କ ଠାରୁ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଟିମ୍ ତାଙ୍କୁ ମାଡି ବସିଥିଲା । କୃଷି ଋଣ ପାଇଁ ୧୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ମାଡି ବସିଲା ଭିଜିଲାନ୍ସ । ମହୁ ଅଞ୍ଚଳର ଚାଷୀ ବୀରେନ୍ଦ୍ର କୁମାର ନାଥ ଓ ତାଙ୍କ ବାପାଙ୍କ ନାଁରେ କୃଷି ଋଣ କରାଇଦେବା ପାଇଁ ଲାଞ୍ଚ ନେଉଥିଲେ ଧୀରେନ୍ଦ୍ର । କେନ୍ଦ୍ରାପଡା ଓ କଟକ ଭିଜିଲାନ୍ସ ବିଭାଗର ସାତ ଜଣିଆ ଟିମ୍ ଏହି ଚଢାଉ କରିଥିଲେ ।
ଅଭିଯୋଗ ଅନୁଯାୟୀ, ଆଳି ମହୁ ସେବା ସମବାୟ ସମିତିରେ ଦୀର୍ଘଦିନ ଧରି ଏଭଳି ଦୁର୍ନୀତି ହୋଇ ଆସୁଥିବା ବେଳେ ସ୍ଥାନୀୟ ଚାଷୀ ବୀରେନ୍ଦ୍ର କୁମାର ନାଥ ଗତ କିଛି ଦିନ ତଳେ ତାଙ୍କ ନାଁରେ ଓ ତାଙ୍କ ବାପାଙ୍କ ନାଁରେ ୭୫ ହଜାର ଟଙ୍କା ଲେଖାଏଁ କୃଷି ଋଣ କରାଇଦେବା ପାଇଁ ସମବାୟ ସମିତିରେ ଆବେଦନ କରିଥିଲେ । ଏହି କୃଷି ଋଣ କରାଇଦେବା ପାଇଁ ଏହି ସମିତିର ସମ୍ପାଦକ ଧୀରେନ୍ଦ୍ର ମହାନ୍ତି ତାଙ୍କୁ ୨୦ ହଜାର ଟଙ୍କା ଲାଞ୍ଚ ମାଗିଥିଲେ ।