ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବଡ଼ ଦାବି କରିଛନ୍ତି। ସେ କହିଛନ୍ତି ଯେ ମୁଁ ପ୍ରଧାନମନ୍ତ୍ରୀ ମୋଦିଙ୍କୁ ପାକିସ୍ତାନ ସହିତ ଯୁଦ୍ଧ ସମାପ୍ତ କରିବାକୁ ୨୪ ଘଣ୍ଟା ସମୟ ଦେଇଥିଲି, କିନ୍ତୁ ସେ ମାତ୍ର ୫ ଘଣ୍ଟା ମଧ୍ୟରେ ଯୁଦ୍ଧ ବନ୍ଦ କରିଦେଇଥିଲେ । ଟ୍ରମ୍ପଙ୍କ ବୟାନ ଉପରେ କଂଗ୍ରେସ ସାଂସଦ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦିଙ୍କୁ କୋଣଠେସା କରିଛନ୍ତି।
ବିହାରର ମୁଜାଫରପୁରରେ ଏକ ରାଲିକୁ ସମ୍ବୋଧିତ କରିବା ସମୟରେ ରାହୁଲ ଗାନ୍ଧୀ କହିଛନ୍ତି, ଟ୍ରମ୍ପ କହିଥିଲେ ଯେ ଯେତେବେଳେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ଚାଲିଥିଲା, ମୁଁ ପ୍ରଧାନମନ୍ତ୍ରୀ ମୋଦିଙ୍କୁ କହିଥିଲି ଯେ ୨୪ ଘଣ୍ଟା ମଧ୍ୟରେ ବନ୍ଦ କରନ୍ତୁ ଏବଂ ସେ ୫ ଘଣ୍ଟା ମଧ୍ୟରେ ସବୁକିଛି ବନ୍ଦ କରିଦେଲେ। ମଙ୍ଗଳବାର ଦିନ ସାମ୍ବାଦିକମାନଙ୍କ ସହ କଥାବାର୍ତ୍ତା ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଦାବି କରିଛନ୍ତି ଯେ ସେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧକୁ ପରମାଣୁ ଯୁଦ୍ଧରେ ପରିଣତ ହେବାରୁ ରୋକିଛନ୍ତି ଏବଂ ସେମାନଙ୍କୁ ଧମକ ଦେଇଛନ୍ତି ଯେ ଯଦି ଦୁଇ ପଡ଼ୋଶୀ ଦେଶ ଯୁଦ୍ଧବିରତି ପାଇଁ ରାଜି ନ ହୁଅନ୍ତି, ତେବେ ସେ କୌଣସି ବାଣିଜ୍ୟ ଚୁକ୍ତି କରିବେ ନାହିଁ ଏବଂ ସେମାନଙ୍କ ଉପରେ ଶୁଳ୍କ ଲାଗୁ କରିବେ।
ଭାରତ ନିରନ୍ତର ଭାବରେ କହି ଆସୁଛି ଯେ ପାକିସ୍ତାନ ସହିତ ଶତ୍ରୁତା ବନ୍ଦ କରିବାର ନିଷ୍ପତ୍ତି ଦୁଇ ସେନାର ମହାନିର୍ଦ୍ଦେଶକ (DGMO)ଙ୍କ ମଧ୍ୟରେ ସିଧାସଳଖ ଯୋଗାଯୋଗ ପରେ ନିଆଯାଇଥିଲା। ପ୍ରଧାନମନ୍ତ୍ରୀ ମୋଦି ସଂସଦରେ କହିଛନ୍ତି ଯେ କୌଣସି ଦେଶର କୌଣସି ନେତା ଭାରତକୁ ଅପରେସନ ସିନ୍ଦୂର ବନ୍ଦ କରିବାକୁ କହି ନାହାଁନ୍ତି। ବୈଦେଶିକ ମନ୍ତ୍ରୀ ଏସ. ଜୟଶଙ୍କର ସ୍ପଷ୍ଟ ଭାବରେ କହିଛନ୍ତି ଯେ ଅପରେସନ ସିନ୍ଦୂର ସମୟରେ ପାକିସ୍ତାନ ସହିତ ଯୁଦ୍ଧବିରତିରେ କୌଣସି ତୃତୀୟ ପକ୍ଷର ହସ୍ତକ୍ଷେପ ନଥିଲା।