ବର୍ଷାରେ ଭୁଶୁଡ଼ିଲା ୩ ମହଲା ବିଲ୍ଡିଂ, ବହୁ ଲୋକ ଦବିଥିବା ଆଶଙ୍କା

ଭୀଷଣ ବର୍ଷାରେ ଏକ ୩ ମହଲା ବିଲ୍ଡିଂ ଭୁଶୁଡ଼ି ପଡ଼ିଥିବା ବେଳେ ତଳେ ଅନେକ ଲୋକ ଦବି ରହିଥିବା ଆଶଙ୍କା କରାଯାଉଛି । ଆଜି ସକାଳେ ମହାରାଷ୍ଟ୍ରର ନଭି ମୁମ୍ବାଇରେ ଏକ ବଡ଼ ଦୁର୍ଘଟଣା ଘଟିଛି । ଖବର ପାଇବା ପରେ ପୋଲିସ, ଅଗ୍ନିଶମ ବାହିନୀ ଏବଂ ଏନଡିଆରଏଫ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ  ଜାରି ରଖିଛନ୍ତି । ବିଲ୍ଡିଂର ଭଗ୍ନାବଶେଷ ତଳୁ ୨ ଜଣଙ୍କୁ ଜୀବନ୍ତ ଅବସ୍ଥାରେ ଉଦ୍ଧାର କରାଯାଇଥିବା ବେଳେ ସେମାନଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରାଯାଇଛି। ସେମାନେ ସୁରକ୍ଷିତ ଥିବା ଜଣାପଡ଼ିଛି ।

ନଭି ମୁମ୍ବାଇର ଶାହାବାଜ ଅଞ୍ଚଳରେ ଏହି ଘଟଣା ଘଟିଛି। ମ୍ୟୁନିସିପାଲିଟି କର୍ପୋରେସନ କମିଶନର କୈଲାଶ ସିନ୍ଦେ କହିଛନ୍ତି , ସକାଳ ପ୍ରାୟ ୫ ଟାରେ କୋଠାଟି ଭୁଶୁଡି ପଡିଛି। ଏହା ଏକ ଏ୩ କୋଠା ରହିଥିଲା । ଏହି ଗାଁ ବେଲାପୁର ୱାର୍ଡ ଅଧିନରେ ଆସୁଛି । ବିଲଡିଂରେ ୧୩ଟି ଫ୍ଲାଟ ରହିଥିଲା ।

ଏହି ଅଘଟଣ ପରେ ବହୁ ଲୋକଙ୍କ ପତ୍ତା ମିଳୁ ନ ଥିବା ବେଳେ ସେମାନଙ୍କ ତଲାସୀ ଜାରି ରହିଛି। ଏଥିସହ ଉଦ୍ଧାର ପରେ ଆହତଙ୍କୁ ତୁରନ୍ତ ମେଡିକାଲ ନେବା ନିମନ୍ତେ ଆମ୍ବୁଲାନ୍ସ ପ୍ରସ୍ତୁତ ହୋଇଥିବା ଜଣାଯାଇଛି । ନଭି ମୁମ୍ବାଇ ମ୍ୟୁନିସିପାଲିଟି କର୍ପୋରେସନ କମିଶନର କହିଛନ୍ତି ଯେ ଏହା ମାତ୍ର ୧୦ ବର୍ଷ ପୁରୁଣା କୋଠା ଥିଲା, ତଦନ୍ତ ଚାଲିଛି । ବିଲଡିଂ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।