ମହାରାଷ୍ଟ୍ର: ମହାରାଷ୍ଟ୍ରର ପୁଣେ ଜିଲ୍ଲା ଅନ୍ତର୍ଗତ ବାରାମତୀସ୍ଥିତ ବିଦ୍ୟା ପ୍ରତିଷ୍ଠାନରେ ରାଷ୍ଟ୍ରବାଦୀ କଂଗ୍ରେସ ପାର୍ଟିର (NCP) ପୂର୍ବତନ ମୁଖ୍ୟ ତଥା ବରିଷ୍ଠ ନେତା ଅଜିତ ପାୱାରଙ୍କ ଅନ୍ତିମ ସଂସ୍କାର ପୂର୍ଣ୍ଣ ରାଷ୍ଟ୍ରୀୟ ସମ୍ମାନ ସହ କରାଯାଇଛି। “ଅଜିତ ଦାଦା ଅମର ରହେ” ଧ୍ୱନିରେ ବିଦ୍ୟା ପ୍ରତିଷ୍ଠାନ ପରିସର ଗୁଞ୍ଜିଉଠିଥିଲା। ହଜାର ହଜାର ଶୋକାକୁଳ ଲୋକଙ୍କ ଉପସ୍ଥିତିରେ ଅଜିତ ପାୱାରଙ୍କ ଦୁଇ ପୁଅ ପାର୍ଥ ଓ ଜୟ ମୁଖାଗ୍ନି ଦେଇଥିଲେ। ଅନ୍ତିମ ସଂସ୍କାରରେ ଗୃହମନ୍ତ୍ରୀ ଅମିତ ଶାହ, କେନ୍ଦ୍ର ମନ୍ତ୍ରୀ ନୀତିନ ଗଡକରୀ, ବିଜେପି ଅଧ୍ୟକ୍ଷ ନୀତିନ ନବୀନ, ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ, ଏମଏନଏସ ମୁଖ୍ୟ ରାଜ ଠାକରେ, ଶିବସେନା (UBT) ମୁଖ୍ୟ ଉଦ୍ଧବ ଠାକରେ ସହ ଅନେକ ଜାତୀୟ ଓ ରାଜ୍ୟସ୍ତରୀୟ ନେତା ଉପସ୍ଥିତ ଥିଲେ।
“ଦାଦା” ନାମରେ ପରିଚିତ ୬୬ ବର୍ଷୀୟ ଅଜିତ ପାୱାରଙ୍କ ଅକାଳ ମୃତ୍ୟୁ ମହାରାଷ୍ଟ୍ରର ବିଜେପି-ନେତୃତ୍ୱାଧୀନ ମେଣ୍ଟ ସରକାରରେ ଏକ ବଡ଼ ରାଜନୈତିକ ଶୂନ୍ୟସ୍ଥାନ ସୃଷ୍ଟି କରିଛି। ସେହିସହିତ ତାଙ୍କ ନେତୃତ୍ୱାଧୀନ NCP ଦଳର ଭବିଷ୍ୟତକୁ ନେଇ ମଧ୍ୟ ଅନେକ ପ୍ରଶ୍ନ ଉଠିଛି। ଅଜିତ ପାୱାରଙ୍କ କାକା ଏବଂ NCP ପ୍ରତିଷ୍ଠାତା ଶରଦ ପାୱାର କହିଛନ୍ତି ଯେ, ଏହା ଏକ ଦୁର୍ଘଟଣା ଥିଲା ଏବଂ ଏହାକୁ ରାଜନୀତିକ ରଙ୍ଗ ଦିଆଯିବା ଉଚିତ ନୁହେଁ। ଏହି ମଧ୍ୟରେ, ଦୁର୍ଘଟଣାଗ୍ରସ୍ତ ଚାର୍ଟର୍ଡ ଲିଅରଜେଟ୍ ବିମାନରୁ ଉଦ୍ଧାର ହୋଇଥିବା ବ୍ଲାକ୍ ବାକ୍ସର ବିଶ୍ଳେଷଣ ମାଧ୍ୟମରେ ଦୁର୍ଘଟଣାର ପ୍ରକୃତ କାରଣ ନିର୍ଣ୍ଣୟ କରାଯିବ।
ଭିଏସଆର ଭେଞ୍ଚର୍ସ ପ୍ରାଇଭେଟ୍ ଲିମିଟେଡ୍ ଦ୍ୱାରା ପରିଚାଳିତ ୧୬ ବର୍ଷ ପୁରୁଣା ଏହି ବିମାନଟି ବାରାମତୀ ବିମାନବନ୍ଦରରେ ଦ୍ୱିତୀୟଥର ଅବତରଣ କରିବା ସମୟରେ ଦୁର୍ଘଟଣାଗ୍ରସ୍ତ ହୋଇଥିବା ସୂଚନା ମିଳିଛି। ଛଅଥର ଉପ-ମୁଖ୍ୟମନ୍ତ୍ରୀ ଥିବା ଅଜିତ ପାୱାର ତାଙ୍କ ପତ୍ନୀ ସୁନେତ୍ରା, ଦୁଇ ପୁଅ ଜୟ ଓ ପାର୍ଥ ସହ ଏକ ବଡ଼ ପରିବାରକୁ ଛାଡ଼ି ଯାଇଛନ୍ତି। ମୁଖ୍ୟମନ୍ତ୍ରୀ ହେବା ସ୍ୱପ୍ନ ସ୍ୱପ୍ନରେ ହିଁ ରହିଗଲେ ମଧ୍ୟ, ତାଙ୍କ ମୃତ୍ୟୁ ମହାରାଷ୍ଟ୍ର ସହ ସାରା ଦେଶର ରାଜନୀତିରେ ଏକ ଗଭୀର ଶୂନ୍ୟସ୍ଥାନ ସୃଷ୍ଟି କରିଛି।