ଲକ୍ଷ୍ମୀପୁର:- ଲକ୍ଷ୍ମୀପୁର ସ୍ଥିତ ପୂର୍ତ୍ତ ବିଭାଗ ବଙ୍ଗଳା ଠାରେ ଆଜି ପୂର୍ବତନ ସମିତି ସଭ୍ୟ ରାଜେଶ ଜାନୀଙ୍କ ନେତୃତ୍ୱରେ ଖଣି ପରିପାର୍ଶ୍ଵିକ ଅଞ୍ଚଳବାସୀଙ୍କ ସ୍ୱାର୍ଥକୁ ନେଇ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଥିଲା । ଏଠାରେ ଅନେକ ନେତା ଖଣିକୁ ନେଇ ରାଜନୀତି କରୁଛନ୍ତି ଏବଂ ତାଙ୍କ ସ୍ଵାର୍ଥ ପୂରଣ ହେଲେ ଖଣି ଟେକି ଦେଉଛନ୍ତି, ଯଦି କିଛି ସ୍ଵାର୍ଥ ପୂରଣ ନହେଲେ ବିରୋଧ ଆରମ୍ଭ କରୁଛନ୍ତି । ଅଞ୍ଚଳର ସାଧାରଣ ଜନତାଙ୍କୁ ଢାଲ କରି ଅଞ୍ଚଳର ବିକାଶ କରିବା ପରିବର୍ତ୍ତେ ନେତାଙ୍କ ବିକାଶ ହେଉଥିବାରୁ ଅଂଚଳବାସୀଙ୍କୁ ନିରାଶ ହେବାକୁ ପଡୁଛି । ତେଣୁ ଦୀର୍ଘ ୨୦୧୮ ମସିହାରୁ କଡ଼ିଙ୍ଗା ମାଳି ବକ୍ସାଇଟ ଖଣି ୩ ମିଲିୟନ ଟନ ଖନନ ହୋଇ ବେଦାନ୍ତ କମ୍ପାନୀକୁ କଞ୍ଚା ମାଲ ରପ୍ତାନି ହେଉଥିବାରୁ ନେତା ମାନେ ଅଞ୍ଚଳର ଲୋକଙ୍କୁ ଢାଳ କରି ମାଲାମାଲ ହେଉଥିବା ଦେଖି ଏବେ ଲକ୍ଷ୍ମୀପୁର ବିକାଶ ପରିଷଦ ଜନ୍ମ ନେଇଛି । ବୈଠକରେ ବକ୍ସାଇଟ ଖଣି ଉତ୍ପାଦନ ୩ ମିଲିୟନରୁ ୬ ମିଲିୟନ କୁ ବୃଦ୍ଧି କରି ଅଞ୍ଚଳର ବିକାଶ କିପରି ହୋଇ ପାରିବ ସେନେଇ ଆଲୋଚନା କରାଯାଇଥିଲା । ଏହି ବୈଠକରେ ନୂତନ ଭାବେ ରାଧେଶ୍ୟାମ ଜାନୀ ସଭାପତି, ଦେବ କୁମାର ଖରା ଉପ ସଭାପତି, ଚନ୍ଦ୍ରସେନ ଖରା ଯୁଗ୍ମ ସମ୍ପାଦକ ଏବଂ ମନୋଜ ସାହୁଙ୍କୁ ସାଙ୍ଗଠନିକ ସମ୍ପାଦକ ସର୍ବ ସହମତି କ୍ରମେ ବଛା ଯାଇଥିଲା । ଆଗାମୀ ଦିନରେ ଖଣି ଖନନର ଉତ୍ପାଦନ କ୍ଷମତା ବୃଦ୍ଧିକୁ ନେଇ ଲକ୍ଷ୍ମୀପୁର ଆଞ୍ଚଳିକ ପାରିପାର୍ଶ୍ୱିକ ବିକାଶ ପରିଷଦ ହଜାର ହଜାର ଲୋକଙ୍କୁ ନେଇ ରାଜରାସ୍ତାକୁ ଓହ୍ଲାଇ ଦାବି କରିବ ବୋଲି ଚେତାବନୀ ଦେଇଛି ।
