ରିପୋର୍ଟର୍ସ ଟୁଡେ ବ୍ୟୁରୋ ; ଭାରତରେ ପୁଣିଥରେ ମୁଣ୍ଡ ଟେକିଛି କୋରନା । ଏହି ଭାଇରସ ଏବେ ଦ୍ରୁତ ଗତିରେ ବ୍ୟାପିବା ଆରମ୍ଭ କରିଛି। କିଛି ବର୍ଷର ଶାନ୍ତ ରହିବା ପରେ , ଭାରତୀୟ ସହରଗୁଡ଼ିକରେ ଧୀରେ ଧୀରେ କରୋନା ଭାଇରସ୍ ଫେରିଛି । ଦିଲ୍ଲୀ, ମହାରାଷ୍ଟ୍ର, କେରଳ, କର୍ଣ୍ଣାଟକ, ତାମିଲନାଡୁ ଏବଂ ଆନ୍ଧ୍ରପ୍ରଦେଶ ଭଳି ରାଜ୍ୟରେ କୋଭିଡ୍-୧୯ ମାମଲା ହଠାତ୍ ବୃଦ୍ଧି ପାଇଛି। ଏହାରି ମଧ୍ୟରେ ଆଜି କୋଭିଡ ଆକ୍ରାନ୍ତଙ୍କ ସଂଖ୍ୟା ୧୦୦୦ ପାର କରିଛି । ଏଥିସହିତ ଏହି ସବୁ ରାଜ୍ୟରେ ଡାକ୍ତରଖାନାଗୁଡ଼ିକୁ ସତର୍କ ରଖାଯାଇଛି। ଏହାକୁ ନେଇ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସୂଚନା ଦେଇଛି । ହସ୍ପିଟାଲଗୁଡ଼ିକୁ ଆଇସିୟୁ ବେଡ୍, ଅକ୍ସିଜେନ୍ ଯୋଗାଣ ଏବଂ ଅନ୍ୟାନ୍ୟ ଆବଶ୍ୟକୀୟ ଉପକରଣ ସହିତ ସମ୍ପୂର୍ଣ୍ଣ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି।
ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ସଦ୍ୟତମ ତଥ୍ୟ ଅନୁଯାୟୀ, ଭାରତରେ ବର୍ତ୍ତମାନ ମୋଟ ୧୦୦୯ ଜଣ ଆକ୍ରାନ୍ତଙ୍କ ସଂଖ୍ୟା ଚିହ୍ନଟ କରାଯାଇଛି । କରୋନା ଏବେ ବି ସମ୍ପୂର୍ଣ୍ଣ ସମାପ୍ତ ହୋଇନାହିଁ। ଏହାକୁ ଏଡାଇବା ପାଇଁ, ଲୋକଙ୍କୁ ସତର୍କ ରହିବାକୁ ପଡିବ। ଦିଲ୍ଲୀରେ କରୋନା ମାମଲା ସବୁଠାରୁ ଆଶ୍ଚର୍ଯ୍ୟଜନକ ହୋଇଛି। ଏଠାରେ କରୋନା ଭାଇରସର ୧୦୦ ରୁ ଅଧିକ ମାମଲା ରିପୋର୍ଟ ହୋଇଛି। କେରଳ ବର୍ତ୍ତମାନ ସର୍ବାଧିକ କରୋନା ପ୍ରଭାବିତ ରାଜ୍ୟ ରହିଛି। କେରଳରେ ୪୩୦ ଜଣ ସକ୍ରିୟ କରୋନା ମାମଲା ପଞ୍ଜିକୃତ ହୋଇଛି। ଏହା ପରେ, ମହାରାଷ୍ଟ୍ରରେ 209, ଦିଲ୍ଲୀରେ 104 ଏବଂ କର୍ଣ୍ଣାଟକରେ 47 ସକ୍ରିୟ ମାମଲା ରହିଛି। ଏହି ରାଜ୍ୟଗୁଡ଼ିକରେ ସ୍ୱାସ୍ଥ୍ୟ ବିଭାଗ ଦ୍ୱାରା ତଦାରଖ ଏବଂ ଚିକିତ୍ସା ପ୍ରକ୍ରିୟା ଜାରି ରହିଛି।