ନାଗପୁର : ଦେଶରେ ଘଟୁଥିବା ପାଶବିକ ଅପରାଧକୁ ରୋକିବା ନିମନ୍ତେ ବିଦ୍ୟାର୍ଥୀଙ୍କୁ ସଂସ୍କୃତ ଶ୍ଳୋକ ଶିକ୍ଷା ଦେବାକୁ ପଡିବ ବୋଲି ମହାରାଷ୍ଟ୍ରର ରାଜ୍ୟପାଳ ଭଗତ ସିଂହ କୋଶିୟାରି ନାଗପୁର ବିଶ୍ୱବିଦ୍ୟାଳୟର ଏକ ଉତ୍ସବରେ ମତବ୍ୟକ୍ତ କରିଛନ୍ତି।
ନାଗପୁର ବିଶ୍ୱବିଦ୍ୟାଳୟର ଜମନାଲାଲ୍ ବଜାଜ ପ୍ରଶାସନିକ ଭବନ ଉଦଘାଟନ ଅବସରରେ ଉଦବୋଧନ ଦେଇ କୋଶିୟାରି ନାରୀମାନଙ୍କ ପ୍ରତି ହେଉଥିବା ଅପରାଧର ପ୍ରତିରୋଧ ବିଷୟରେ ଉଲ୍ଲେଖ କରିବା ସହ ଭଲ ଓ ମନ୍ଦ ଲୋକଙ୍କ ମଧ୍ୟରେ ଥିବା ଫରକ, ସେମାନେ କିପରି ଜ୍ଞାନ, କ୍ଷମତା ଓ ଅର୍ଥର ସଦ୍ବ୍ୟବହାର ବା ଅପବ୍ୟବହାର କରନ୍ତି ତାହା ବୁଝାଇଥିଲେ।
ଉଦଘାଟନୀ ଉତ୍ସବରେ ଉପସ୍ଥିତ ଥିବା ବଜାଜ ଇଲେକ୍ଟ୍ରିକାଲ୍ସ୍ର ପରିଚାଳନା ନିର୍ଦେଶକ ଶେଖର ବଜାଜଙ୍କୁ ସମ୍ବୋଧନ କରି କୋଶିୟାରି କହିଥିଲେ ଯେ, ସମୟ ଥିଲା ଘରେ ‘କନ୍ୟା ପୂଜନ’ ହେଉଥିଲା। ଆପଣ ମଧ୍ୟ ଧାର୍ମିକ ପରିବାରର, ନିଶ୍ଚୟ କନ୍ୟାପୂଜା କରୁଥିବେ। କିନ୍ତୁ, ଏବେ ଏ ଦେଶରେ କ’ଣ ଚାଲିଛି। ମନ୍ଦବୁଦ୍ଧିଧାରୀ କିଛି ବ୍ୟକ୍ତି ନାରୀମାନଙ୍କ ସହ ଦୁଷ୍କର୍ମ କରି ସେମାନଙ୍କୁ ହତ୍ୟା କରୁଛନ୍ତି। କ୍ଷମତାର ଅର୍ଥ ଅପବ୍ୟବହାର ନା ସୁରକ୍ଷା? ସୁତରାଂ, ଏଭଳି ଘଟଣା ନ ଘଟିବାକୁ ଶିକ୍ଷାର୍ଥୀମାନଙ୍କୁ ସଂସ୍କୃତ ଶ୍ଳୋକ ଶିଖାଇବା ଉଚିତ।