ରିପୋଟର୍ସ ଟୁଡେ ବ୍ୟୁରୋ: ଆସିଲା ଆଇସିସି ଟେଷ୍ଟ ରାଙ୍କିଙ୍ଗର ତାଜା ରିପୋର୍ଟ । ଆସେସ୍ ସିରିଜର ତୃତୀୟ ମ୍ୟାଚ୍ ଶେଷ ହେବା ପରେ ଆଇସିସି ଏହି ତାଜା ରାଙ୍କିଙ୍ଗ ପ୍ରକାଶ କରିଛି । ତେବେ ଆଇସିସି ଟେଷ୍ଟ ରାଙ୍କିଙ୍ଗରେ ଟପ-୫ ତାଲିକାରେ ବଡ ଧରଣର ଅଦଳବଦଳ ଦେଖିବାକୁ ମିଳିଛି । ଅଷ୍ଟ୍ରେଲିଆ ବ୍ୟାଟ୍ସମ୍ୟାନ୍ ଟ୍ରାଭିସ୍ ହେଡ୍ ନିଜ ଦଳର ଖେଳାଳି ଷ୍ଟିଭ୍ ସ୍ମିଥ୍ ଏବଂ ମାର୍ନସ ଲାବୁସେନଙ୍କୁ ପଛରେ ପକାଇ ଟେଷ୍ଟ ରାଙ୍କିଙ୍ଗର ଦ୍ୱିତୀୟ ସ୍ଥାନକୁ ଉଠିଛନ୍ତି । ଯାହାକି ତାଙ୍କ କ୍ୟାରିୟରର ଶ୍ରେଷ୍ଠ ରାଙ୍କିଙ୍ଗ ।
ଅନ୍ୟପଟେ ଆଇସିସି ଟେଷ୍ଟ ରାଙ୍କିଙ୍ଗରେ କେନ୍ ୱିଲିୟମସନ୍ ନମ୍ବର ଏକ ପୋଜିସନରେ ଥିବାବେଳେ, ଟ୍ରାଭିସ୍ ହେଡ୍ ଦ୍ୱିତୀୟ ଏବଂ ପାକିସ୍ତାନ ଅଧିନାୟକ ବାବର ଆଜମ୍ ୩ୟ ସ୍ଥାନରେ ରହିଛନ୍ତି । ଏହା ପଛକୁ ଦୁଇ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ୍ ଷ୍ଟିଭ୍ ସ୍ମିଥ୍ ଏବଂ ମାର୍ନସ ଲାବୁସେନ୍ ଯଥାକ୍ରମେ ଚତୁର୍ଥ ଏବଂ ପଞ୍ଚମ ସ୍ଥାନରେ ରହିଛନ୍ତି । ନୂଆ ତାଲିକାରେ ଟ୍ରାଭିସ୍ ହେଡ୍ ଦୁଇଟି ସ୍ଥାନ ଉପରକୁ ଉଠିଥିବାବେଳେ, ବାବର ଆଜମ ୩ଟି ସ୍ଥାନ ଉପରକୁ ଉଠିଛନ୍ତି । ହେଲେ ଦୁଇ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ୍ ସ୍ମିଥ୍ ଏବଂ ଲାବୁସେନ୍ ଦୁଇଟି ଲେଖାଏଁ ସ୍ଥାନ ତଳକୁ ଖସିଛନ୍ତି ।
ସେପଟେ ଟେଷ୍ଟ ବୋଲିଂ ଏବଂ ଅଲରାଉଣ୍ଡର ତାଲିକାର ନମ୍ବର ଏକ ସ୍ଥାନରେ ଦୁଇ ଭାରତୀୟ ଖେଳାଳି ରହିଛନ୍ତି । ବୋଲିଂରେ ରବିଚନ୍ଦ୍ରନ ଅଶ୍ୱିନୀ ଏକ ନମ୍ବର ସ୍ଥାନରେ ରହିଥିବାବେଳେ, ଅଲରାଉଣ୍ଡରରେ ରବୀନ୍ଦ୍ର ଜାଡେଜା ଏକ ନମ୍ବର ସ୍ଥାନରେ ରହିଛନ୍ତି । ତାଙ୍କ ବ୍ୟତୀତ ଜସପ୍ରୀତ ବୁମରା ଏବଂ ଜାଡେଜା ବୋଲିଂ ତାଲିକାର ଟପ-୧୦ ଭିତରେ ଥିବାବେଳେ, ଅଲରାଉଣ୍ଡର ତାଲିକାର ଟପ-୧୦ ଭିତରେ ଜାଡେଜାଙ୍କ ସହିତ ଅଶ୍ୱିନୀ, ଅକ୍ଷର ପଟେଲ ରହିଛନ୍ତି ।