ଉତ୍ତରପ୍ରଦେଶ : ପାକିସ୍ତାନୀ ମହିଳା ସୀମା ହାଇଦର ଏବଂ ସଚିନଙ୍କ ପ୍ରେମ କାହାଣୀରେ ମିଳିଛି ଗୁଇନ୍ଦା ଖିଅ । ଏହାକୁ ନେଇ ଉତ୍ତର ପ୍ରଦେଶର ଆତଙ୍କବାଦୀ ନିରୋଧୀ ସ୍କ୍ୱାଡ ବା ଏଟିଏସ୍ ନୋଏଡା ସ୍ଥିତ ସଚିନଙ୍କ ଘରକୁ ଯାଇ ସୀମାଙ୍କୁ ଗିରଫ କରିଛି । ଏଟିଏସ୍ ସୀମାଙ୍କ ସହ ୪ ପିଲା ଓ ସଚିନଙ୍କୁ ନିଜ ହେପାଜତକୁ ନେଇଛିି । ଏପରିକି ସଚିନଙ୍କ ବାପାଙ୍କୁ ମଧ୍ୟ ଉଠାଇନେଇଛି ଏଟିଏସ୍ । ସେମାନଙ୍କୁ ଗୋପନ ସ୍ଥାନରେ ରଖାଯାଇଛି । ସୀମାଙ୍କୁ ଘନଘନ ଜେରା କରାଯାଉଛି ।
ଜେରା ବେଳେ ଏଟିଏସ୍କୁ ମିଳିଛି ବଡ ସୁରାଗ । ସଚିନଙ୍କ ପୂର୍ବରୁ ସୀମା ଦିଲ୍ଲୀର ଏକାଧିକ ଯୁବକଙ୍କ ସହ ସମ୍ପର୍କରେ ଥିଲା । ଏକଥା ନିଜେ ସୀମା ହାଇଦର ସ୍ୱୀକାର କରିଥିବା ଜଣା ପଡିଛି । ତାଙ୍କ ପାଖରେ ୪ଟି ଫୋନ ଥିବା ବେଳେ ସେଥିରୁ ଅନେକ ଡାଟା ଡିଲିଟ ହୋଇଯାଇଛି । ଏଥିସହ ସୀମାଙ୍କ ଭାଇ ଓ ଦାଦା ପାକିସ୍ତାନୀ ସେନାରେ କାର୍ଯ୍ୟ କରୁଥିବା ଜଣା ପଡିଛି । କିନ୍ତୁ ଏହା ପୂର୍ବରୁ ଜେରା ବେଳେ ତାଙ୍କ ଭାଇ ସେନାରେ ନାହାନ୍ତି ବରଂ ଭର୍ତ୍ତି ହେବାକୁ ପ୍ରସ୍ତୁତ ହେଉଛନ୍ତି ବୋଲି କହିଥିଲେ ସୀମା ହାଇଦର । ଏଣୁ ଏଟିଏସ୍କୁ ମିଳିଥିବା ତଥ୍ୟ ଏବଂ ସୀମାଙ୍କ ବୟାନ ଭିତରେ ରହୁନି କିଛି ତାଳମେଳ । ଏଣୁ ଅଡୁଆ ବଢିବାରେ ଲାଗିଛି ।
ପାକିସ୍ତାନୀ ସେନା ସହ ତଥା ଦେଶର ଗୁପ୍ତଚର ଏଜେନ୍ସି ଇଣ୍ଟର ସର୍ଭିସେସ ଇଣ୍ଟେଲିଜେନ୍ସ ବା ଆଇଏସଆଇର ଏଜେଣ୍ଟ ବୋଲି ସନ୍ଦେହ କରାଯାଉଥିଲା । କିନ୍ତୁ ପ୍ରମାଣ ନ ମିଳିବାରୁ ଏଜେନ୍ସି ଏହାକୁ ଏଡାଇଥିଲେ । ବର୍ତ୍ତମାନ ଆଇବି ତଥ୍ୟକୁ ଆଧାର କରି ପୁଣି ସକ୍ରିୟ ହୋଇଉଠିଛି ଏଟିଏସ୍ । ଆରମ୍ଭ ହୋଇଛି ଖୋଳତାଡ । କେମିତି ପ୍ରଶ୍ନ କଲେ ସୀମାର ମିଛ ଧରାପଡିବ ସେଥିପ୍ରତି ବିଶେଷ ଧ୍ୟାନ ଦେଉଛନ୍ତି ଏଟିଏସ୍ ଟିମ୍ । ଏଣୁ ବୁଲେଇ ବଙ୍କେଇ ପ୍ରଶ୍ନ ହେଉଛି । ସୋମବାର ଦିନ ଏଟିଏସ୍ ସୀମା ହାଇଦରଙ୍କୁ ଇଂରାଜିର କିଛି ଧାଡ଼ି ପଢ଼ାଇଥିବା ବେଳେ ସୀମା ଖାଲି ଢ଼ିନଥିଲେ, ବରଂ ତାଙ୍କ ଉଚ୍ଚାରଣ ବି ଖୁବ୍ ସ୍ପଷ୍ଟ ଥିଲା। ଯେଉଁଭଳି ଭାବେ ସୀମା ବିନା ଡରି ସମସ୍ତ ପ୍ରଶ୍ନର ଉତ୍ତର ତତକ୍ଷଣାତ୍ ଦେଉଥିଲେ, ସେଥିରେ ଏଟିଏସ୍ ବି ସନ୍ଦେହ ସୃଷ୍ଟି ହୋଇଥିଲା। ଏବେ ଏସଟିଏସ୍ ଏହି କଥାକୁ ନେଇ ଯାଞ୍ଚ କରୁଛି ଯେ, ସୀମାଙ୍କୁ କେହି ପଛରୁ ସମର୍ଥନ ଦେଉନାହିଁ ତ। ଜେରା ସମୟରେ ସୀମାଙ୍କୁ ତାଙ୍କ ବାପଘର ଓ ଶଶୁରଘର ପରିବାରରେ କିଏ କିଏ ସଦସ୍ୟ ଅଛନ୍ତି ସେ ସବୁ କଥା ପଚରା ଯାଇଛି।
ପୂର୍ବରୁ ଜବତ ହୋଇଥିବା ସୀମା ହାଇଦରଙ୍କ ମୋବାଇଲ ତଥ୍ୟକୁ ଫରେନସିକ୍ ଲ୍ୟାବକୁ ପଠାଯାଇଛି । ଡିଲିଟ ହୋଇଥିବା ତଥ୍ୟକୁ କିପରି ରିକଭର କରାଯିବ ବିଶେଷ ଧ୍ୟାନ ଦିଆଯାଉଛି ।କେବଳ ଦିଲ୍ଲୀର ଏକାଧିକ ଯୁବକଙ୍କ ସହ ତାଙ୍କର ସମ୍ପର୍କ ଥିଲା ନାଁ ଆଉହୁରି ଅନେକ ଯୁବକଙ୍କୁ ପ୍ରେମ ଜାଲରେ ଫଶାଇଛି ତାର ମଧ୍ୟ ଖୋଳତାଡ଼ କରୁଛି ଏଟିଏସ୍ । ଏଥିସହ ପାକିସ୍ତାନରୁ ନୋଏଡା ପର୍ଯ୍ୟନ୍ତ ଥିବା ସୀମାଙ୍କ ଯାତ୍ରା ସମ୍ପର୍କରେ ଏଟିଏସ୍ ତଥ୍ୟ ସଂଗ୍ରହ କରୁଛି । ସୀମାର ସମ୍ପୂର୍ଣ୍ଣ ରୁଟ ମ୍ୟାପକୁ ଯାଞ୍ଚ କରାଯାଉଛି । ସେପଟେ ନଏଡାସ୍ଥିତ ରବୁପୁରା ଗ୍ରାମରେ ଥିବା ସଚିନଙ୍କ ବାସଭବନ ବାହାରେ ଜଣେ ଥାନାଧିକାରୀ, ୨ ମହିଳା ଓ ପୁରୁଷ କନେଷ୍ଟବଳ ମୁତୟନ ହୋଇଛନ୍ତି । ଦୁଇଟି ସିପ୍ଟରେ ପୋଲିସ କର୍ମୀ ସେମାନଙ୍କ ଗତିବିଧି ଉପରେ ନଜର ରଖୁଛନ୍ତି । ଏପରିକି ସଚିନଙ୍କ ଘରକୁ ଯିବାକୁ କୌଣସି ଲୋକଙ୍କୁ ଅନୁମତି ଦିଆଯାଉ ନାହିଁ ।