ନୂଆଦିଲ୍ଲୀ: ଫିଲ୍ମ ‘କାଶ୍ମୀର ଫାଇଲ୍ସ’କୁ ନେଇ ଏବେ ସବୁ ସ୍ଥାନରୁ ପ୍ରଶଂସାର ସୁଅ ଛୁଟୁଥିବା ସମୟରେ ସାଧାରଣ ଲୋକଙ୍କ ଠାରୁ ଆରମ୍ଭ କରି ଅନେକ ନେତା ମନ୍ତ୍ରୀ ପର୍ଯ୍ୟନ୍ତ ଏହି ଫିଲ୍ମ ସପକ୍ଷରେ କହୁଥିବା ନଜର ଆସିଛନ୍ତି । ଆଜି ମୁମ୍ବାଇ ଶିବସେନା ଦଳର ନେତା ସଞ୍ଜୟ ରାୱତ ଏହି ଫିଲ୍ମକୁ ନେଇ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ‘କାଶ୍ମୀର ଫାଇଲ୍ସ’ ଚଳଚ୍ଚିତ୍ରକୁ ନେଇ ରାଜନୀତି କରିବା ପରିବର୍ତ୍ତେ ପାକିସ୍ତାନ ଅଧିକୃତ କାଶ୍ମୀର (ପିଓକେ)କୁ ଭାରତ ସହ ମିଶାଇବାକୁ ବିଜେପି ପ୍ରଚେଷ୍ଟା କରିବା ଉଚିତ। ସେ ଆହୁରି ମଧ୍ୟ କହିଛନ୍ତି ଯେ, ଶିବସେନା ଏହାର ପ୍ରତିଷ୍ଠାତା ସ୍ୱର୍ଗତ ବାଲ ଠାକରେଙ୍କ ଜୀବନୀ ଉପରେ ଆଧାରିତ ଫିଲ୍ମକୁ ଟିକସମୁକ୍ତ କରିବା ପାଇଁ କେବେ ମଧ୍ୟ ଦାବି କରିନଥିଲା । କିନ୍ତୁ ବିଜେପି ‘କାଶ୍ମୀର ଫାଇଲ୍ସ’ଫିଲ୍ମକୁ ନେଇ ରାଜନୀତି କରିବା ସହ ଟିକସଛାଡ଼ ପାଇଁ ସବୁ ରାଜ୍ୟକୁ ବାଧ୍ୟ କରୁଛି ।
ସୂଚନା ଅନୁଯାୟୀ, ଶିବସେନାର ରାଜ୍ୟସଭା ସଦସ୍ୟ ସଞ୍ଜୟ ରାୱତ କହିଛନ୍ତି ଯେ, ୨୦୧୯ ମସିହାରେ ବାଲାସାହେବ ଠାକରେଙ୍କ ଜୀବନୀ ଉପରେ ଏକ ଚଳଚ୍ଚିତ୍ର ନିର୍ମାଣ କରିଥିଲୁ। ଏହା ଖୁବ ଭଲ ଚଳଚ୍ଚିତ୍ର ଥିଲା |କିନ୍ତୁ ଏହି ଫିଲ୍ମ ଉପରେ ମନୋରଞ୍ଜନ ଟ୍ୟାକ୍ସ ଛାଡ଼ କରିବାକୁ ଆମେ କେବେ ଦାବି ରଖିନାହୁଁ। ସେ କହିଛନ୍ତି ଯେ ‘କାଶ୍ମୀର ଫାଇଲ୍ସ’କୁ ନେଇ ସାଧାରଣ ଜନତାଙ୍କ ନିକଟରେ ରାଜନୀତି କରିବା ଠିକ୍ କଥା ନୁହେଁ। କାଶ୍ମୀର ଏବଂ କାଶ୍ମୀର ପଣ୍ଡିତଙ୍କ ପ୍ରସଙ୍ଗରେ ଶିବସେନା ତଥା ସ୍ୱର୍ଗତ ବାଲ ଠାକରେଙ୍କ ଭାବନାକୁ ସମଗ୍ର ଦେଶ ଜାଣିଛି। ସେ କହିଛନ୍ତି, ୧୯୮୯ ମସିହାରେ ଜାମ୍ମୁ କାଶ୍ମୀରରେ ହିଂସାକାଣ୍ଡ ପରେ ସ୍ୱର୍ଗତ ବାଲ ଠାକରେ କାଶ୍ମୀର ପଣ୍ଡିତମାନଙ୍କ ସୁରକ୍ଷା ପାଇଁ କେନ୍ଦ୍ର ନିକଟରେ ଦାବି କରିଥିଲେ।
ସେ ଆହୁରି ମଧ୍ୟ କହିଛନ୍ତି ଯେ, ୨୦୧୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ ସେ ପାକିସ୍ତାନ ଅଧିକାର କରିଥିବା ପିଓକେକୁ ଭାରତକୁ ଫେରାଇ ଆଣିବେ । କିନ୍ତୁ ସେଥିପ୍ରତି ଦୃଷ୍ଟି ଦେବା ବଦଳରେ ଫିଲ୍ମକୁ ନେଇ ରାଜନୀତି କରାଯାଉଛି | କାଶ୍ମୀର ପଣ୍ଡିତମାନେ କିଭଳି କାଶ୍ମୀରକୁ ଫେରିବେ ଆପଣ କରିଥିବା ସଂକଳ୍ପକୁ ନେଇ ଆଲୋଚନା କରନ୍ତୁ | ସୂଚନା ଅନୁଯାୟୀ, ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପୱାର କିଛି ଦିନ ତଳେ ‘କାଶ୍ମୀର ଫାଇଲ୍ସ’ ଉପରେ ଟିକସ ଛାଡ ପାଇଁ ବିଜେପିର ଦାବିକୁ ପ୍ରତ୍ୟାଖ୍ୟାନ କରିଥିଲେ। ସେ କହିଥିଲେ ଯେ ଯଦି କେନ୍ଦ୍ର ସରକାର ଏହି ଫିଲ୍ମରେ ଜିଏସଟି ଛାଡ କରନ୍ତି ତେବେ ଏହା ସମଗ୍ର ଦେଶ ପାଇଁ ଲାଭଦାୟକ ହେବ। ୧୯୯୦ ଦଶକରେ ଏହି ଫିଲ୍ମ କାଶ୍ମୀର ଉପତ୍ୟକାରେ କାଶ୍ମୀରୀ ପଣ୍ଡିତଙ୍କ ଉପରେ ହୋଇଥିବା ଅତ୍ୟାଚାର ଘଟଣାକୁ ନେଇ ପର୍ଯ୍ୟବେସିତ।