ନୂଆଦିଲ୍ଲୀ: ଭାରତ ଗସ୍ତରେ ଆସିବେ ରୁଷିଆ ରାଷ୍ଟ୍ରପତି ଭ୍ଲାଦମିର ପୁଟିନ୍ । ଏନେଇ ସୂଚନା ଦେଲେ NSA ଅଜିତ୍ ଡୋଭାଲ୍ । ଚଳିତ ବର୍ଷ ଶେଷ ସୁଦ୍ଧା ପୁଟିନ୍ ଭାରତ ଆସିବା ନେଇ ସୂଚନା ମିଳିଛି । ସେପଟେ ପୁଟିନଙ୍କ ଆଗାମୀ ଗସ୍ତକୁ ନେଇ ଖୁସି ପ୍ରକଟ କଲେ ଡୋଭାଲ୍ । ରୁଷ ପ୍ରତିରକ୍ଷା ମନ୍ତ୍ରୀ ସର୍ଗେଇ ଗୋଇଗୁଙ୍କ ସହ ବୈଠକରେ ଡୋଭାଲ୍ କହିଛନ୍ତି, ‘ଏବେ ଆମ ସମ୍ପର୍କ ଅତି ନିବିଡ଼ ହୋଇଛି, ଯାହାକୁ ଆମେ ବେଶ ଗୁରୁତ୍ୱ ମଧ୍ୟ ଦେଉଛୁ । ଆମ ଦୁଇ ଦେଶ ମଧ୍ୟରେ ଏକ ମଜଭୁତ ସହଭାଗିତା ରହିଛି ଓ ଆମେ ଉଚ୍ଚ ସ୍ତରରେ ଏହା ଉପରେ ଆଲୋଚନା କରୁଛୁ ।’
ଆମେରିକା ସହ ଭାରତର ସମ୍ପର୍କ ଦିନକୁ ଦିନ ଖରାପ ହେଉଥିବା ବେଳେ ଏବେ ରୁଷ୍ ଓ ଭାରତ ମିଶି ରଣନୀତି ତିଆରି କରିବେ ବୋଲି କୁହାଯାଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଲଗାତାର ଭାରତ ଓ ରୁଷ ସମ୍ପର୍କ ଉପରେ ଟିପ୍ପଣୀ ଭିତରେ ଏହି ଯାତ୍ରା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ତେବେ କିଛି ମାସ ପୂର୍ବରୁ ଋଷ୍ ବିଦେଶ ମନ୍ତ୍ରୀ ସର୍ଗେଇେ ଲାଭରୋଭ କହିଥିଲେ ଯେ, ବର୍ତ୍ତମାନ ସମୟରେ ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତ ନେଇ ପ୍ରସ୍ତୁତିରେ ଜାରି ରହିଛି । ହେଲେ ଏହା ପୂର୍ବରୁ ଋଷ୍ରେ ଏକ ସମ୍ମିଳନୀ ଆୟୋଜନ କରାଯାଇଛି । ଋଷ୍ରେ ଥିବା ଭାରତୀୟ ଦୂତାବାସ ଏବଂ ଋଷ୍ ଅନ୍ତରାଷ୍ଟ୍ରୀୟ ମାମଲାର ପରିଷଦ ଦ୍ବାରା ସଂଯୁକ୍ତ ଭାବେ ଏହି ଆୟୋଜନ ହୋଇଛି । ଏଥିରେ ଋଷ୍ ବିଦେଶ ମନ୍ତ୍ରୀ ସ୍ପଷ୍ଟ କରିଥିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିମନ୍ତ୍ରଣକୁ ଭ୍ଲାଦିମିର ପୁଟିନ ସ୍ବିକାର କରିଛନ୍ତି ଏବଂ ଖୁବ୍ ଶୀଘ୍ର ଭାରତ ଗସ୍ତ୍ରରେ ଯିବେ ଋଷ୍ ରାଷ୍ଟ୍ରପତି ।
ରାଷ୍ଟ୍ରପତି ପୁଟିନ ଶେଷ ଥର ପାଇଁ ୨୦୨୧ ଡିସେମ୍ୱର ୦୬ରେ ଭାରତ ଆସିଥିଲେ । ସେତେବେଳେ ସେ କେବଳ ୪ ଘଣ୍ଟା ପାଇଁ ଭାରତ ଆସିଥିଲେ । ପୂର୍ବ ଗସ୍ତ ବେଳେ ଭାରତ ଓ ରୁଷ ମଧ୍ୟରେ ୨୮ ବୁଝାମଣା ସ୍ୱାକ୍ଷର ହୋଇଥିଲା । ଏଥିରେ ମିଲିଟାରୀ ଓ ବୈଷୟିକ ବୁଝାମଣା ସାମିଲ ଥିଲା । ଦୁଇ ଦେଶ ୨୦୫୦ ସୁଦ୍ଧା ୩୦ ବିଲିୟନ ଡଲାର (୨୦ ଲକ୍ଷ ୫୩ ହଜାର କୋଟି ଟଙ୍କା)ର ବାର୍ଷିକ ବାଣିଜ୍ୟ ନେଇ ଟାର୍ଗେଟ୍ ରଖିଥିଲେ ।