ମାଞ୍ଚେଷ୍ଟରରେ ଇଂଲଣ୍ଡ ବିପକ୍ଷରେ ଖେଳାଯାଉଥିବା ଚତୁର୍ଥ ଟେଷ୍ଟ ମ୍ୟାଚ୍ର ପ୍ରଥମ ଦିନରେ ଟିମ୍ ଇଣ୍ଡିଆର ୱିକେଟକିପର ବ୍ୟାଟ୍ସମ୍ୟାନ୍ ରିଷଭ ପନ୍ତ ଆହତ ହୋଇଥିଲେ। ଦ୍ରୁତ ବୋଲର କ୍ରିସ୍ ୱକ୍ସଙ୍କ ଏକ ବଲ୍ ତାଙ୍କ ଜୋତାରେ ବାଜିଥିଲା, ଯାହା ତାଙ୍କ ପାଦର ଆଙ୍ଗୁଠି ଭାଙ୍ଗି ଦେଇଥିଲା। ଏହା ପରେ ସେ ୬ ସପ୍ତାହ ପାଇଁ ଟିମ୍ ଇଣ୍ଡିଆରୁ ବାହାରେ ଥିଲେ। ଏବେ ଖବର ଆସୁଛି ଯେ ରିଷଭ ପନ୍ତ ସେପ୍ଟେମ୍ବର ୯ରୁ ଅନୁଷ୍ଠିତ ହେବାକୁ ଥିବା ଏସିଆ କପ୍ ରୁ ବାଦ୍ ପଡିଛନ୍ତି ।୯ ସେପ୍ଟେମ୍ବରରୁ ୟୁଏଇରେ ଏସିଆ କପ୍ ଆରମ୍ଭ ହେବାକୁ ଯାଉଛି। ଟିମ୍ ଇଣ୍ଡିଆର ୱିକେଟକିପର ବ୍ୟାଟ୍ସମ୍ୟାନ୍ ରିଷଭ ପନ୍ତ ଆଘାତ ଯୋଗୁଁ ଏହି ଟୁର୍ଣ୍ଣାମେଣ୍ଟରୁ ବାଦ୍ ପଡିଛନ୍ତି।
ଏହା ବ୍ୟତୀତ ସେ ଅକ୍ଟୋବରରେ ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ସିରିଜରୁ ମଧ୍ୟ ବାଦ୍ ପଡିପାରନ୍ତି । ଟିମ୍ ଇଣ୍ଡିଆ ଅକ୍ଟୋବର ୨ରୁ ଘରୋଇ ୱେଷ୍ଟଇଣ୍ଡିଜ୍ ବିପକ୍ଷରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳିବ। ଏହି ଟେଷ୍ଟ ସିରିଜରେ ରିଷଭ ପନ୍ତଙ୍କ ଖେଳିବାର ସମ୍ଭାବନା ମଧ୍ୟ ବହୁତ କମ୍ ମନେ ହେଉଛି। କାରଣ ଡାକ୍ତରମାନେ କହିଛନ୍ତି ଯେ ପନ୍ତଙ୍କ ଭାଙ୍ଗିଯାଇଥିବା ଆଙ୍ଗୁଠି ସୁସ୍ଥ ହେବାକୁ ୬ ସପ୍ତାହ ଲାଗିବ। ତଥାପି, ଏଥିପାଇଁ କୌଣସି ଅସ୍ତ୍ରୋପଚାର କରାଯିବ ନାହିଁ। ମାଞ୍ଚେଷ୍ଟରରେ ଆଘାତ ସତ୍ତ୍ୱେ, ପନ୍ତ ବ୍ୟାଟିଂ କରିବାକୁ ଆସିଥିଲେ। ମଞ୍ଚେଷ୍ଟର ଟେଷ୍ଟ ମ୍ୟାଚର ପ୍ରଥମ ଦିନରେ ଆହତ ହୋଇଥିଲେ ପନ୍ତ ।
ଏହା ପରେ ତାଙ୍କୁ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ତାଙ୍କ ଆଙ୍ଗୁଠିରେ ଏକ ଫ୍ରାକ୍ଚର ନିଶ୍ଚିତ ହୋଇଥିଲା। ଏହା ସତ୍ତ୍ୱେ, ଶାର୍ଦ୍ଦୁଳ ଠାକୁର ଆଉଟ୍ ହେବା ପରେ ସେ ମ୍ୟାଚ୍ର ଦ୍ୱିତୀୟ ଦିନରେ ବ୍ୟାଟିଂ କରିବାକୁ ଆସିଥିଲେ ଏବଂ ଏକ ଚମତ୍କାର ଅର୍ଦ୍ଧଶତକ ହାସଲ କରିଥିଲେ। ପନ୍ତ ଇଂଲଣ୍ଡ ବିପକ୍ଷରେ ପାଞ୍ଚଟି ଟେଷ୍ଟ ମ୍ୟାଚ୍ ରେ ଚମତ୍କାର ପ୍ରଦର୍ଶନ କରିଛନ୍ତି। ସେ ୪ଟି ଟେଷ୍ଟ ମ୍ୟାଚ୍ ର ୭ଟି ଇନିଂସରେ ୬୮.୪୨ ହାରରେ ୪୭୯ ରନ୍ କରିଥିଲେ। ଏହି ସମୟରେ ପନ୍ତ ୨ଟି ଶତକ ଏବଂ ୩ଟି ଅର୍ଦ୍ଧଶତକ ହାସଲ କରିଥିଲେ। ଏହି ଟେଷ୍ଟ ସିରିଜରେ ସର୍ବାଧିକ ରନ୍ ସ୍କୋର କରିବାରେ ସେ ଷଷ୍ଠ ସ୍ଥାନରେ ଥିଲେ।
