New Delhi: ଚାଲିଥିବା ଆଇପିଏଲ ୨୦୨୬ ସିଜିନ୍ ଆରମ୍ଭରୁ ହିଁ ରୋମାଞ୍ଚର ସର୍ବୋଚ୍ଚ ସୀମାକୁ ପହଞ୍ଚିଛି। ପ୍ରତ୍ୟେକ ମ୍ୟାଚ୍ରେ ବ୍ୟାଟରମାନେ ବଡ଼ ସ୍କୋର କରୁଥିବାବେଳେ ବୋଲରମାନେ ମଧ୍ୟ ଶେଷ ଓଭର ପର୍ଯ୍ୟନ୍ତ ମ୍ୟାଚ୍କୁ ରୋମାଞ୍ଚକର କରି ରଖୁଛନ୍ତି। ମଙ୍ଗଳବାର ଖେଳାଯାଇଥିବା ଚତୁର୍ଥ ମ୍ୟାଚ୍ରେ ପଞ୍ଜାବ କିଙ୍ଗସ୍ ଓ ଗୁଜରାଟ ଟାଇଟନ୍ସ୍ ମୁହାଁମୁହିଁ ହୋଇଥିଲେ, ଯେଉଁଠାରେ ପଞ୍ଜାବ ରୋମାଞ୍ଚକର ଭାବରେ ବିଜୟ ହାସଲ କରିଛି।
୧୬୩ ରନ୍ର ଟାର୍ଗେଟ୍କୁ ଧାଉଥିବା ପଞ୍ଜାବ ଦଳ ପାଞ୍ଚଟି ବଲ୍ ବାକି ଥାଇ ମ୍ୟାଚ୍ ଜିତି ନେଇଥିଲା। ଆରମ୍ଭରେ ବ୍ୟାଟିଂ ବିପର୍ଯ୍ୟୟ ସତ୍ତ୍ୱେ ଦଳ ଶେଷ ପର୍ଯ୍ୟନ୍ତ ଲଢ଼େଇ ଜାରି ରଖିଥିଲା। ଏହି ମ୍ୟାଚ୍ରେ ବିଜୟର ମୁଖ୍ୟ ନାୟକ ଥିଲେ ଅଷ୍ଟ୍ରେଲିଆର ଯୁବ ଖେଳାଳି କୁପର କୋନୋଲି। ସେ ୪୪ଟି ବଲ୍ରେ ୭୨ ରନ୍ର ଜବରଦସ୍ତ ପାରି ଖେଳିଥିଲେ, ଯେଉଁଥିରେ ୫ଟି ଛକା ଓ ୫ଟି ଚଉକା ରହିଥିଲା। ଏହା ତାଙ୍କର ପଦାର୍ପଣ ମ୍ୟାଚ୍ ଥିଲା ଏବଂ ପ୍ରଥମ ମ୍ୟାଚ୍ରେ ହିଁ ସେ ‘ମ୍ୟାନ୍ ଅଫ୍ ଦି ମ୍ୟାଚ୍’ ହେବାର ସମ୍ମାନ ହାସଲ କରିଛନ୍ତି।
ତେବେ ବିଜୟ ସତ୍ତ୍ୱେ ପଞ୍ଜାବ କ୍ୟାପ୍ଟେନ୍ ଶ୍ରେୟସ ଆୟରଙ୍କୁ ଜରିମାନା ଦେବାକୁ ପଡ଼ିଛି। ଧିମା ଓଭର ରେଟ୍ କାରଣରୁ ତାଙ୍କ ଉପରେ ୧୨ ଲକ୍ଷ ଟଙ୍କାର ଫାଇନ୍ ଲାଗିଛି। ଆଇପିଏଲ ଆଚାର ସଂହିତା ଅନୁସାରେ ନିର୍ଧାରିତ ସମୟ ମଧ୍ୟରେ ଓଭର ସମାପ୍ତ କରିବାରେ ବିଫଳ ହେବାରୁ ଏହି କାର୍ଯ୍ୟନୁଷ୍ଠାନ ନିଆଯାଇଛି। ଯଦି ଏହି ଭୁଲ ପୁନରାବୃତ୍ତି ହୁଏ, ତେବେ ଆଗାମୀରେ ଜରିମାନା ବଢ଼ିପାରେ। ଦ୍ୱିତୀୟ ଥର ଏମିତି ହେଲେ ୨୪ ଲକ୍ଷ ଟଙ୍କା ଫାଇନ୍ ସହିତ ଦଳର ଅନ୍ୟ ସଦସ୍ୟମାନେ ମଧ୍ୟ ଜରିମାନାର ସମ୍ମୁଖୀନ ହେବେ। ତୃତୀୟ ଥର ଏହି ଭୁଲ ହେଲେ ଶ୍ରେୟସ ଆୟରଙ୍କୁ ଗୋଟିଏ ମ୍ୟାଚ୍ ପାଇଁ ବ୍ୟାନ୍ ମଧ୍ୟ କରାଯାଇପାରେ। ସମଗ୍ର ମ୍ୟାଚ୍ଟି ଦର୍ଶକମାନଙ୍କ ପାଇଁ ଏକ ରୋମାଞ୍ଚକର ଅନୁଭବ ହୋଇଥିଲା ଏବଂ ଆଇପିଏଲ ୨୦୨୬ର ଆରମ୍ଭକୁ ଆହୁରି ଆକର୍ଷଣୀୟ କରିଦେଇଛି।