ନୂଆଦିଲ୍ଲୀ: ଭାରତୀୟ ଜନତା ପାର୍ଟିର ସଂସଦୀୟ ଦଳର ବୈଠକ ଦିଲ୍ଲୀରେ ଚାଲିଛି। ଏହି ବୈଠକରେ ବହୁ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା କରାଯାଇଛି | ତେବେ ଏହି ବୈଠକର ଆରମ୍ଭରେ ଦେଖିବାକୁ ମିଳିଛି ଏକ ରୋଚକ ଘଟଣା | ଆମ୍ବେଦକର ଅନ୍ତର୍ଜାତୀୟ କେନ୍ଦ୍ରରେ ଅନୁଷ୍ଠିତ ବୈଠକରେ ଦଳର ନେତାମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସ୍ୱାଗତ କରିବା ସହ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି।
- ‘କାଶ୍ମୀର ଫାଇଲ’ ପରି ଚଳଚ୍ଚିତ୍ର ନିର୍ମାଣ ଜାରି ରଖିବା ଉଚିତ: ପିଏମ ମୋଦୀ
ପୁରା ଦେଶରେ ଏବେ ‘କାଶ୍ମୀର ଫାଇଲ’କୁ ନେଇ ଚର୍ଚ୍ଚା ଜୋରଦାର ଥିବା ସମୟରେ ଏହି ଫିଲ୍ମର ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ ମୋଦି | ମୋଦୀ କହିଛନ୍ତି ଯେ, କାଶ୍ମୀର ଫାଇଲ ପରି ଚଳଚ୍ଚିତ୍ର ନିର୍ମାଣ ଜାରି ରଖିବା ଉଚିତ । ଏହିପରି ଚଳଚ୍ଚିତ୍ରରୁ ସତ୍ୟ ସାମ୍ନାକୁ ଆସିଥାଏ | ଦୀର୍ଘ ଦିନ ଧରି ଲୁଚାଇବାକୁ ଚେଷ୍ଟା କରାଯାଉଥିବା କାଶ୍ମୀର ଘାଟିର ସତ୍ୟକୁ ସାମ୍ନାକୁ ଅଣାଯାଉଛି | ସେଥିପାଇଁ ଯେଉଁମାନେ ସତ୍ୟକୁ ଲୁଚାଇବାକୁ ଚେଷ୍ଟା କରିଥିଲେ ସେମାନେ ଆଜି ଏହାର ବିରୋଧ କରୁଛନ୍ତି।
କିଛି ଦିନ ତଳେ ଫିଲ୍ମର ନିର୍ମାତା ଓ ଏହାର କଳାକାର ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିଥିଲେ । ମାର୍ଚ୍ଚ ୧୧ ତାରିଖରେ ରିଲିଜ୍ ହୋଇଥିଲା । ବହୁପ୍ରତୀକ୍ଷିତ ‘ଦି କଶ୍ମୀର ଫାଇଲ୍ସ’ । କଶ୍ମୀର ପଣ୍ଡିତଙ୍କ ଉପରେ ହୋଇଥିବା ଅତ୍ୟାଚାରର କଥା ବଖାଣିଛି ଏହି ଫିଲ୍ମ । ଫିଲ୍ମରେ ମୁଖ୍ୟ ଭୂମିକାରେ ଭେଟେରାନ୍ ଅଭିନେତା ମିଥୁନ ଚକ୍ରବର୍ତୀ, ଅନୁପମ ଖେର୍, ପଲ୍ଲବୀ ଯୋଶୀ ଓ ଦର୍ଶନ କୁମାର ରହିଛନ୍ତି । ବିବେକ ଅଗ୍ନିହୋତ୍ରୀ ଫିଲ୍ମର ନିର୍ଦ୍ଦେଶନା ଦେଇଛନ୍ତି ।
- ବଂଶବାଦ ଗଣତନ୍ତ୍ର ପାଇଁ ବିପଦ: ପ୍ରଧାନମନ୍ତ୍ରୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଜେପି ସଂସଦୀୟ ଦଳ ବୈଠକରେ କହିଛନ୍ତି ଯେ, ବଂଶବାଦ ଗଣତନ୍ତ୍ର ପାଇଁ ବଡ଼ ବିପଦ, ଆମକୁ ଏହା ବିରୋଧରେ ଲଢ଼ିବାକୁ ହେବ। ସେ ଆହୁରି ମଧ୍ୟ କହିଛନ୍ତି, ‘ଯଦି ଆମେ ପାରିବାରିକତା ବିରୋଧରେ ଅନ୍ୟ ଦଳ ବିରୋଧରେ ସଙ୍ଘର୍ଷ କରୁଛୁ, ତେବେ ଏହାକୁ ନେଇ ମଧ୍ୟ ଆମେ ଆମ ଦଳ ପ୍ରତି ଯତ୍ନବାନ ହେବା ଉଚିତ୍ |ଏହି ନିର୍ବାଚନରେ ଯଦି ସାଂସଦଙ୍କ ପୁଅମାନେ ଟିକେଟ୍ ନ ପାଆନ୍ତି, ତେବେ ମୁଁ ଏଥିପାଇଁ ଦାୟୀ ଅଟେ | ଯଦି ଏହା ଏକ ପାପ ତେବେ ମୁଁ ଏହା କରିସାରିଛି | ମୁଁ ଆପଣ ମାନଙ୍କୁ ଧନ୍ୟବାଦ ଦେଉଛି ଯେ ଏହା ସତ୍ୱେ ମଧ୍ୟ ଆପଣମାନେ ଆମ ସହିତ ଅଛନ୍ତି |
- ଏହିପରି ଚାଲିଥିଲା ସଂସଦୀୟ ବୈଠକ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଜେପି ସଂସଦୀୟ ଦଳ ବୈଠକରେ ପହଞ୍ଚିବା ମାତ୍ରେ ବିଜେପି ରାଷ୍ଟ୍ରୀୟ ସଭାପତି ଜେପି ନାଡାଙ୍କ ନେତୃତ୍ୱରେ ସାଂସଦମାନଙ୍କୁ ଚାରିଟି ରାଜ୍ୟରେ ବିଜୟ ପାଇଁ କରତାଳି ଦେଇ ସ୍ୱାଗତ କରାଯାଇଥିଲା। ଏହା ପରେ ସଂସଦୀୟ ଦଳ ବୈଠକରେ ୟୁକ୍ରେନରେ ନିହତ ହୋଇଥିବା ଭାରତୀୟ ଛାତ୍ର, କର୍ଣ୍ଣାଟକର ବଜରଙ୍ଗ ଦଳ କାର୍ଯ୍ୟକର୍ତ୍ତା ହର୍ଷ ଏବଂ କୋକିଳ କଣ୍ଠୀ ଲତା ମଙ୍ଗେଶକରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବା ପାଇଁ ସଂସଦୀୟ ଦଳ ବୈଠକରେ ଦୁଇ ମିନିଟର ନିରବତା ଅବଲମ୍ବନ କରାଯାଇଥିଲା।