କେନ୍ଦ୍ରାପଡ଼ା: ପଟ୍ଟାମୁଣ୍ଡାଇରେ ଜିଅନ୍ତା ଜଳି ଯୁବତୀଙ୍କ ମୃତ୍ୟୁ ଘଟଣା । କେନ୍ଦ୍ରାପଡ଼ା ଏସ୍ପି ସିଦ୍ଧାର୍ଥ କଟାରିଆଙ୍କ ଗୁରୁତ୍ୱପୂର୍ଣ୍ଣ ସୂଚନା । ପୁରୁଷ ବନ୍ଧୁଙ୍କ ନାଁରେ ଏତଲା ଦେଲେ ଯୁବତୀଙ୍କ ବାପା । ମାନସିକ ନିର୍ଯାତନାରୁ ଯୁବତୀଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ ହୋଇଛି । ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ତଦନ୍ତ ଆଗକୁ ବଢିବ ବୋଲି କହିଛନ୍ତି ଏସ୍ପି ସିଦ୍ଧାର୍ଥ କଟାରିଆ । ଘଟଣାର ୪ ଦିନ ପରେ ଗତକାଲି ଗ୍ରାମାଞ୍ଚଳ ଥାନାରେ ଏତଲା ଦେଇଥିଲେ ଯୁବତୀଙ୍କ ବାପା । ପୀଡିତା ବାପାଙ୍କ ଏତେଲା ଆଧାରରେ ମାମଲା ରୁଜୁ କଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ପୋଲିସ । କେଶ୍ ନମ୍ବର ୨୮୪ରେ ମାମଲା ୠଜୁକରି ଭାରତୀୟ ନ୍ୟାୟ ସଂହିତା ପୁରୁଷ ବନ୍ଧୁ ପ୍ରମୋଦ ବେହେରା ଙ୍କ ଉପରେ ୨୯୬,୭୫,୭୮,୧୦୮,୬୬ (ଇ), ୬୭ (ଏ) ପରି ସଙ୍ଗିନ ଦଫା ଲଗାଯାଇଛି । ସେପଟେ ମୃତ ଯୁବତୀ ପଡୋଶୀ ଘରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିଛି ପୋଲିସ । ତେବେ ମୃତ୍ୟୁର ୪ ଦିନ ପରେ ମଧ୍ୟ ପୋଲିସ ଘଟଣାର ରହସ୍ୟ ଭେଦ କରିପାରିନାହିଁ । ବିଭିନ୍ନ ଦିଗକୁ ନଜରରେ ରଖି ତଦନ୍ତକୁ ଆଗକୁ ବଢାଉଛି ପୋଲିସ । ସିସି କ୍ୟାମେରା ସାମ୍ନାକୁ ଆସିବା ପରେ ସାଧାରଣରେ ନାନା ପ୍ରଶ୍ନ ମୁଣ୍ଡ ଟେକିଛି । ଅନ୍ୟପଟେ ମୃତ ଛାତ୍ରୀଙ୍କ ପୁରୁଷବନ୍ଧୁଙ୍କ ପରିବାର ଲୋକଙ୍କ କହିବା ଅନୁସାରେ, ଛାତ୍ରୀକୁ ପରିବାର ଲୋକେ ମାନସିକ ତଥା ଶାରୀରିକ ନିର୍ଯାତନା ଦିଅନ୍ତି । ନିଜ ପରିବାର ଲୋକଙ୍କ ଠାରୁ ମାଡ ଗାଳି ଖାଇବା ପରେ ଛାତ୍ରୀ ଜଣକ ଏ କଥା ପୁରୁଷ ବନ୍ଧୁଙ୍କ ପରିବାରକୁ ଫୋନ୍ ଯୋଗେ କହିଛନ୍ତି ବୋଲି କହିଛନ୍ତି ଗିରଫ ଯୁବକଙ୍କ ପରିବାର ଲୋକ ।
