ଭୁବନେଶ୍ୱର: ୨୦୧୭ ଜାନୁଆରୀ ୨୨ ତାରିଖରେ ୯ମ ବ୍ୟାଟାଲିଅନ୍ ଆଇଆର୍ରେ କନଷ୍ଟେବଲ ପଦବୀ ପାଇଁ ହୋଇଥିବା ନିଯୁକ୍ତି ପରୀକ୍ଷା ସମୟରେ ଜଣେ ପ୍ରାର୍ଥୀଙ୍କ ଦୁର୍ଭାଗ୍ୟଜନକ ମୃତ୍ୟୁ ଘଟଣାରେ ଓଡ଼ିଶା ମାନବାଧିକାର ଆୟୋଗ (OHRC) ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଆୟୋଗ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଜାରି କରିଛନ୍ତି। ଏହି ଆଦେଶ ଚଳିତ ବର୍ଷ ଜାନୁଆରୀ ୨୭ ତାରିଖରେ OHRCର ସଦସ୍ୟ ଅସୀମ ଅମିତାଭ ଦାଶଙ୍କ ଏକକ ବେଞ୍ଚ ଦ୍ୱାରା ଜାରି ହୋଇଛି। ଢେଙ୍କାନାଳ ଜିଲ୍ଲା ମେରାମୁଣ୍ଡାଳୀର ମୁରଲୀଧର ସାହୁଙ୍କ ଅଭିଯୋଗ ଆଧାରରେ ମାମଲାଟିର ଶୁଣାଣି ହୋଇଥିଲା।
ଅଭିଯୋଗ ଅନୁଯାୟୀ, ମୁରଲୀଧର ସାହୁଙ୍କ ପୁଅ ହରେକୃଷ୍ଣ ସାହୁ ୨୦୧୭ ଜାନୁଆରୀ ୨୨ରେ ପୁଲିସ ନିଯୁକ୍ତି ପରୀକ୍ଷାରେ ଯୋଗଦେଇଥିଲେ। ୧୬୦୦ ମିଟର ଦୌଡ଼ ପରୀକ୍ଷା ସମୟରେ ସେ ଅଚେତ ହୋଇ ପଡ଼ିଥିଲେ। ପ୍ରଥମେ ତାଙ୍କୁ ପୁଲିସ ଡିସପେନସାରୀକୁ ଓ ପରେ କଟକର ଏସ୍ସିବି ମେଡିକାଲ୍ କଲେଜ ଓ ହସ୍ପିଟାଲକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ପରବର୍ତ୍ତୀ ଦିନ ତାଙ୍କର ମୃତ୍ୟୁ ଘଟିଥିଲା।ଘଟଣାକୁ ଗୁରୁତ୍ୱର ସହ ନେଇ ଆୟୋଗ ଡିଜିପି ଓ ସମ୍ପୃକ୍ତ କର୍ତ୍ତୃପକ୍ଷଙ୍କୁ ନୋଟିସ ଜାରି କରିଥିଲା। ପୁଲିସ ପକ୍ଷରୁ ଦାଖଲ ରିପୋର୍ଟରେ କୌଣସି ଅବହେଳା ନଥିବା କୁହାଯାଇଥିଲା ଓ ଏପରି ମୃତ୍ୟୁ ଘଟଣାରେ କ୍ଷତିପୂରଣ ପାଇଁ ସ୍ପଷ୍ଟ ବ୍ୟବସ୍ଥା ନଥିବା ଉଲ୍ଲେଖ କରାଯାଇଥିଲା।
କିନ୍ତୁ ପୁଲିସ ରିପୋର୍ଟ, ଶବ ବ୍ୟବଚ୍ଛେଦ ରିପୋର୍ଟ ଓ ବିଭିନ୍ନ ଆଇନଗତ ପ୍ରାବଧାନ ଆଧାରରେ ଆୟୋଗ ମନେ କରିଛନ୍ତି ଯେ, ଏହି ଘଟଣାରେ ରାଜ୍ୟ ସରକାରଙ୍କ ଉପରେ ‘ସ୍ଟ୍ରିକ୍ଟ ଲାଇଆବିଲିଟି’ ଲାଗୁ ହୁଏ। ତେଣୁ ମୃତକଙ୍କ ପରିବାର କ୍ଷତିପୂରଣ ପାଇବାକୁ ହକଦାର ବୋଲି ଆୟୋଗ ନିଷ୍କର୍ଷ କରିଛି। ଆଦେଶ ଅନୁସାରେ, ୧୦ ଲକ୍ଷ ଟଙ୍କା ମୁଆବଜା ଆଦେଶ ପ୍ରାପ୍ତିରୁ ୮ ସପ୍ତାହ ମଧ୍ୟରେ ପରିବାରକୁ ଦେବାକୁ ପଡ଼ିବ। ସେହିପରି ସମ୍ଭବ ହେଲେ ମୃତକଙ୍କ ଭଉଣୀଙ୍କୁ ଅନୁକମ୍ପାମୂଳକ ଚାକିରି ଦେବାକୁ ମଧ୍ୟ ଆୟୋଗ ସୁପାରିଶ କରିଛନ୍ତି। ଭବିଷ୍ୟତରେ ଏପରି ଦୁଃଖଦ ଘଟଣା ପୁନରାବୃତ୍ତି ନ ହେବା ପାଇଁ ଆୟୋଗ ନିଯୁକ୍ତି ପ୍ରକ୍ରିୟାରେ କଡ଼ା ନିୟମ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିରେ ଅନିବାର୍ଯ୍ୟ ପୂର୍ବ-ଚିକିତ୍ସା ଯାଞ୍ଚ, ଜୀବନରକ୍ଷା ସୁବିଧା ସହ ଆମ୍ବୁଲାନ୍ସ ବ୍ୟବସ୍ଥା, ପ୍ରଶିକ୍ଷିତ ଡାକ୍ତର ଓ ଚିକିତ୍ସା କର୍ମଚାରୀଙ୍କ ଉପସ୍ଥିତି, ଏସଓପିର କଡ଼ା ପାଳନ ଓ ଅବହେଳା ଘଟିଲେ ଦାୟିତ୍ୱ ନିର୍ଦ୍ଧାରଣ ସମ୍ମିଳିତ ଅଛି। ଗୃହ ବିଭାଗ ଓ ପୁଲିସ ମହାନିର୍ଦ୍ଦେଶକଙ୍କୁ ଏହି ଆଦେଶ ପ୍ରାପ୍ତିରୁ ୩ ମାସ ମଧ୍ୟରେ ପାଳନ ରିପୋର୍ଟ ଦାଖଲ କରିବାକୁ ଆୟୋଗ ନିର୍ଦ୍ଦେଶ ଦେଇଛି।