ନୂଆଦିଲ୍ଲୀ: ଆତଙ୍କବାଦୀ, ଗ୍ୟାଙ୍ଗଷ୍ଟର ଓ ଡ୍ରଗ୍ସ ମାଫିଆଙ୍କ ସହିତ ସମ୍ପୃକ୍ତି ମାମଲାରେ ‘ନ୍ୟାସନାଲ ଇନଭେଷ୍ଟିଗେସନ ଏଜେନ୍ସି’ ଆଜି ୬ଟି ରାଜ୍ୟର ୧୦୦ରୁ ଅଧିକ ସ୍ଥାନରେ ଏକକାଳୀନ ଚଢ଼ଉ କରିଛି । ଉପରୋକ୍ତ ଘଟଣାରେ ରୁଜୁ ହୋଇଥିବା ୫ଟି ମାମଲାରେ ‘ଏନ୍ଆଇଏ’ ଟିମ୍ ଆଜି ହରିୟାଣା, ପଞ୍ଜାବ, ରାଜସ୍ଥାନ, ଉତ୍ତର ପ୍ରଦେଶ, ଉତ୍ତରାଖଣ୍ଡ ଏବଂ ମଧ୍ୟପ୍ରଦେଶ ରାଜ୍ୟର ୧୦୦ରୁ ଅଧିକ ସ୍ଥାନରେ ଚଢ଼ଉ କରି ତଲାସ କରୁଛି । ସନ୍ଦିଗ୍ଧମାନଙ୍କର ସମ୍ପୃକ୍ତି ଥିବା ପ୍ରତିଷ୍ଠାନ ଏବଂ ଅନ୍ୟାନ୍ୟ ସ୍ଥାନଗୁଡ଼ିକ ଉପରେ ରାଜ୍ୟ ପୁଲିସ ସହଯୋଗରେ ଆଜି ସକାଳେ ‘ଏଏନ୍ଆଇ’ ପକ୍ଷରୁ ଚଢ଼ଉ ଆରମ୍ଭ କରାଯାଇଥିଲା । ଏଯାବତ ଏନଆଇଏ ବିଭିନ୍ନ ଅପରାଧିକ ସଙ୍ଗଠନର ୧୯ ଜଣଙ୍କୁ ଗିରଫ କରି ସାରିଛି। ଆତଙ୍କବାଦୀମାନେ ପାଣ୍ଠି ଯୋଗାଡ ପାଇଁ ଗ୍ୟାଙ୍ଗଷ୍ଟର ଓ ଡ୍ରଗ୍ସ ମାଫିଆଙ୍କ ସହାୟତା ନେଉଥିବା ଜଣାପଡିବା ପରେ ଏନଆଇଏ ପକ୍ଷରୁ ଏହି ଅପରେସନ ଆରମ୍ଭ ହୋଇଛି । ଗ୍ୟାଙ୍ଗ୍ଷ୍ଟର୍ମାନେ ବିଦେଶରେ ଥାଇ ଖଲିସ୍ତାନୀ ବିଚ୍ଛିନ୍ନତାବାଦୀମାନଙ୍କୁ ପାଣ୍ଠି ଯୋଗାଇ ଆତଙ୍କ ବିସ୍ତାର କରିବାକୁ ଉଦ୍ୟମ କରୁଛନ୍ତି ବୋଲି କୁହାଯାଉଛି। ଆଜି ଶତାଧିକ ସ୍ଥାନରେ ଚାଲିଥିବା ଚଢ଼ଉରେ ‘ଏନ୍ଆଇଏ’ର ୨୦୦ରୁ ଅଧିକ ‘ରେଡ୍ ଟିମ୍’ ସଦସ୍ୟ ସାମିଲ ହୋଇଛନ୍ତି।
