ମୁମ୍ବାଇ: ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କୁ ଲୁକ୍ଆଉଟ୍ ସର୍କୁଲାର । ୬୦ କୋଟି ଟଙ୍କା ଠକେଇ ମାମଲାରେ ଶିଳ୍ପାଙ୍କୁ ଲୁକ୍ଆଉଟ୍ ସର୍କୁଲାର । ସ୍ବାମୀ ରାଜ କୁନ୍ଦ୍ରାଙ୍କ ସହ ଶିଳ୍ପାଙ୍କୁ ଲୁକ୍ଆଉଟ୍ ସର୍କୁଲାର ନୋଟିସ୍ । ଜଣେ ବ୍ୟବସାୟୀ ଦୀପକ କୋଠାରୀଙ୍କ ଅଭିଯୋଗ ଆଧାରରେ ମୁମ୍ବାଇ ପୋଲିସ ପଠାଇଛି ନୋଟିସ୍ । ଜଣେ ଅଧିକାରୀ କହିଛନ୍ତି, ଏହି ଦମ୍ପତି ବାରମ୍ବାର ଅନ୍ତର୍ଜାତୀୟ ଯାତ୍ରା କରୁଥିବାରୁ ସହର ପୋଲିସର ଅର୍ଥନୈତିକ ଅପରାଧ ଶାଖା ଦ୍ୱାରା ଏଲଓସି ଜାରି କରାଯାଇଛି। ଠକେଇ ଅଭିଯୋଗରେ ଅଗଷ୍ଟ ୧୪ରେ ଅଭିନେତ୍ରୀ ଏବଂ ତାଙ୍କ ସ୍ୱାମୀଙ୍କ ବିରୋଧରେ ଜୁହୁ ଥାନାରେ ଏକ ମାମଲା ରୁଜୁ କରାଯାଇଥିଲା । କହିରଖୁଛୁ ଯେ, ଲୁକ୍ଆଉଟ୍ ସର୍କୁଲାର ହେଉଛି ଜଣେ ବ୍ୟକ୍ତିଙ୍କୁ ଦେଶ ଛାଡିବାକୁ ବା ସେମାନଙ୍କ ଗତିବିଧିକୁ ଟ୍ରାକ୍ କରିବା ପାଇଁ ବ୍ୟବହୃତ ଏକ ଯନ୍ତ୍ର, ସାଧାରଣତଃ ଇମିଗ୍ରେସନ୍ ଏବଂ ସୀମା ନିୟନ୍ତ୍ରଣ ପଏଣ୍ଟଗୁଡ଼ିକୁ ସତର୍କ କରାଇବା।
ତେବେ ମିଳିଥିବା ସୂଚନା ଅନୁଯାୟୀ, ଦୀପକ କୋଠାରୀ ଜୁହୁର ବାସିନ୍ଦା ଏବଂ ସେ ଲୋଟସ୍ କ୍ୟାପିଟାଲ୍ ଫାଇନାନ୍ସିଆଲ୍ ସର୍ଭିସେସର ନିର୍ଦ୍ଦେଶକ । ସେ କହିଛନ୍ତି ଯେ ଶିଳ୍ପା ଏବଂ ରାଜଙ୍କ ସହ ତାଙ୍କର ସାକ୍ଷାତ ରାଜେଶ ଆର୍ଯ୍ୟ ନାମକ ଜଣେ ବ୍ୟକ୍ତିଙ୍କ ଜରିଆରେ ହୋଇଥିଲା । ସେହି ସମୟରେ ଶିଳ୍ପା ଏବଂ ରାଜ ବେଷ୍ଟ ଡିଲ୍ ଟିଭି ପ୍ରାଇଭେଟ୍ ଲିମିଟେଡ୍ର ନିର୍ଦ୍ଦେଶକ ଥିଲେ, ଯାହା ଏକ ଘରୋଇ ସପିଂ ଏବଂ ଅନଲାଇନ୍ ଖୁଚୁରା କମ୍ପାନୀ ଥିଲା। ଏହି କମ୍ପାନୀରେ ଉଭୟଙ୍କର ୮୭.୬ ପ୍ରତିଶତ ଅଂଶଧନ ରହିଥିଲା । କୋଠାରୀଙ୍କ କହିବା ଅନୁଯାୟୀ, ଶିଳ୍ପା ଏବଂ ରାଜ ତାଙ୍କୁ ୭୫ କୋଟି ଟଙ୍କା ଋଣ ମାଗିଥିଲେ, ଯାହା ଉପରେ ସେମାନେ ୧୨ ପ୍ରତିଶତ ସୁଧ ଦେବାକୁ ପ୍ରତିଶ୍ରୁତି ଦେଇଥିଲେ । ପରେ ସେମାନେ ତାଙ୍କୁ ନିବେଶ ଭାବରେ ଋଣ ନେବାକୁ ପରାମର୍ଶ ଦେଇଥିଲେ ଯାହା ଦ୍ଵାରା ତାଙ୍କୁ ଅଧିକ ଟିକସ ଦେବାକୁ ପଡ଼ିବ ନାହିଁ।
ଏହା ସହିତ, ସେମାନେ ପ୍ରତି ମାସରେ ଲାଭ ଏବଂ ମୂଳ ରାଶି ଫେରସ୍ତ କରିବାକୁ ପ୍ରତିଶ୍ରୁତି ଦେଇଥିଲେ। କୋଠାରୀ ଏପ୍ରିଲ ୨୦୧୫ରେ କମ୍ପାନୀକୁ ୩୧.୯ କୋଟି ଟଙ୍କା ଏବଂ ସେପ୍ଟେମ୍ବର ୨୦୧୫ରେ ୨୮.୫୩ କୋଟି ଟଙ୍କା ସ୍ଥାନାନ୍ତର କରିଥିଲେ। ଏହି ରାଶି ସେୟାର ସବସ୍କ୍ରିପସନ୍ ଏବଂ ସପ୍ଲିମେଣ୍ଟାରୀ ଚୁକ୍ତିନାମା ଅଧୀନରେ ଦିଆଯାଇଥିଲା। ହେଲେ ପରେ କୋଠାରୀଙ୍କ ଦାବି ଅନୁଯାୟୀ, ଶିଳ୍ପା ସେଟ୍ଟି ଏପ୍ରିଲ ୨୦୧୬ରେ ବ୍ୟକ୍ତିଗତ ଗ୍ୟାରେଣ୍ଟି ଦେଇଥିଲେ, କିନ୍ତୁ ସେପ୍ଟେମ୍ବର ୨୦୧୬ରେ ସେ ନିର୍ଦ୍ଦେଶକ ପଦରୁ ଇସ୍ତଫା ଦେଇଥିଲେ। ତା’ପରେ କୋଠାରୀ ଜାଣିବାକୁ ପାଇଲେ ଯେ କମ୍ପାନୀ ୨୦୧୭ରେ ଦେବାଳିଆ ହୋଇଗଲା କାରଣ ଏହା ଅନ୍ୟ ଏକ ଚୁକ୍ତିନାମାର ସର୍ତ୍ତାବଳୀ ପାଳନ କରିନଥିଲା । କୋଠାରୀ କହିଛନ୍ତି ଯେ ତାଙ୍କ ଟଙ୍କା ଅପବ୍ୟବହାର କରାଯାଇଥିଲା ଏବଂ ତାଙ୍କ ବ୍ୟକ୍ତିଗତ ଖର୍ଚ୍ଚ ପାଇଁ ଟଙ୍କା ଖର୍ଚ୍ଚ କରାଯାଇଥିଲା । ବର୍ତ୍ତମାନ ଇଓଡବ୍ଲୁ ଏହି ଖୋଳତାଡ ଆରମ୍ଭ କରିଛି ।