ନୂଆଦିଲ୍ଲୀ: ଗତ ୫ ବର୍ଷ ଧରି ବନ୍ଦ ରହିଥିଲା କୈଳାସ ମାନସରୋବର ଯାତ୍ରା । କିନ୍ତୁ ଚଳିତ ବର୍ଷ ଏହି ଧାର୍ମିକ ଯାତ୍ରା ୩୦ ଜୁନ୍ ୨୦୨୫ ରୁ ପୁଣି ଥରେ ଆରମ୍ଭ ହେବାକୁ ହେଉଛି । ଏହି ଯାତ୍ରା ଅଗଷ୍ଟ ପର୍ୟ୍ୟନ୍ତ ଜାରି ରହିବ। ଏହି ଯାତ୍ରା ପ୍ରତିବର୍ଷ ପିଥୋରାଗଡ଼ ଜିଲ୍ଲାର ଲିପୁଲେଖ ଘାଟରୁ ହୋଇଆସୁଛି । କିନ୍ତୁ କରୋନା ମହାମାରୀ (କୋଭିଡ୍) ଯୋଗୁଁ ଏହି ଯାତ୍ରା ୨୦୨୦ ରୁ ବନ୍ଦ ଥିଲା।
କୈଳାସ ପର୍ବତକୁ ଭଗବାନ ଶିବଙ୍କ ବାସସ୍ଥାନ ବୋଲି ବିଶ୍ୱାସ ରହିଛି । ସେହିପରି କୈଳାସକୁ ଡେମଚୋକଙ୍କ ନିବାସ ସ୍ଥଳୀ ଭାବରେ ମଧ୍ୟ ଜଣାଶୁଣା। କୈଳାସ ପର୍ବତ ପ୍ରଥମ ତୀର୍ଥଯାତ୍ରୀ ଋଷଭଦେବଙ୍କ ସହିତ ଜଡିତ। କୈଳାସକୁ ସ୍ୱସ୍ତିକ ପର୍ବତ ଭାବରେ ପୂଜା କରାଯାଏ (ବିଶେଷକରି ତିବ୍ଦତୀୟ ବୋନ୍ ଧର୍ମରେ)। ମାନସରୋବର ହ୍ରଦକୁ ପବିତ୍ର ବୋଲି ବିବେଚନା କରାଯାଏ ଏବଂ ହିନ୍ଦୁ ଧର୍ମରେ ଏହା ଏକ ଗୁରୁତ୍ୱପୂର୍ଣ୍ଣ ତୀର୍ଥସ୍ଥଳ। ପ୍ରାଚୀନ କାଳରୁ ମାନସରୋବର ଯାତ୍ରା ହୋଇଆସୁଛି । ଭକ୍ତମାନେ ଶ୍ରଦ୍ଧାର ସହ ଭଗବାନ ଶିବଙ୍କୁ ପୂଜା କରିବା ସହ ମାନସରୋବର ହ୍ରଦର ପବିତ୍ର ଜଳରେ ସ୍ନାନ କରିବାକୁ ଆସନ୍ତି। ଏହି ଯାତ୍ରା ହିନ୍ଦୁ, ବୌଦ୍ଧ, ଜୈନ ଏବଂ ବୋନ ଧର୍ମରେ ବିଶେଷ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ।
ନିକଟରେ ନୂଆଦିଲ୍ଲୀର ବୈଦେଶିକ ମନ୍ତ୍ରଣାଳୟରେ ଏହି ଯାତ୍ରାକୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା। ଯେଉଁଥିରେ ନିଷ୍ପତ୍ତି ନିଆଯାଇଥିଲା ଯେ ଏହି ଯାତ୍ରା କୁମାଉଁ ମଣ୍ଡଳ ବିକାଶ ନିଗମ ଦ୍ୱାରା ପରିଚାଳିତ ହେବ। ଏହି ଯାତ୍ରା ଦିଲ୍ଲୀରୁ ଆରମ୍ଭ ହୋଇ ପିଥୋରାଗଡ଼ର ଲିପୁଲେଖ ଘାଟ ଦେଇ ଯିବ । ପୂର୍ବରୁ ଯାତ୍ରାର ମାର୍ଗ କାଠଗୋଦାମ ଏବଂ ଆଲମୋରା ଦେଇ ଥିଲା, କିନ୍ତୁ ଏବେ ଏହା ତନକପୁରରୁ ଚମ୍ପାୱତ ଦେଇ ଆଗକୁ ବଢ଼ିବ। କୈଳାସ ମାନସରୋବର ଯାତ୍ରା ଏକ ଗଭୀର ଆଧ୍ୟାତ୍ମିକ ଅଭିଜ୍ଞତା । ଯାହା ସାରା ବିଶ୍ୱରୁ ତୀର୍ଥଯାତ୍ରୀଙ୍କୁ ଆକର୍ଷିତ କରେ । ଏହାର ସମୃଦ୍ଧ ଇତିହାସ ଏବଂ ସାଂସ୍କୃତିକ ଗୁରୁତ୍ୱ ଭକ୍ତି ଏବଂ ଅନୁସନ୍ଧାନକୁ ପ୍ରେରଣା ଦିଏ ।
ସୂଚନାଯୋଗ୍ୟ, ୨୦୨୦ରେ ଭାରତ ଓ ଚୀନ ମଧ୍ୟରେ ହୋଇଥିବା ଗଲଓ୍ବାନ ସଂଘର୍ଷ ପରେ କୈଳାସ ମାନସରୋବର ଯାତ୍ରାକୁ ବନ୍ଦ କରି ଦିଆଯାଇଥିଲା । ୨୦୨୦ ମସିହାରୁ ଯାତ୍ରାର ଉଭୟ ସରକାରୀ ମାର୍ଗ ଭାରତୀୟଙ୍କ ପାଇଁ ବନ୍ଦ ରହିଥିଲା । ଉଭୟ ଦେଶର ସଂପର୍କରେ ଉନ୍ନତି ଆସିବା ପରେ ଗତ ଜାନୁଆରୀ ମାସରେ ପୁଣି କୈଳାସ ମାନସରୋବର ଯାତ୍ରା ଆରମ୍ଭ କରିବାକୁ ଉଭୟ ଦେଶ ରାଜି ହୋଇଥିଲେ ।