ବିଷମକଟକ/ ରବିନ୍ଦ୍ର କୁମାର ସାହୁ: ସାଧାରଣ ନିର୍ବାଚନକୁ ଦୃଷ୍ଟି ରେ ରଖୀ ସମସ୍ତ ରାଜନୈତିକ ଦଳ ନିଜ ନିଜ ସଂଗଠନ ମଜବୁତ କରୁଥିବା ବେଳେ କଂଗ୍ରେସ ମଧ୍ୟ ନିଜର ଦଳ ବଳ ସଜାଡ଼ିବା ଆରମ୍ଭ କରିଦେଇଛି । ଏହି ପରିପ୍ରେକ୍ଷୀରେ ଆଜି ସ୍ଥାନୀୟ ପୂର୍ତ୍ତ ବଙ୍ଗଳା ଠାରେ ବିଷମକଟକ ବ୍ଲକ କଂଗ୍ରେସ ପକ୍ଷରୁ ଏକ କର୍ମୀ ସମ୍ମିଳନୀର ଆୟୋଜନ କରାଯାଇଥିଲା । ଏହି ବୈଠକରେ ବ୍ଲକର ୨୧ଟି ପଞ୍ଚାୟତର ବରିଷ୍ଠ କଂଗ୍ରେସ କର୍ମୀ ଯୋଗ ଦେଇଥିଲେ । ଆଗାମୀ ସାଧାରଣ ନିର୍ବାଚନ ରେ ଦଳ କଣ ମୁଦା ନେଇ ଭୋଟର ମାନଙ୍କ ପାଖକୁ ଯିବ ସେ ନେଇ ବୈଠକରେ ଆଲୋଚନା ହୋଇଥିଲା । ତେବେ ବିଜେଡି ସରକାରର ଦୀର୍ଘ ଦିନର ଦୁର୍ନୀତି, ଅପାରଗତା, ଅରାଜକତା, ମୋ ଘର ଯୋଜନାର ବିଫଳତା, ଆମ ଓଡିଶା ନବୀନ ଓଡିଶା ନାରେ ଦୁର୍ନୀତି, ପିସି କାରବାର ବିରୁଦ୍ଧରେ ନିଜ ର ସ୍ୱର ଶାଣିତ କରିବା ବ୍ୟତୀତ ନିଜ ଅଞ୍ଚଳରେ ହେଉଥିବା ଦୁର୍ନୀତି ଯାହାକୁ ସରକାରୀ ଦଳ ପ୍ରୋତ୍ସାହନ ଦେଉଛି ସେ ସବୁ ବିରୁଦ୍ଧରେ ଦଳ କଡା ଆଭିମୁଖ୍ୟ ଗ୍ରହଣ କରିବା ପାଇଁ ବୈଠକରେ ନିଷ୍ପତ୍ତି ହୋଇଛି ।
ବିଶେଷ ରୂପେ ଦେଶୀ ମଦ ଭାଟି ଗୁଡିକ ପାଇଁ ମହିଳାଙ୍କ ଠାରେ ଅନେକ ଅଭିଯୋଗ ରହିଛି । ଯାହାକୁ କୌଣସି ଦଳ କିମ୍ବା ବିଭୀଗୀୟ ଅଧିକାରୀ କର୍ଣ୍ଣପାତ କରୁନଥିବା ବେଳେ ବର୍ତମାନ ଦଳ ସେମାନଙ୍କ ଅଭିଯୋଗ ଆଧାରରେ ବିଷମକଟକ ର ଗାଁ ଗାଁ ରେ ଥିବା ଦେଶୀ ମଦ ଭାଟିକୁ ଉଛେଦ କରିବା ପାଇଁ ତୃଣମୂଳ ସ୍ତରରେ ଆନ୍ଦୋଳନକୁ ଓଲ୍ହାଇବା କୁ ଖସଡ଼ା ପ୍ରସ୍ତୁତ କରିଥିବା କୁହାଯାଉଛି । ବିଷମକଟକ ସଦରରେ ଥିବା ବସ ଷ୍ଟାଣ୍ଡ ଠାରେ ଦୀର୍ଘ ବର୍ଷ ହେବ ଶୌଚାଳୟ ର ଅଭାବ ସ୍ଥାନୀୟ ପ୍ରଶାସନର ଇଛାଶକ୍ତି ଓ ଆନ୍ତରିକତା ର ଅଭାବ କୁ ଦର୍ଶାଉଛି । ତେବେ ବିଷମକଟକ ବସ ଷ୍ଟାଣ୍ଡ ଠାରେ ପ୍ରାଥମିକ ସ୍ତରରେ ମହିଳାଙ୍କ ପାଇଁ ଶୌଚାଳୟ ର ବ୍ୟବସ୍ଥା, ବସ ଷ୍ଟାଣ୍ଡ ଠାରେ ନିର୍ମାଣ ହୋଇ ପଡି ରହିଥିବା ବଜାର ଗୃହ ଗୁଡିକର ଆବଣ୍ଟନ, ପୁରୁଣା ବସ ଷ୍ଟାଣ୍ଡ ଠାରେ ଦଶନ୍ଧି ଧରି ନିର୍ମିତ ହୋଇ ପଡି ରହିଥିବା ମାର୍କେଟ କମ୍ଲେକ୍ସ କୁ ଖୋଲାଯିବା ସହ ସଦର ବ୍ଲକର ପାଇକଡାକୁଲଗୁଡା ଓ ଢ଼ାମୁଣି ଗ୍ରାମ ପଞ୍ଚାୟତ ମାନଙ୍କରେ ମହଜୁଦ ରହିଥିବା ଖଣି ଖାଦାନ ଗୁଡିକର ବିନା ପରିବେଶ ମଞ୍ଜୁରୀରେ ଅନୁମତି, ଗ୍ରାମ ସଭାର ବିନା ଅନୁମତିରେ ଖଣି ଖନନ, ଖାଦାନ ନୀଲାମି, ପାରିପାର୍ଶ୍ଵିକ ଉନ୍ନତିକୁ ଅଣଦେଖା, ସ୍ଥାନୀୟ ବାସୀଙ୍କୁ ଖଦାନ ମାନଙ୍କରେ କର୍ମନିୟୋଜନ, ଉଚିତ ପାରିଶ୍ରମିକ ପ୍ରମୁଖ ବିଷୟ ନେଇ ଦଳ ନିଜର ରଣନୀତି ଆରମ୍ଭ କରିଥିବା ବିଷମକଟକ ବିଧାୟକ ପ୍ରାର୍ଥୀ ନୀଳମାଧବ ହିକକା ପ୍ରକାଶ କରିଛନ୍ତି ।
ଏଭଳି ସ୍ଥାନୀୟ ମୁଦା ନେଇ ଦଳ ଲୋକଙ୍କ ଆସ୍ତାଭାଜନ ହେବାକୁ ଲକ୍ଷ୍ୟ ରଖିଥିବା ସହ ଆଞ୍ଚଳିକ ସମସ୍ୟାକୁ ଦଳ ଅଧିକ ଗୁରୁତ୍ୱ ଦେବା ପାଇଁ କର୍ମୀ ମାନେ ନିଜ ନିଜ ମତ ରଖିଥିବା ଶ୍ରୀ ହିକକା ପ୍ରକାଶ କରିଛନ୍ତି । ଶ୍ରୀ ହିକକା ନିଜ ନିର୍ବାଚନ ମଣ୍ଡଳୀରେ ସବୁବେଳେ ଖୁବ ସକ୍ରିୟ ରହୁଥିବା କୁହାଯାଉଥିବା ବେଳେ ନିକଟରେ ଓଡିଶା ପ୍ରଦେଶ କଂଗ୍ରେସ ଅଧକ୍ଷଙ୍କ ଠାରୁ ଗ୍ରୀନ ସିଗନାଲ ପାଇବା ପର ଠାରୁ ସେ ନିଜ ର ସଂଗଠନ କୁ ଆହୁରି ମଜଭୁତ କରିବା ପାଇଁ ତତ୍ପର ଥିବା ବ୍ଲକ କଂଗ୍ରେସ ସଭାପତି କୃଷ୍ଣ ନାଣକା ପ୍ରକାଶ କରିଛନ୍ତି ଓ ଏହି ବୈଠକରେ କଂଗ୍ରେସ ର ବରିଷ୍ଠ କର୍ମୀ ଦିଲୀପ ପଟନାୟକ,ସାଂସଦ ପ୍ରତିନିଧି ଚନ୍ଦ୍ରଶେଖର କୁସୁଲିୟା ଏବଂ ଅନ୍ୟ କର୍ମୀ ମାନେ ଉପସ୍ଥିତ ଥିଲେ ।