ଭୁବନେଶ୍ୱର: ‘ଅପରେସନ୍ ସିନ୍ଦୂର’ ଉପରେ ଏକ ନୂତନ ହିନ୍ଦୀ ଫିଲ୍ମ ଘୋଷଣା ହୋଇଛି। ପ୍ରସିଦ୍ଧ ନିର୍ମାତା ଓ ନିର୍ଦ୍ଦେଶକ ବିବେକ ଅଗ୍ନିହୋତ୍ରୀ ଏହି ଫିଲ୍ମକୁ ନିର୍ଦ୍ଦେଶନା ଦେବେ। ଏହା ପୂର୍ବରୁ ଆଲୋଚନାରେ ଥିବା ସତ୍ତ୍ୱେ ବର୍ତ୍ତମାନ ଏହାକୁ ଆନୁଷ୍ଠାନିକ ଭାବେ ଘୋଷଣା କରାଯାଇଛି। ଏହି ଫିଲ୍ମଟି ୨୦୨୫ ଏପ୍ରିଲ୍ରେ ଜମ୍ମୁ ଓ କାଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣ ପରେ ଭାରତୀୟ ସେନାଙ୍କ ପ୍ରତିକ୍ରିୟାକୁ ଆଧାର କରି ତିଆରି ହେବ। ସୂଚନା ଅନୁଯାୟୀ, ଏହା ଲେଫ୍ଟନାଣ୍ଟ ଜେନେରାଲ୍ କେ.ଜେ.ଏସ୍. ‘ଟିନି’ ଢିଲୋନଙ୍କ ଲେଖା ପୁସ୍ତକ ‘ଅପରେସନ୍ ସିନ୍ଦୂର: ଦି ଅନଟୋଲ୍ଡ ଷ୍ଟୋରୀ ଅଫ୍ ଇଣ୍ଡିଆଜ୍ ଡିପ୍ ଷ୍ଟ୍ରାଇକ୍ସ ଇନସାଇଡ୍ ପାକିସ୍ତାନ’ରୁ ପ୍ରେରିତ।
ବିବେକ ଅଗ୍ନିହୋତ୍ରୀ ସୋସିଆଲ୍ ମିଡିଆରେ ଘୋଷଣା କରି କହିଛନ୍ତି ଯେ, ସେ ଏହି କାହାଣୀକୁ ସତ୍ୟ ଓ ପ୍ରମାଣ ସହିତ ପରଦାରେ ଆଣିବାକୁ ଚେଷ୍ଟା କରିବେ। ସେ ଏହାକୁ କେବଳ ଏକ ସିନେମା ନୁହେଁ, ବରଂ ଦେଶର ସୁରକ୍ଷା ଓ ଇତିହାସ ସହ ଜଡିତ ଏକ ଗୁରୁତ୍ୱପୂର୍ଣ୍ଣ କାହାଣୀ ବୋଲି ବର୍ଣ୍ଣନା କରିଛନ୍ତି। ଏହି ପ୍ରକଳ୍ପକୁ ଭୂଷଣ କୁମାରଙ୍କ ଟି-ସିରିଜ୍ ଓ ବିବେକ ଅଗ୍ନିହୋତ୍ରୀଙ୍କ ‘ଆଇ ଆମ୍ ବୁଦ୍ଧା ପ୍ରଡକ୍ସନ୍ସ’ ମିଶି ନିର୍ମାଣ କରିବେ। ମେ ୬ରୁ ମେ ୧୦, ୨୦୨୫ ମଧ୍ୟରେ ହୋଇଥିବା ସମ୍ପୂର୍ଣ୍ଣ ସାମରିକ କାର୍ଯ୍ୟାନୁଷ୍ଠାନକୁ ଏହି ଫିଲ୍ମରେ ଦେଖାଯିବ ବୋଲି ଜଣାପଡିଛି। ନିର୍ମାତା ଭୂଷଣ କୁମାର କହିଛନ୍ତି ଯେ, ଏହି କାହାଣୀକୁ ସତ୍ୟ ଓ ଦାୟିତ୍ୱ ସହିତ ପ୍ରସ୍ତୁତ କରିବା ଆବଶ୍ୟକ। ଏହା କେବଳ ମନୋରଞ୍ଜନ ନୁହେଁ, ବରଂ ଏକ ଐତିହାସିକ ଘଟଣାର ପ୍ରତିବିମ୍ବ ହେବ।