ନୂଆଦିଲ୍ଲୀ: ସକାଳୁ ସକାଳୁ ଥରିଲା ରାଜଧାନୀ । ଜାତୀୟ ରାଜଧାନୀ ଦିଲ୍ଲୀ-ଏନ୍ସିଆର୍ ଅଞ୍ଚଳରେ ଭୂମିକମ୍ପ ଝଟ୍କା । ଥରିଲା ଦିଲ୍ଲୀ, ଗୁରୁଗ୍ରାମ, ଗାଜିଆବାଦ ଓ ନୋଏଡ଼ା । ଭୟରେ ଘରୁ ବାହାରକୁ ପଳାଇ ଆସିଲେ ଲୋକେ । ସକାଳ ୯ଟା ୪ରେ ୧୦ ସେକେଣ୍ଡ ପାଇଁ ଭୂକମ୍ପ ଝଟକା ଅନୁଭୁତ ହୋଇଥିଲା । ତେବେ ରିକ୍ଟର୍ ସ୍କେଲ୍ରେ ଏହାର ତୀବ୍ରତା ୪.୪ ରେକର୍ଡ ହୋଇଥିବା ନେଇ ସୂଚନା ମିଳିଛି । ଭୂମିକମ୍ପର କେନ୍ଦ୍ରସ୍ଥଳ ହରିୟାଣାର ଝଜ୍ଜର ଜିଲ୍ଲାରେ ଥିବା ନେଇ ଜଣାପଡିଛି । ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଅନୁଯାୟୀ, ଭୂମିକମ୍ପ ଆଜି ସକାଳ ୯.୪ ମିନିଟରେ ଅନୁଭୁତ ହୋଇଥିଲା । ଯାହାର ଗଭୀରତା ୧୦ କିଲୋମିଟର ବୋଲି କୁହାଯାଉଛି। ଅନ୍ୟପଟେ ହରିୟାଣାର ସୋନିପତରେ ମଧ୍ୟ ଭୂମିକମ୍ପ ଅନୁଭୂତ ହୋଇଥିଲା। ସ୍ଥାନୀୟ ଲୋକଙ୍କ ଅନୁସାରେ, ସକାଳ ୯.୫ ରେ କିଛି ସେକେଣ୍ଡ ପାଇଁ ଭୂମି କମ୍ପିତ ହୋଇଥିଲା। ଏହା ବ୍ୟତୀତ ୟୁପିର ମିରଟ ଏବଂ ହାପୁରରେ ମଧ୍ୟ ଭୂମିକମ୍ପ ଅନୁଭୂତ ହୋଇଥିଲା। ତେବେ ଦିଲ୍ଲୀ ଏନସିଆରରେ ସମୟ ସମୟରେ ଭୂମିକମ୍ପ ଅନୁଭୂତ ହୁଏ, କିନ୍ତୁ ପ୍ରାୟତଃ ସେମାନଙ୍କର କେନ୍ଦ୍ରସ୍ଥଳ ଦିଲ୍ଲୀଠାରୁ ବହୁତ ଦୂରରେ ଥାଏ, କେତେକ ସମୟରେ ଆଫଗାନିସ୍ତାନରେ ମଧ୍ୟ ଥାଏ । ଦିଲ୍ଲୀକୁ ଭାରତରେ ଦ୍ୱିତୀୟ ସର୍ବାଧିକ ଭୂମିକମ୍ପ ସକ୍ରିୟ ବର୍ଗ ଭାବରେ ବିବେଚନା କରାଯାଏ। ଏହି କାରଣରୁ, ରାଜଧାନୀରେ ସବୁବେଳେ ମୃଦୁ କିମ୍ବା ମଧ୍ୟମ ତୀବ୍ରତାର ଭୂମିକମ୍ପର ସମ୍ଭାବନା ରହିଥାଏ।
