ବ୍ୟୁରୋ:- ଦେଶର ଉପରାଷ୍ଟ୍ରପତି ଜଗଦୀପ ଧନଖଡ଼ ନିଜ ପଦରୁ ଇସ୍ତଫା ଦେଇଛନ୍ତି । ମୌସୁମୀ ଅଧିବେଶନର ପ୍ରଥମ ଦିନରେ ରାଜ୍ୟସଭାରେ ଅଧ୍ୟକ୍ଷତା କରିବାର କିଛି ଘଣ୍ଟା ପରେ ଧନଖଡ଼ ସ୍ୱାସ୍ଥ୍ୟଗତ କାରଣ ଦର୍ଶାଇ ନିଜ ପଦରୁ ଇସ୍ତଫା ଘୋଷଣା କରିଛନ୍ତି । ଧନଖଡ଼ଙ୍କ ଇସ୍ତଫା ଦେବା ପରେ ଏବେ ରାଜନୀତି ଚର୍ଚ୍ଚା ଜୋର ଧରିଛି । ତେବେ ଏବେ ପରବର୍ତ୍ତୀ ଉପରାଷ୍ଟ୍ରପତି କିଏ ହେବେ ତାହାକୁ ନେଇ ଚର୍ଚ୍ଚା ମଧ୍ୟ ଆରମ୍ଭ ହୋଇଯାଇଛି । କୁହ ଯାଉଛି ଯେ ପରଦା ପଛରେ ବହୁତ କିଛି ଘଟୁଛି। ଦିଲ୍ଲୀ ରାଜନୀତିରେ କିଛି ବଡ଼ ଘଟଣା ଘଟିବାକୁ ଯାଉଛି। ଯେକୌଣସି ଅଧିବେଶନ ପୂର୍ବରୁ ଏକ ଗୁରୁତ୍ୱପୂର୍ଣ୍ଣ ସାମ୍ବିଧାନିକ ପଦବୀରେ ଥିବା ବ୍ୟକ୍ତିଙ୍କ ଇସ୍ତଫା, ବିଶେଷକରି ଯେତେବେଳେ ଗୃହରେ ଅନେକ ସମ୍ବେଦନଶୀଳ ପ୍ରସଙ୍ଗ ଉପରେ ଆଲୋଚନା ହେବାର ଆଶା କରାଯାଏ, ସେହି ସମୟରେ ଇସ୍ତଫା ପ୍ରଦାନ ଏକ ସନ୍ଦେହଜନକ ପରିସ୍ଥିତି ସୃଷ୍ଟି କରେ।
ତେବେ ଚଳିତ ବର୍ଷ ମାର୍ଚ୍ଚ ମାସରେ ଉପରାଷ୍ଟ୍ରପତିଙ୍କୁ ଛାତି ଯନ୍ତ୍ରଣା ଓ ଅସୁସ୍ଥତା ହେତୁ AIIMSରେ ଭର୍ତ୍ତି କରାଯାଇଥିଲା। ଗତ ମାସରେ ନୈନିତାଲ ବିଶ୍ୱବିଦ୍ୟାଳୟରେ ଏକ କାର୍ଯ୍ୟକ୍ରମରେ ମଞ୍ଚରୁ ଓହ୍ଲାଇବା ପରେ ସେ ମୂର୍ଚ୍ଛା ହୋଇ ଯାଇଥିଲେ। ଏହି ଘଟଣାଗୁଡ଼ିକ ତାଙ୍କ ସ୍ୱାସ୍ଥ୍ୟ ସମସ୍ୟାକୁ ଇଙ୍ଗିତ କରୁଥିଲେ, କିନ୍ତୁ ତାଙ୍କ ଅଚାନକ ଇସ୍ତଫା ରାଜନୈତିକ ମହଲରେ ଅନେକ ପ୍ରଶ୍ନ ଉଠାଇଛି।
ତାଙ୍କ ଇସ୍ତଫା କୁ ନେଇ କଂଗ୍ରେସ ନେତା ଜୟରାମ ରମେଶ କହିଛନ୍ତି “ଉପରାଷ୍ଟ୍ରପତି ସୋମବାର ଦିନ ରାଜ୍ୟସଭାର ବ୍ୟବସାୟ ପରାମର୍ଶ କମିଟି ବୈଠକରେ ଅଧ୍ୟକ୍ଷତା କରିଥିଲେ ଏବଂ ମୋ ସହ କଥାବାର୍ତ୍ତା ମଧ୍ୟ ହୋଇଥିଲା। ତାଙ୍କ ଇସ୍ତଫା ଘୋଷଣା ଅତ୍ୟନ୍ତ ଅପ୍ରତ୍ୟାଶିତ ଥିଲା।” ସେ ଆହୁରି କହିଛନ୍ତି ଯେ ଧନଖଡ଼ ମଙ୍ଗଳବାର ଦିନ ନ୍ୟାୟପାଳିକା ସମ୍ବନ୍ଧୀୟ କିଛି ଗୁରୁତ୍ୱପୂର୍ଣ୍ଣ ଘୋଷଣା କରିବାକୁ ଯୋଜନା କରିଥିଲେ, ଯାହା ଏହି ଇସ୍ତଫାର ସମୟକୁ ନେଇ ସନ୍ଦେହ ସୃଷ୍ଟି କରୁଛି। କଂଗ୍ରେସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଧନଖଡ଼ଙ୍କୁ ଏହି ନିଷ୍ପତ୍ତି ପୁନର୍ବିଚାର କରିବାକୁ ଅନୁରୋଧ କରିଛି, ଏହା କୃଷକ ସମୁଦାୟ ଓ ଦେଶ ପାଇଁ ଲାଭଦାୟକ ହେବ ବୋଲି ଉଲ୍ଲେଖ କରିଛି।
ତେବେ ଧନଖରଙ୍କ ହଠାତ୍ ଇସ୍ତଫା ତାଙ୍କ ଉତ୍ତରାଧିକାରୀ ପାଇଁ ଦୌଡ଼ ଆରମ୍ଭ ହୋଇଛି । ତେବେ ଏହି ଉପମୁଖ୍ୟମନ୍ତ୍ରୀ ଦୌଡରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନାମ ପାଇଁ ଦାବି ଉଠିବା ଆରମ୍ଭ ହୋଇଛି। ଗୁରୁତ୍ୱପୂର୍ଣ୍ଣ କଥା ହେଉଛି ଏହି ଦାବି ଜେଡିୟୁ ଦ୍ୱାରା ନୁହେଁ ବରଂ ଜେଡିୟୁର ସହଯୋଗୀ ଭାରତୀୟ ଜନତା ପାର୍ଟି ଦ୍ୱାରା ଉଠାଯାଇଛି। ଜେଡିୟୁ ସାଂସଦ ଏବଂ ରାଜ୍ୟସଭା ଉପାଧ୍ୟକ୍ଷ ହରିବଂଶଙ୍କୁ ମଧ୍ୟ ସମ୍ଭାବ୍ୟ ପ୍ରାର୍ଥୀ ଭାବରେ ଦେଖାଯାଉଛି।