ଆସି ପାରୁନାହିଁ ଡିଏନ୍ଏ ରିପୋର୍ଟ, ଏବେ ବି ୪୪ ମୃତଦେହର ମିଳୁନି ପରିଚୟ 

ଭୁବନେଶ୍ୱର: କୁହାଯାଏ ମୃତ୍ୟୁ ପରେ ଆତ୍ମା ଆତ୍ମୀୟଙ୍କଠାରୁ ଅଲଗା ହୁଏନି । ଯେ ପର୍ଯ୍ୟନ୍ତ ବିଧି ବିଧାନ ଓ ରୀତିନୀତି ଅନୁଯାୟୀ ଅନ୍ତିମ ସଂସ୍କାର କରାଯାଇ ନ ଥାଏ, ସେଯାଏ ଆତ୍ମା ଆତ୍ମୀୟଙ୍କ ଅପେକ୍ଷାରେ ଥାଏ । ସଂସ୍କାର ପରେ ମୋକ୍ଷ ପ୍ରାପ୍ତି ପାଇଁ ଚାହିଁ ରହିଥାଏ ଆତ୍ମା ।  ବାହାନଗା ଟ୍ରେନ ଦୁର୍ଘଟଣାକୁ ମାସେ ୧୨ ଦିନ ହେଲାଣି । କିନ୍ତୁ ଏଯାଏ ୪୪ ଜଣଙ୍କ ମୃତଦେହର ପରିଚୟ ମିଳି ପାରି ନାହିଁ । ଡିଏନଏ ରିପୋର୍ଟ ନ ଆସିବା କାରଣରୁ ମୃତଦେହଗୁଡ଼ିକୁ ଆତ୍ମୀୟ ସ୍ୱଜନଙ୍କୁ ହସ୍ତାନ୍ତର କରାଯାଇ ପାରୁ ନାହିଁ । ଯାହାକୁ ନେଇ ଏବେ ଚିନ୍ତାରେ ଆତ୍ମୟୀ ସ୍ୱଜନ । କେବେ ଡିଏନଏ ରିପୋର୍ଟ ଆସିବ ଏ ନେଇ କେହି ମୁହଁ ଖୋଲୁ ନାହାନ୍ତି । ଏମ୍ସ କର୍ତୃପକ୍ଷ ମଧ୍ୟ ଏ ବାବଦରେ କିଛି ସ୍ପଷ୍ଟ କରୁନାହାନ୍ତି । ଦିନକ ପରେ ଦିନ ଗଡ଼ ଚାଲିଛି କିନ୍ତୁ ଆତ୍ମୀୟମାନେ ସେମାନଙ୍କ ଲୋକଙ୍କ ପାଇ ପାରୁ ନାହାନ୍ତି ।

ଏମସରେ ୧୬୨ ମୃତକଙ୍କ ମଧ୍ୟରୁ ୧୧୮ ଜଣଙ୍କୁ ପରିବାର ଲୋକ ଚିହ୍ନଟ କରିଛନ୍ତି । ଅନ୍ୟ ମୃତଦେହଗୁଡ଼ିକର ମୁହଁ ବିକୃତ ହୋଇ ଯାଇଥିବାରୁ ଆତ୍ମୟୀମାନେ ଚିହ୍ନଟ କରି ପାରୁନାହାନ୍ତି ।ମୃତଦେହଗୁଡ଼ିକର ଡିଏନଏ ଟେଷ୍ଟ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ରାଜ୍ୟ ସରକାର ନିଷ୍ପତି କରିଛନ୍ତି । କିନ୍ତୁ ଡିଏନଏ ରିପୋର୍ଟ ଆସିବା ବିଳମ୍ବ ହେବାରୁ ଏବେ ଏଭଳି ସମସ୍ୟା ସୃଷ୍ଟି ହେଉଛି । ବର୍ତମାନ ସୁଦ୍ଧା ୩୯ ମୃତଦେହର ଡିଏନଏ ରିପୋର୍ଟ ଆସି ସାରିଛି । ସେଥରୁ ୩୮ଟି ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ବର୍ତମାନ ୪୪ଟି ମୃତଦେହ ଅଛି । ସେମାନଙ୍କ ଡିଏନଏ ରିପୋର୍ଟ  କେବେ ଆସିବ କାହା ପାଖେ ସୂଚନା ନାହିଁ ।