ଭୁବନେଶ୍ୱର: ଓଡିଆ ଗଳ୍ପ ସାହିତ୍ୟରେ ବର୍ଣ୍ଣିତ ଆଦିବାସୀ ସଂସ୍କୃତି ଓ ପରମ୍ପରା ହେଉଛି ସମାଜର ଏକ ମୁଖ୍ୟ ପ୍ରସଙ୍ଗ । ଆଦିବାସୀମାନେ ସଭ୍ୟ ସମାଜ ପାଳନ କରୁଥିବା ପର୍ବପର୍ବାଣିକୁ ପାଳୁଥିଲେ ମଧ୍ୟ ସେମାନଙ୍କର ନିଜସ୍ୱ ସଂସ୍କୃତି ଓ ପରମ୍ପରା ରହିଛି । ଆଦିବାସୀ ସଂସ୍କୃତି କହିଲେ ସେମାନଙ୍କ ଦେବାଦେବୀ, ପର୍ବପର୍ବାଣି, ବିବାହ, ବେଶପୋଷାକ, ଅଳଙ୍କାର, ଧର୍ମୀୟ ବିଶ୍ୱାସ ଇତ୍ୟାଦିକୁ ବୁଝାଇଥାଏ । ତେବେ ଚାଲନ୍ତୁ ଜାଣିବା ଆଦିବାସୀମାନଙ୍କର ଏକ ନିଆରା ପରମ୍ପରା ସହ ଜଡିତ ବାହା ପର୍ବ ବିଷୟରେ …
ପରମ୍ପରା ସହ ଆଦିବାସୀମାନଙ୍କ ଅନେକ ପର୍ବ ମଧ୍ୟରୁ ପ୍ରକୃତି ସହ ଜଡିତ ବାହା ପର୍ବ ଅନ୍ୟତମ । ବାହା ପର୍ବ ହେଉଛି ସାନ୍ଥାଳୀମାନଙ୍କର ଏକ ମୁଖ୍ୟ ପର୍ବ । ଏହି ପର୍ବକୁ ଆଦିବାସୀମାନେ ତାଙ୍କ ସୁଖ ଓ ସମୃଦ୍ଧିର ପର୍ବ ଭାବେ ମାନିଥାନ୍ତି । ପରମ୍ପରା ଅନୁସାରେ ଆଦିବାସୀ ସମ୍ପ୍ରଦାୟର ଲୋକମାନେ ଫଗୁଣ ମାସରେ ଫଳୁଥିବା ନୂଆ ଫୁଲଫଳକୁ ଠାକୁରଙ୍କ ପୂଜାସ୍ଥଳୀ ନିକଟରେ ପୂଜା କରଥାନ୍ତି । ପ୍ରାଚୀନ କାଳରୁ ଏହି ପର୍ବ ଚାଲିଆସୁଥିବା ବେଳେ ବିଶେଷ କରି ଶାଳ ଫୁଲ ଏବଂ ମହୁଲ ଫୁଲକୁ ଗ୍ରାମଦେବୀଙ୍କ ନିକଟରେ ପୂଜାର୍ଚ୍ଚନା କରାଯାଇଥାଏ ।
ପୂଜା ନହେବା ପର୍ଯ୍ୟନ୍ତ ଗ୍ରାମବାସୀଙ୍କୁ ଗାଁର ଫୁଲଫଳକୁ ବ୍ୟବହାର କରିବା ପାଇଁ ବାରଣ କରାଯିବା ସହିତ ଜଙ୍ଗଲ ଯିବାକୁ ମଧ୍ୟ ମନା କରାଯାଇଥାଏ । ପୂଜାର୍ଚ୍ଚନା ସରିବା ପରେ ପୂଜା ହୋଇଥିବା ଫୁଲଫଳକୁ ଭୋଗ ଆକାରରେ ଗ୍ରହଣ କରିଥାନ୍ତି ଶ୍ରଦ୍ଧାଳୁ । ପୂଜା ବିଦ୍ଧି ସରିବା ପରେ ଆଦିବାସୀ ମହିଳାମାନେ ମୁଣ୍ଡରେ ଶାଳ ଫୁଲ ଖୋସି ଢୋଲ ଏବଂ ମାଦଳର ତାଳେ ତାଳେ ଗୀତନାଚ କରିଥାନ୍ତି ।
ଏହି ପର୍ବ ଓଡିଶାର ସମଗ୍ର ଆଦିବାସୀ ଜିଲ୍ଲା ଗୁଡିକରେ ପାଳନ ହେଉଥିବା ବେଳେ ରାଜ୍ୟ ବାହାରୁ ମଧ୍ୟ ଲୋକେ ଆସି ଏଥିରେ ସାମିଲ ହୋଇଥାନ୍ତି । ତେବେ ଏହି ପୂଜା ବିଦ୍ଧି କରିବା ଦ୍ୱାରା ସମସ୍ତ ମାନସିକ ପୂରଣ ହୋଇଥାଏ ବୋଲି ଶ୍ରଦ୍ଧାଳୁ ମାନେ ବିଶ୍ୱାସ କରିଥାନ୍ତି । ଏଥିସହିତ ଅଞ୍ଚଳର ବିକାଶ ପାଇଁ ମଧ୍ୟ ପ୍ରକୃତି ସହିତ ଜଡିତ ଆଦିବାସୀଙ୍କ ଏହି ନିଆରା ପର୍ବ ଯୁଗ ଯୁଗ ଧରି ପାଳନ ହୋଇ ଆସୁଛି ।