ମୁମ୍ବାଇ: ବଲିଉଡର ଚୁଲବୁଲି ଅଭିନେତ୍ରୀ ଆଲିଆ ଭଟ୍ଟଙ୍କର ଆଜି ହେଉଛି ଜନ୍ମଦିନ । ୨୯ ବର୍ଷରେ ପାଦ ଦେଇଛନ୍ତି ଆଲିଆ । ଜନ୍ମଦିନ ଉପଲକ୍ଷେ ଆଲିଆଙ୍କୁ ବନ୍ଧୁ ,ପରିବାର ଏବଂ ଫ୍ୟାନ୍ସମାନଙ୍କ ତରଫରୁ ଅନେକ ଶୁଭେଚ୍ଛାର ଶୁଅ ଛୁଟିଛି । ତାଙ୍କ ଜନ୍ମଦିନ ଅବସରରେ ଏକ ପାର୍ଟିର ଆୟୋଜନ କରାଯାଇଥିଲା । ସେହି ପାର୍ଟିରେ ଆୟନ ମୁଖାର୍ଜୀ ଆଲିଆଙ୍କ ବହୁ ପ୍ରତିକ୍ଷିତ ଫିଲ୍ମ ବ୍ରହ୍ମାସ୍ତ୍ରର ଫାଷ୍ଟ ଲୁକ୍ ରିଲିଜ କରିଛନ୍ତି । ଏହି ଫିଲ୍ମରେ ପ୍ରଥମ ଥର ପାଇଁ ବଡ ପରଦାରେ ଆଲିଆଙ୍କ ସହ ରଣବୀର କପୁର ରୋମାନ୍ସ କରିଥିବାର ସିନ୍ ଦେଖିବାକୁ ମିଳିବ ।
ବ୍ରହ୍ମାସ୍ତ୍ର ଫିଲ୍ମର ଏହି ୩୧ସେକେଣ୍ଡର ଟିଜରରେ ଈଶା ଭୂମିକାରେ ଆଲିଆ ଏକ ଭିନ୍ନ ରୂପରେ ନଜର ଆସିଛନ୍ତି । ଏହି ଫିଲ୍ମରେ ସେ କେତେବେଳେ ବବଲି ଦେଖାଯାଉଛନ୍ତି ତ ପୁଣି କେତେବେଳେ ଗ୍ଲାମରସ୍ ଦେଖାଯାଉଛନ୍ତି । ଫିଲ୍ମଟିରେ ଏମିତି କିଛି ସିନ୍ ରହିଛି ଯେଉଁଥିରେ ଆଲିଆ ଖୁବ୍ ସାହସି ଦେଖାଯାଉଥିଲେ । ତେବେ ଆଲିଆଙ୍କ ଏହି ପ୍ରଥମ ଲୁକ୍ ଭିଡିଓରେ ରଣବୀରଙ୍କ କୋଳରେ ବସି ରୋମାନ୍ସ କରୁଥିବାର ନଜର ଆସିଛନ୍ତି । ଭିଡ଼ିଓଟି ସୋସିଆଲ ମିଡିଆରେ ସେୟାର କରି କ୍ୟାପ୍ସନରେ ହାପି ବାର୍ଥଡେ ଲିଟିଲ ଓାନ ବୋଲି ଲେଖାଯାଇଛି ।
ତେବେ ଏହି ଫାଷ୍ଟ ଲୁକ ରିଲିଜ ହେବାଟା ଆଲିଆଙ୍କ ପାଇଁ ଆୟନ ମୁଖାର୍ଜୀଙ୍କ ତରଫରୁ ବାର୍ଥଡେ ଗିଫ୍ଟ ବୋଲି କୁହାଯାଉଛି । ଆୟନ କହିଛନ୍ତି ତୁମର ବିଶେଷ ଦିନ ପାଳନ କରି ଆମେ ଆମ ଫିଲ୍ମରୁ ଆମର ଇଶା ଚରିତ୍ର ବ୍ରହ୍ମାସ୍ତ୍ର କି ଶକ୍ତିର ପ୍ରଥମ ଲୁକ ରିଲିଜ କରୁଛୁ । ତେବେ ଆଲିଆଙ୍କ ଏହି ଲୁକ୍ କୁ ତାଙ୍କ ଫ୍ୟାନ୍ସମାନେ ମଧ୍ୟ ବେଶ ପ୍ରଶଂସା କରୁଛନ୍ତି । ତେବେ ଆଲିଆ ଓ ରଣବୀରଙ୍କ ରୋମାନ୍ସ ଦର୍ଶକ କେତେ ପସନ୍ଦ କରୁଛନ୍ତି ତାହା ଫିଲ୍ମଟି ରିଲିଜ ହେଲେ ଜଣାପଡିବ । କେବଳ ରିଲ ଲାଇଫରେ ନୁହେଁ ରିୟଲ ଲାଇଫରେ ମଧ୍ୟ ରଣବୀର ଓ ଆଲିଆଙ୍କର ପ୍ରେମ ସମ୍ପର୍କ ରହିଥିବା ବେଳେ ଦୁହିଁଙ୍କର ନିର୍ବନ୍ଧ ସରିଥିବା ସୂଚନା ମିଳିଛି । ତେବେ ଦୁହେଁ ଅତିଶୀଘ୍ର ବିବାହ ବନ୍ଧନରେ ଆବଦ୍ଧ ହେବାକୁ ଯାଉଥିବା ଫ୍ୟାନ୍ସମାନଙ୍କୁ ଜଣାଇଛନ୍ତି ।