ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପ୍ରୁ ବାଂଲାଦେଶର ଓହରିଯିବା ପ୍ରସଙ୍ଗ ଏବେ କେବଳ କ୍ରୀଡ଼ା ମାତ୍ରରେ ସୀମିତ ରହିନାହିଁ। ଏହା ଧୀରେ ଧୀରେ ରାଜନୈତିକ ବୟାନବାଜିର ରୂପ ନେଇ ସମଗ୍ର ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ ହୋଇଉଠିଛି। ସଦ୍ୟତମ ଘଟଣାକ୍ରମରେ ଦେଶର କ୍ରୀଡ଼ା ପରାମର୍ଶଦାତା ଆସିଫ୍ ନଜରୁଲଙ୍କ ନୂତନ ବିବୃତ୍ତି ଏହି ବିବାଦକୁ ଆହୁରି ତିବ୍ର କରିଦେଇଛି। ମଙ୍ଗଳବାର, ଫେବୃଆରୀ ୧୦ ତାରିଖରେ ଆସିଫ୍ ନଜରୁଲ୍ କହିଥିଲେ ଯେ, ବିଶ୍ୱକପ୍ରୁ ଓହରିଯିବାର ନିଷ୍ପତ୍ତି ସରକାର ନୁହେଁ, ବରଂ ଖେଳାଳିମାନେ ଓ ବାଂଲାଦେଶ କ୍ରିକେଟ୍ ବୋର୍ଡ (BCB) ମିଳିତ ଭାବେ ନେଇଥିଲେ। ତାଙ୍କ କହିବା ଅନୁସାରେ, ଦେଶର ସମ୍ମାନ ଓ କ୍ରିକେଟର ଭବିଷ୍ୟତକୁ ମନେରଖି ଏହି ପଦକ୍ଷେପ ଗ୍ରହଣ କରାଯାଇଥିଲା। ସରକାର କେବଳ ଏହି ନିଷ୍ପତ୍ତିକୁ ସମର୍ଥନ କରିଥିଲା।
କିନ୍ତୁ ଏହାର ପୂର୍ବରୁ, ଜାନୁଆରୀ ୨୨ ତାରିଖରେ ସେ ସ୍ପଷ୍ଟ କରିଥିଲେ ଯେ ବିଶ୍ୱକପ୍ରୁ ଓହରିବା ନିଷ୍ପତ୍ତି ସରକାର ନେଇଛି। ସେତେବେଳେ ICC ପକ୍ଷରୁ ସନ୍ତୋଷଜନକ ପ୍ରତିକ୍ରିୟା ନମିଳିବାକୁ କାରଣ ଭାବେ ଦର୍ଶାଯାଇଥିଲା। ଏହା ସହ ଖେଳାଳିମାନଙ୍କ ସହ କୌଣସି ପରାମର୍ଶ ହୋଇନଥିବା ମଧ୍ୟ ସୂଚିତ ହୋଇଥିଲା। ଏପରି ପରିସ୍ଥିତିରେ ବୟାନରେ ଏହି ପରିବର୍ତ୍ତନ ଅନେକ ପ୍ରଶ୍ନ ଉଠାଇଛି। ବର୍ତ୍ତମାନ ବାଂଲାଦେଶ କ୍ରିକେଟ୍ ବୋର୍ଡ ପକ୍ଷରୁ ଏକ ସ୍ପଷ୍ଟ ଓ ବିସ୍ତୃତ ବିବୃତ୍ତି ପାଇଁ ଅପେକ୍ଷା କରାଯାଉଛି। ଆଗାମୀ ଦିନରେ ପ୍ରକୃତରେ କେଉଁ ସ୍ତରରେ ଏହି ନିଷ୍ପତ୍ତି ଗ୍ରହଣ ହୋଇଥିଲା, ତାହା ସ୍ପଷ୍ଟ ହେବା ସମ୍ଭାବନା ରହିଛି।ଏହି ୟୁ-ଟର୍ଣ୍ଣ ପୁଣିଥରେ କ୍ରୀଡ଼ା ଓ ରାଜନୀତିର ସମ୍ପର୍କକୁ ନେଇ ନୂତନ ବିତର୍କ ସୃଷ୍ଟି କରିଛି। ଟି-୨୦ ବିଶ୍ୱକପ୍ ଭଳି ଏକ ବଡ଼ ମଞ୍ଚରୁ ନିଜକୁ ପଛକୁ ହଟାଇବା କୌଣସି ଦଳ ପାଇଁ ସହଜ କଥା ନୁହେଁ। ତେଣୁ ବିବୃତ୍ତିରେ ଏହି ପରିବର୍ତ୍ତନ ମାମଲାକୁ ଆହୁରି ଜଟିଳ କରିଦେଇଛି ଏବଂ ଦେଶରେ କ୍ରୀଡ଼ା ନୀତି ଓ ରାଜନୈତିକ ହସ୍ତକ୍ଷେପକୁ ନେଇ ତୀବ୍ର ଚର୍ଚ୍ଚା ଆରମ୍ଭ ହୋଇଛି।