ନୂଆଦିଲ୍ଲୀ: ସଂସଦରେ ଆଗତ ହେଲା ନୂଆ ଆୟକର ବିଲ୍ । ନୂଆ ଆୟକର ବିଲ୍ ଆଗତ କଲେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଗତ ଶୁକ୍ରବାର ପୁରୁଣା ଆୟକର ବିଲ୍ ପ୍ରତ୍ୟାହାର କରିଥିଲେ ସରକାର । ସଂସଦୀୟ ସିଲେକ୍ଟ କମିଟିର ସବୁ ସୁପାରିସ୍ ଗ୍ରହଣ କରାଯାଇଥିବା ନେଇ ସୂଚନା ମିଳିଥିଲା । ବୈଜୟନ୍ତ ପଣ୍ଡାଙ୍କ ଅଧ୍ୟକ୍ଷତାରେ ସଂସଦୀୟ ସିଲେକ୍ଟ କମିଟି ଏନେଇ ସୁପାରିସ୍ କରିଥିଲା । ନୂଆ ଆୟକର ବିଲ୍ ପାଇଁ ୨୮୫ ପ୍ରସ୍ତାବ ସୁପାରିସ୍ କରିଥିଲା ସିଲେକ୍ଟ କମିଟି । ଆୟକର ପୈଠ ବ୍ୟବସ୍ଥାକୁ ଅଧିକ ସରଳୀକରଣ ପାଇଁ ଆସିଛି ନୂଆ ବିଲ୍ । ତେବେ ଲୋକସଭାରେ ନୂଆ ଆୟକର ବିଲ୍ ପାରିତ ହୋଇଛି । ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ବାରା ଆଗତ ପରେ ପାରିତ ହେଲା ଆୟକର ବିଲ୍ । ୪,୫୭୫ ପୃଷ୍ଠାର ଡ୍ରାଫ୍ଟ ପ୍ରସ୍ତୁତ କରିଥିଲା ୩୧ ଜଣିଆ ସିଲେକ୍ଟ କମିଟି । ନିର୍ମଳା ସୀତାରମଣ କହିଛନ୍ତି ଯେ, ନୂତନ ବିଲ୍ ପୁରୁଣା ୧୯୬୧ ଆୟକର ଆଇନକୁ ସମ୍ପୂର୍ଣ୍ଣ ଭାବରେ ବଦଳାଇବ । ପୁରୁଣା ବିଲ୍ ରେ ଦ୍ୱନ୍ଦ୍ୱ ଥିଲା, ତେଣୁ ଏହାକୁ ପ୍ରତ୍ୟାହାର କରି ନିଆଯାଇଛି ଏବଂ ସବୁକିଛି ସଠିକ୍ ଏବଂ ସ୍ପଷ୍ଟ କରିବା ପାଇଁ ଏକ ନୂତନ ବିଲ୍ ଆଗତ କରାଯାଇଛି । ଅର୍ଥମନ୍ତ୍ରୀ ସୀତାରମଣ ସଂସଦକୁ କହିଛନ୍ତି ଯେ ,ଆମେ କିଛି ପରାମର୍ଶ ପାଇଛୁ, ଯାହାକୁ ଆଇନର ପ୍ରକୃତ ଅର୍ଥ ବାହାରକୁ ଆଣିବା ପାଇଁ ଅନ୍ତର୍ଭୁକ୍ତ କରିବା ଆବଶ୍ୟକ । ଏଥିରେ ଡ୍ରାଫ୍ଟିଂ ଭୁଲ ସଂଶୋଧନ, ବାକ୍ୟ ବ୍ୟବସ୍ଥା ଏବଂ କ୍ରସ୍-ରେଫରେନ୍ସିଂ ଭଳି ପରିବର୍ତ୍ତନ ଅନ୍ତର୍ଭୁକ୍ତ ।
