ପଟ୍ଟାମୁଣ୍ଡାଇ: ପଟ୍ଟାମୁଣ୍ଡାଇ କାଠିଆପଡ଼ା ଛାତ୍ରୀ ପୋଡ଼ି ମୃତ୍ୟୁ ଘଟଣା । ଜେଲ୍ ଗଲା ଅଭିଯୁକ୍ତ ପ୍ରମୋଦ ବେହେରା । JMFCରେ ଜାମିନ ନାମଞ୍ଜୁର ହେବାରୁ ବିଚାର ବିଭାଗୀୟ ହାଜତ ଗଲା ପ୍ରମୋଦ । ୧୪ ଦିନ ପାଇଁ କେନ୍ଦ୍ରାପଡ଼ା ବାରିମୂଳ ଜେଲ୍କୁ ଗଲା ଅଭିଯୁକ୍ତ । ପ୍ରାଥମିକ ପ୍ରମାଣ ଆଧାରରେ ଆଜି ଗିରଫ କରିଥିଲା ପୋଲିସ । ସେପଟେ ପଟ୍ଟାମୁଣ୍ଡାଇ କାଠିଆପଡ଼ା ଯୁବତୀ ମୃତ୍ୟୁ ଘଟଣାରେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି କେନ୍ଦ୍ରାପଡ଼ା SP । ପ୍ରାଥମିକ ପ୍ରମାଣ ଆଧାରରେ ପ୍ରମୋଦ ବେହେରାଙ୍କୁ ଗିରଫ କରାଯାଇଛି ବୋଲି କହିଛନ୍ତି ଏସ୍ପି । ଅଭିଯୁକ୍ତ ପ୍ରମୋଦ ମୋବାଇଲ୍ରେ ୬୦ ଅଶ୍ଲୀଳ ଭିଡିଓ ଥିବାର ପ୍ରମାଣ ମିଳିଛି । ଗତ ଜୁଲାଇ ୧୭ରେ ପୀଡ଼ିତାର ବାପାଙ୍କ ପାଖକୁ ଗୋଟିଏ ଅଶ୍ଳୀଳ ଭିଡିଓ ପଠାଇଥିଲା ପ୍ରମୋଦ । ସେହି ସମାନ ଦିନ ଆଉ ୪ରୁ ୫ ଜଣଙ୍କ ପାଖକୁ ମଧ୍ୟ ତାହା ପଠାଇଥିଲା । ଘଟଣା ଦିନ ସକାଳ ୭ଟା ୩୪ରେ ମୋବଇଲ୍ରେ କଲ୍ କରିଥିଲା । ଆମେ ଅଭିଯୁକ୍ତ ଓ ପୀଡ଼ିତା ବାପାଙ୍କ ମୋବାଇଲ୍ ସିଜ୍ କରି ସାରିଛୁ । ବର୍ତ୍ତମାନ ସୁଦ୍ଧା କେବଳ ଅଭିଯୁକ୍ତ ପ୍ରମୋଦ ତଦନ୍ତ ପରିସରଭୁକ୍ତ ଅଛନ୍ତି । ପ୍ରମୋଦକୁ ଛାଡିଦେଲେ ଆଉ କେହି ତଦନ୍ତ ପରିସରରେ ନାହାଁନ୍ତି । ଅଭିଯୁକ୍ତ ପ୍ରମୋଦ ନାଁରେ ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଦଫା ଲାଗିଛି । SFSL, ଏଫ୍ଏନ୍ଟି, ପୋଷ୍ଟମର୍ଟମ ରିପୋର୍ଟ ଆସିଲା ପରେ ସବୁ ସ୍ପଷ୍ଟ ହେବ । ସିସିଟିଭି ଫୁଟେଜ୍ରେ ପୀଡ଼ିତାଙ୍କ ବାପା, ମା’ଙ୍କ ଯିବା ଆସିବା ଦୃଶ୍ୟ ମିଳିଛି । ଅଭିଯୁକ୍ତ ପ୍ରମୋଦଙ୍କ ବାପାଙ୍କ ଏତଲା ନେଇ ମଧ୍ୟ ତଦନ୍ତ କରାଯିବ ବୋଲି କହିଛନ୍ତି କେନ୍ଦ୍ରାପଡା ଏସ୍ପି । ତେବେ କହିରଖୁଛୁ ଯେ, ଘଟଣାର ୪ ଦିନ ପରେ ଗତକାଲି ଥାନାରେ ଏତଲା ଦେଇଥିଲେ ମୃତ ଯୁବତୀଙ୍କ ବାପା ଏବଂ ଭାଇ । ଏତଲା ଆଧାରରେ ଆଜି ପୁରୁଷ ବନ୍ଧୁ ପ୍ରମୋଦ ବେହେରାକୁ ଗିରଫ କରିଛି ପୋଲିସ । ମୋଦକୁ ପ୍ରଥମେ ଚେନ୍ନାଇରୁ ଅଟକ ରଖାଯାଇଥିଲା । ପରେ ଜେରା ପାଇଁ କେନ୍ଦ୍ରାପଡ଼ା ଅଣାଯାଇଥିଲା । ପ୍ରମୋଦଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତା (ବିଏନଏସ)ର ଧାରା ୨୯୬ (ଅଶ୍ଳୀଳ କାର୍ଯ୍ୟ), ୭୫ (ଯୌନ ନିର୍ଯାତନା), ୭୮ (ପିଛା କରିବା) ଓ ୧୦୮ (ଆତ୍ମହତ୍ୟା ପାଇଁ ପ୍ରରୋଚନା) ଏବଂ ଆଇଟି ଆଇନର ଧାରା ୬୬-ଇ ଓ ୬୭-ଏ ଅନ୍ତର୍ଗତ ମାମଲା ରୁଜୁ ହୋଇଛି।
