ନୂଆଦିଲ୍ଲୀ: ରାକ୍ଷୀ ପୂର୍ଣ୍ଣିମାରେ ବଡ଼ ଅଘଟଣ । କାନ୍ଥ ଭୁଶୁଡ଼ି ୨ ଶିଶୁ ସମେତ ୭ ମୃତ । ଦିଲ୍ଲୀ ହରିନଗର ଜୈତପୁରରେ କାନ୍ଥ ଭୁଶୁଡ଼ି ବଡ଼ ଅଘଟଣ । ରାତିସାରା ଲଗାଣ ବର୍ଷା ଯୋଗୁଁ କାନ୍ଥ ଭୁଶୁଡ଼ିଥିବା ନେଇ ସୂଚନା ମିଳିଛି । ମୃତକଙ୍କ ମଧ୍ୟରେ ୩ ଜଣ ପୁରୁଷ ଓ ୨ ମହିଳା ଓ ୨ଜଣ ଶିଶୁ ଥିବା ଜଣାପଡ଼ିଛି । ଏହାସହ ଅନ୍ୟ ୮ ଜଣ ଗୁରୁତର ଆହତ ହୋଇଥିବା ଜଣପଡ଼ିଛି । ୮ ଜଣଙ୍କୁ ଉଦ୍ଧାର କରାଯାଇ ଏମ୍ସ ଟ୍ରମା ସେଣ୍ଟର ଏବଂ ସଫଦରଜଙ୍ଗ ହସ୍ପିଟାଲରେ ଭର୍ତ୍ତି କରାଯାଇଛି। ସ୍ଥାନୀୟ ଲୋକଙ୍କ କହିବା ଅନୁସାରେ, ଦୁର୍ଘଟଣା ଏତେ ଜୋରଦାର ଥିଲା ଯେ, ଆଖପାଖର ଘର ଓ ହସ୍ପିଟାଲରେ ଥିବା ଲୋକ ଭୟଭୀତ ହୋଇଯାଇଥିଲେ। ଆହତଙ୍କ ମଧ୍ୟରୁ ଅଧିକାଂଶଙ୍କର ସ୍ଥିତି ଗୁରୁତର ରହିଛି। ଦୁର୍ଘଟଣା ପରେ ୫ ଜଣଙ୍କୁ ସଫଦରଜଙ୍ଗ ହସ୍ପିଟାଲ ନିଆଯାଇଥିଲା। ସେଠାରେ ଚିକିତ୍ସା ସମୟରେ ମୃତ୍ୟୁ ହୋଇଥିଲା। ସେଭଳି ଆଉ ୩ ଜଣଙ୍କୁ ଟ୍ରମା ସେଣ୍ଟ ନିଆଯାଇଥିଲା। ସେଠାରେ ତାଙ୍କର ବି ମୃତ୍ୟୁ ହୋଇଥିଲା । ସେପଟେ ସାଉଥ୍ ଇଷ୍ଟ ଡିସିସିଙ୍କ କହିବା ଅନୁସାରେ, ୧୦-୧୫ ବର୍ଷ ପୁରୁଣା ଘର ଭୁଶୁଡିଛି। ଅଧିକାଂଶ କବାଡି ବିକ୍ରି କରୁଥିବା ଲୋକ ରହୁଥିଲେ। ତେବେ ଘରର ଅବସ୍ଥା ଭଲ ନଥିଲା। ପ୍ରବଳ ବର୍ଷା ଯୋଗୁଁ ଏହା ଭାଙ୍ଗି ଯାଇଛି। ଏବେ ଉତ୍ତର ଭାରତରେ ବର୍ଷା ଦାଉ ସାଜିଛି । ବିଭିନ୍ନ ରାଜ୍ୟରେ ଲଗାଣ ବର୍ଷା ବା ଭୀଷଣ ବର୍ଷା ଯୋଗୁଁ ଅଘଟଣ ଘଟୁଛି । ଅନେକ ଅଞ୍ଚଳରେ ଟ୍ରାଫିକ୍ ଜାମ୍ ହେବା ସହିତ ଯାତାୟତ ଏକ ପ୍ରକାରର ଠପ୍ ହୋଇଯାଇଛି । ବର୍ଷା ଯୋଗୁଁ ଅନେକ ସ୍ଥାନରେ ରାସ୍ତାରେ ପାଣି ଜମି ରହିଥିବା ଦେଖାଯାଇଛି। ପାଲମ ମୋଡ୍ ଅଞ୍ଚଳରେ ବିମାନବନ୍ଦରରୁ ଧୌଲା କୁଆଁ ଯିବା ରାସ୍ତାରେ ପାଣି ଜମି ରହିବା ଯୋଗୁଁ ଲୋକମାନେ ବହୁତ ସମସ୍ୟାର ସମ୍ମୁଖୀନ ହେଉଛନ୍ତି ।
