ନୂଆଦିଲ୍ଲୀ: ପଶ୍ଚିମ ଆଫ୍ରିକୀୟ ଦେଶ ମାଲିରେ ଆତଙ୍କବାଦୀ ଆକ୍ରମଣ । ତିନି ଜଣ ଭାରତୀୟ ନାଗରିକଙ୍କୁ ଅପହରଣ କରିନେଇଛନ୍ତି ଆତଙ୍କବାଦୀ । ଭାରତ ସରକାର ଏହି ଘଟଣାରେ ଗଭୀର ଚିନ୍ତା ପ୍ରକାଶ କରିଛନ୍ତି ଏବଂ ସେମାନଙ୍କ ତୁରନ୍ତ ଏବଂ ସୁରକ୍ଷିତ ମୁକ୍ତି ସୁନିଶ୍ଚିତ କରିବା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନେବାକୁ ମାଲି ସରକାରଙ୍କୁ ନିବେଦନ କରିଛନ୍ତି । ଏକ ରିପୋର୍ଟ ଅନୁଯାୟୀ, ଭାରତୀୟ ନାଗରିକଙ୍କୁ ଅପହରଣ କରାଯାଇଥିବା ନେଇ ଭାରତୀୟ ଅଧିକାରୀମାନେ ନିଶ୍ଚିତ କରିଛନ୍ତି। ପଶ୍ଚିମ ଆଫ୍ରିକୀୟ ଦେଶ ମାଲିର ଅନେକ ସ୍ଥାନରେ ଆତଙ୍କବାଦୀ ଆକ୍ରମଣ ହୋଇଛି। ଭାରତୀୟଙ୍କ ଅପହରଣ ପରେ, ଭାରତ ମାଲି ସରକାରଙ୍କୁ ସେମାନଙ୍କ ନିରାପଦ ଏବଂ ଶୀଘ୍ର ମୁକ୍ତି ସୁନିଶ୍ଚିତ କରିବା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନେବାକୁ ଅନୁରୋଧ କରିଥିଲା।
ସେପଟେ କାୟେସର ଡାଇମଣ୍ଡ ସିମେଣ୍ଟ କାରଖାନାରେ କାମ କରୁଥିବା ଭାରତୀୟଙ୍କ ଅପହରଣ ସମ୍ପର୍କରେ ବୈଦେଶିକ ମନ୍ତ୍ରଣାଳୟ (MEA) ଗଭୀର ଚିନ୍ତା ପ୍ରକାଶ କରିଛି। ବୈଦେଶିକ ମନ୍ତ୍ରଣାଳୟ କହିଛି, “ଘଟଣାଟି ଜୁଲାଇ ୧ ରେ ଘଟିଥିଲା, ଯେତେବେଳେ ଆକ୍ରମଣକାରୀଙ୍କ ଏକ ଗୋଷ୍ଠୀ କାରଖାନା ପରିସରରେ ଆକ୍ରମଣ କରି ତିନି ଜଣ ଭାରତୀୟ ନାଗରିକଙ୍କୁ ବଳପୂର୍ବକ ବନ୍ଧକ କରି ନେଇଥିଲେ।” ତେବେ ଗତ କିଛି ବର୍ଷ ମଧ୍ୟରେ ମାଲିରେ ଅନେକ ଆତଙ୍କବାଦୀ ଆକ୍ରମଣ ହୋଇଛି। ଜୁଲାଇ ୧ ରେ ହୋଇଥିବା ଏହି ଆତଙ୍କବାଦୀ ଆକ୍ରମଣ ପୂର୍ବରୁ, ଗତ ବର୍ଷ ସେପ୍ଟେମ୍ବର ୧୭ ରେ ବାମାକୋର ଅନେକ ସ୍ଥାନରେ ଆତଙ୍କବାଦୀ ଆକ୍ରମଣ ହୋଇଥିଲା। ଏହି ଆକ୍ରମଣରେ ୭୭ ଜଣ ପ୍ରାଣ ହରାଇଥିବା ବେଳେ ୨୦୦ରୁ ଅଧିକ ଲୋକ ଆହତ ହୋଇଥିଲେ। ଏହା ପୂର୍ବରୁ ୭ ସେପ୍ଟେମ୍ବର ୨୦୨୩ ରେ, ଟିମ୍ବୁକ୍ଟୁ ନିକଟସ୍ଥ ନାଇଜର ନଦୀରେ ଏକ ଡଙ୍ଗା ଉପରେ ଆକ୍ରମଣ ହୋଇଥିଲା। ଆମେରିକାର ବୈଦେଶିକ ବିଭାଗର ରିପୋର୍ଟ ଅନୁଯାୟୀ, ଏହି ଆକ୍ରମଣରେ ୭୪ ଜଣଙ୍କର ମୃତ୍ୟୁ ହୋଇଥିଲା। ଏଥିରେ ୪୯ ଜଣ ସାଧାରଣ ନାଗରିକ ମଧ୍ୟ ଥିଲେ ।