ଭୁବନେଶ୍ୱର: ଆଜି SC/ST ଜାତୀୟ ସମ୍ମିଳନୀର ଦ୍ଵିତୀୟ ଦିନ । SC/ST ଜାତୀୟ ସଂସଦୀୟ ସମ୍ମିଳନୀର ଦ୍ଵିତୀୟ ଦିନରେ ଯୋଗ ଦେଇ ବାଚସ୍ପତି ଓମ୍ ବିର୍ଲା ରାଜ୍ୟ ବାସୀଙ୍କୁ ସମ୍ବୋଧନ କରିଛନ୍ତି । ଶ୍ରୀ ବିର୍ଲା କହିଛନ୍ତି, ଜାତି/ଜନଜାତିଙ୍କ ପାଇଁ ଭୁବନେଶ୍ବର ଏଜେଣ୍ଡା-୨୦୨୫ ପ୍ରସ୍ତୁତ ହୋଇଥିଲା । ୨୦୪୭ ସୁଦ୍ଧା ବାବା ସାହେବ ଆମ୍ବେଦକରଙ୍କ ସ୍ବପ୍ନ ପୂରଣ କରିବା ନିହାତି ଦରକାର । ସବୁ ସରକାରୀ ଯୋଜନା ଲାଭ ଜାତି/ଜନଜାତି ଲୋକଙ୍କ ପାଖରେ ପହଞ୍ଚୁ । ସଂସଦୀୟ ସମ୍ମିତି ହେଉଛି ମିନି ପାର୍ଲିଆମେଣ୍ଟ, ଯାହା ସବୁ ଅନୁଧ୍ୟାନ କରୁଛି । ବଜେଟ୍ର ବ୍ୟୟବରାଦ ଜାତି/ଜନଜାତିଙ୍କ ପାଖରେ ପହଞ୍ଚୁଛି ନା ନାହିଁ ଦେଖୁ । ଜାତି/ଜନଜାତିର ନୂଆ ପୀଢ଼ିଙ୍କୁ ସମାନ ସୁଯୋଗ ମିଳୁଛି ନା ନାହିଁ ଦେଖୁଛି । ଶିକ୍ଷା ଗ୍ରହଣ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ସ୍ବତନ୍ତ୍ର ବ୍ୟୟ ବରାଦ କରୁଛନ୍ତି ।ଏସବୁ ସଠିକ୍ ଅନୁଶୀଳନ ପାଇଁ ପ୍ରତି ବିଧାନସଭାରେ ସଂସଦୀୟ ସମ୍ମିତି ରହୁ ବୋଲି କହିଛନ୍ତି ଲୋକସଭା ବାଚସ୍ପତି ଶ୍ରୀ ବିର୍ଲା ।
ତେବେ ଗତକାଲିଠୁ ଆରମ୍ଭ ହୋଇଛି ଅନୁସୂଚିତ ଜାତି ଓ ଜନଜାତି ସଂସଦୀୟ କମିଟିର ଜାତୀୟ ସମ୍ମିଳନୀ । ଏହାକୁ ଉଦଘାଟନ କରିଥିଲେ ଲୋକସଭା ବାଚସ୍ପତି ଓମ୍ ବିର୍ଲା। ଦୁଇ ଦିନ ଧରି ସମ୍ମିଳନୀ ଚାଲିବାକୁ ଥିବା ବେଳେ ଆଜି ହେଉଛି ଏହାର ଦ୍ଵିତୀୟ ଦିନ । ୧୯୯୪ ପରେ ପ୍ରଥମ ଥର ପାଇଁ ଓଡ଼ିଶାରେ କୌଣସି ସଂସଦୀୟ କମିଟିର ଜାତୀୟ ବୈଠକର ଆୟୋଜନ କରାଯାଇଛି।
ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ବିଧାନସଭା କମିଟିର ଅଧ୍ୟକ୍ଷ, ୫ ଜଣ ସଦସ୍ୟ ଏବଂ ୪ ଜଣ ବିଧାୟକ ଯୋଗଦେଇଛନ୍ତି। ଅନୁସୂଚିତ ଜାତି ଓ ଜନଜାତି ଉନ୍ନୟନ ସଂସଦୀୟ କମିଟିର ୩୦ ଜଣ ସଦସ୍ୟ ଉପସ୍ଥିତ ଅଛନ୍ତି। ସମ୍ମିଳନୀରେ ମୁଖ୍ୟମନ୍ତ୍ରୀ ମୋହନ ମାଝୀ ଓ କେନ୍ଦ୍ରମନ୍ତ୍ରୀ ଉପସ୍ଥିତ ଅଛନ୍ତି। ଏଥିରେ ସାରା ଦେଶରୁ ୨୪୦ରୁ ଅଧିକ ଜଣ ପ୍ରତିନିଧି ଯୋଗ ଦେଇଛନ୍ତି।