ରେଡିଓ ଟାୱାର ସହ ଧକ୍କା ହୋଇ ଦୁର୍ଘଟଣା ଗ୍ରସ୍ତ ହେଲିକପ୍ଟର । ଆମେରିକାର ହ୍ୟୁଷ୍ଟନରେ ଏଭଳି ଘଟଣା ଘଟିଛି । ଏହି ଦୁର୍ଘଟଣାରେ ଜଣେ ଶିଶୁ ସମେତ ୪ ଜଣଙ୍କ ମୃତ୍ୟୁ ଘଟିଛି ।
ସୂଚନା ମୁତାବକ, ଆର୍୪୪ ହେଲିକପ୍ଟର ହ୍ୟୁଷ୍ଟନର ଏଲିଙ୍ଗଟନ ବିମାନବନ୍ଦରରୁ ଉଡ଼ାଣ ଭରିବା ପରେ ପ୍ରାୟ ୧୫ ମାଇଲ୍ ଦୂରରେ ଥିବା ସେକେଣ୍ଡ ୱାର୍ଡରେ ଦୁର୍ଘଟଣାର ଶିକାର ହୋଇଥିଲା । ତେବେ ଦୁର୍ଘଟଣା କେଉଁ କାରଣରୁ ହେଲା, ତାହାର ସଠିକ୍ ସୂଚନା ଏ ପର୍ୟନ୍ତ ମିଳିପାରି ନାହିଁ । ହ୍ୟୁଷ୍ଟନ ସହରର କାଉନସିଲ୍ ସଦସ୍ୟ ମାରିଓ କାଷ୍ଟିଲୋ କହିଛନ୍ତି, ସେକେଣ୍ଡ ୱାର୍ଡରେ ଦୁର୍ଘଟଣାଗ୍ରସ୍ତ ହୋଇଥିବା ହେଲିକପ୍ଟର ସରକାରୀ ମାଲିକାନାରେ ନ ଥିଲା, ବରଂ ଏହାକୁ ଏକ ଘରୋଇ ପର୍ୟ୍ୟଟନ କମ୍ପାନୀ ପରିଚାଳନା କରୁଥିଲା । ଦୁର୍ଘଟଣାରେ ମୃତକମାନଙ୍କ ପରିଚୟ ଏବଂ ବୟସ ଏ ପର୍ୟ୍ୟନ୍ତ ସାର୍ବଜନୀନ କରାଯାଇ ନାହିଁ । ଦମକଳ ବିଭାଗ ସୋସିଆଲ ମିଡିଆ ସାଇଟ୍ ‘ଏକ୍ସ’ରେ ଏ ନେଇ ଏକ ପୋଷ୍ଟ କରିଥିଲା ।
